Fishrotters ‘waarsku’ nuwe president

Toivo Ndjebela – Drie van die Fishrot-beskuldigdes dreig om president Nangolo Mbumba hof toe te sleep sou hy die ampstermyn van die Zimbabwies-gebore regter, Moses Chinhengo, verleng of as regter in hul saak aanstel.Chinhengo is die voorsittende regter wat aan die Fishrot-korrupsieskandaal se verhoor toegewys is ná die saak reeds deur talle regters se hande gegaan het.Die voormalige minister van justisie, Sacky Shanghala, en sy medebeskuldigdes, James Hatuikulipi en Pius Mwatelulo, het opdrag aan hul regsverteenwoordiger, Ronald Kurtz, gegee om Mbumba vooraf te waarsku oor die moontlike verlenging of aanstelling van Chinhengo.‘ONGRONDWETLIK’In hul brief aan Mbumba het Shanghala, Hatuikulipi en Mwatelulo die aanstelling van Chinhengo deur wyle president Hage Geingob as ongrondwetlik beskryf.Hulle beweer Chinhengo is te oud aangesien hy 68 is en die aftree-ouderdom vir regters is 65. Volgens hulle is sy aanstelling onwettig omdat hy nie ’n Namibiër of ’n dienende regter in Namibië is nie.Chinhengo is as ’n waarnemende regter van die hoërhof vir die tydperk 18 September tot 31 Desember 2023 aangestel en Shanghala, Hatuikulipi en Mwatelulo poog om sy aanstelling of verlenging van sy termyn te stop voor die Fishrot-verhoor volgende maand hervat.“Ons is opdrag gegee om u in te lig dat indien u Chinhengo aanstel. . . of sy aanstelling verleng, ons kliënte van voorneme is om die hoërhof op ’n dringende basis te nader, sonder enige verdere kennisgewing aan uself, om sodanige aanstelling of verlenging tersyde te stel op grond van die ongrondwetlikheid daarvan,” het Kurtz geskryf.Mbumba se aanstelling van regters of verlenging van hul termyne is onderhewig aan die Regterlike Dienskommissie se aanbevelings.VERRIGTINGEDie Fishrot-verhoor het Desember 2023 begin met Chinhengo wat die beskuldigdes gevra het om te pleit op die aanklagte waarop hulle teregstaan ten spyte van die feit dat vier van die beskuldigdes sonder regsverteenwoordiging was. Tydens die verrigtinge het dié beskuldigdes aan Chinhengo gesê dat dit hulle grondwetlike reg tot ’n regverdige verhoor geskend het.Chinhengo het egter gesê die mans het genoeg tyd gehad om prokureurs te verkry en het ’n pleit van “onskuldig” namens hulle aangeteken.Benewens die drie wat die brief aan Mbumba gerig het, het die voormalige minister van visserye, Bernhard Esau, ook nie ’n prokureur gehad nie en ’n ander beskuldigde, Ricardo Gustavo, se prokureur, Trevor Brockerhoff, het hom vandeesweek aan die saak onttrek.Chinhengo is aan die Fishrot-verhoor toegewys nadat van die Fishrot-beskuldigdes in die verlede aansoeke gebring het vir regters om hulself aan die saak te onttrek omdat hulle ander aansoeke soos borgtogaansoeke aangehoor het. Die betrokke beskuldigdes het aangevoer dat daardie regters reeds tot gevolgtrekkings gekom het en na bewering nie onpartydig kan wees in die aanhoor van die verhoor nie.Die saak is tot 1 Maart uitgestel nadat die beskuldigde, Nigel van Wyk, ’n aansoek om Chinhengo se onttrekking gebring het.– republikein@republikein.com.na

Fishrotters ‘waarsku’ nuwe president

Kommentaar

Republikein 2025-04-07

Meld asseblief aan om kommentaar te lewer

Fishrotters ‘waarsku’ nuwe president

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie