Fishrot: Staat betrek Interpol en Suid-Afrikaanse swaargewig

Een van die bekendste regsmanne in Suid-Afrika, senior adv. Wim Trengove (SC), is versoek om namens die staat op te tree in die appèlsaak waarin die toestaan van borgtog aan mnr. Ricardo Gustavo betwis word. Gustavo het in Desember ‘n bedrag van N$800 000 vir sy vryheid betaal en is ook aan ‘n lang lys ander, streng borgvoorwaardes onderwerp. Talle ander beskuldiges in die Fishrot-saak is steeds besig met borgaansoeke. Hoofregter Peter Shivute het verlede week aan Trengove toestemming gegee om in die Namibiese hooggeregshof op te tree. Trengove is ‘n legendariese menseregteprokureur wat al onder andere in sake oor die doodstraf, diskriminering teen mense met MIV/vigs, die regte van sekswerkers en grondregte betrokke was. Hy was wyle president Nelson Mandela se advokaat en het ook die vervolging van oudpresident Jacob Zuma behartig. Trengove het al verskeie kere in prominente Namibiese sake opgetree. Die aanklaer-generaal, me. Martha Imalwa, voer in hofstukke aan regter Herman Oosthuizen is oortuig om borgtog aan Gustavo toe te staan deur sy aanbod om ‘n GPS-toestel om sy enkel te dra. Geen wetlike raamwerk bestaan egter volgens die AG hiervoor in Namibië nie. Volgens Imalwa het Oosthuizen ook openbare belang gering geskat. “Getuienis wat die staat aangebied het,” voer Imalwa aan, “het gewys dat die respondent [Gustavo] ‘n lid was, of steeds is van ‘n gesofistikeerde sindikaat wie se kriminele aktiwiteite na bewering ‘n verwoestende en verlammende, negatiewe uitwerking op die ekonomie en staatshulpbronne gehad het en die openbare belang rondom die nou berugte Fishrot-skandaal is betwisbaar intens.” Volgens die AG kon Gustavo nie dokumentêre bewyse teen hom weerlê nie, sal hy minstens op van die klagte skuldig bevind word en van sy bates verloor. Die hoërhof het volgens Imalwa ook Gustavo se gereelde reise na Angola en sy familiebande daar nie as ‘n verswarende feit oorweeg nie.

INTERPOL In pleitstukke waarin Imalwa ‘n aansoek deur Gustavo teenstaan om van sy bates te ontvries, het die AG ook gesê dat Interpol versoek is om seker te maak Yslandiese sakelui wat by die skandaal betrek is, kom na Namibië vir hul verhoor. Drie werknemers van Samherji, Ingvar Júlíusson, Egill Helgi Árnason en Adalsteinn Helgason, word in die verband gesoek. Die staat voer aan soveel as N$317 miljoen is in die skandaal gesteel. Volgens Imalwa bied die Yslanders geen getuienis aan wat die staat se saak verkeerd bewys nie. “Hulle druk bloot hul skeptisisme uit,” sê die AG. “Hulle sal skuil in hul buitelandse wegkruipplekke en hul prokureurs sal vir my en mnr. (Johannes) Stefansson onder kruisverhoor neem,” voer Imalwa aan. Volgens die AG kan hierdie persone nie op indirekte verteenwoordiging in die hof aandring sonder dat hulle hul ook persoonlik aan die hof se jurisdiksie onderwerp nie. Behalwe dat Samherji geen verteenwoordigers meer in Namibië het nie, weier hulle volgens Imalwa ook om adresse vir verdagtes te verstrek. Interpol is dus versoek om vas te stel waar die persone hul bevind.