‘Fitty’ hoor uitspraak op 27 Desember

In een van die Fishrot-beskuldigdes, Tamson (Fitty) Hatuikulipi, se aansoek om borgtog, het partye Maandag in die hoërhof in Windhoek slotbetoë gelewer.

Hatuikulipi se regsverteenwoordiger, Richard Metcalfe, het tydens sy slotbetoë die staat se beweerde “sterk saak” teen Hatuikulipi in twyfel probeer trek.

Hy meen die staat steun grootliks op ’n ouditverslag wat Deloitte saamgestel het, maar het beklemtoon dat die vrywaring wat Deloitte voor aan die verslag geheg het, aandui dat die verslag saamgestel is slegs met inligting wat van die Teenkorrupsiekommissie van Namibië (ACC) ontvang is.

Die vrywaring stipuleer ook dat hulle geensins met die beskuldigdes gekommunikeer of hul weergawes in ag geneem het nie.

“As ’n mens mooi na die staat se saak kyk, is dit nie so standvastig nie. Die staat beweer dat hulle ’n sterk saak het op grond van hierdie verslag. Dit is wensdenkery,” het Metcalfe gesê.

Volgens sy betoë het die hoofondersoekbeampte van die ACC, Andreas Kanyangela, in sy getuienis erken dat die verslag op selektiewe inligting gebaseer is en indien Deloitte ander inligting gekry het, sou die verslag verander het.

Metcalfe het verder aangevoer dat die ACC, die staat en die hof die hokaairoeper Jóhannes Stefánsson se weergawe glo asof dit die waarheid is.

Volgens hom het verskeie mense getuig dat Stefánsson onder meer ’n dwelmverslaafde is.

“Hy is ’n selferkende misdadiger. Hy speel die held en word deur die ACC geprys, maar dit is nie die geval nie,” het Metcalfe gesê.

FISHROT

Metcalfe het verder uitgewys dit is nie die eerste keer dat politici aangekla word nie.

Volgens hom is die bewerings vals dat hierdie saak die grootste bedrogsaak in Namibiese geskiedenis is.

Daar was glo al bedrogsake waar groter bedrae geld betrokke was en Metcalfe het uitgewys dat baie van die beskuldigdes borgtog toegestaan is.

Volgens Metcalfe is dit ’n leuen dat die Fishrot-skandaal tot talle werksverliese gelei het. Hy sê talle werknemers is afgedank weens ’n onwettige staking. Hy sê ook dit het nie aanleiding gegee tot ’n beweerde ineenstorting van die visbedryf nie. Daar was glo geen ineenstorting nie.

Metcalfe het ook weer eens daarop gewys dat die samevoeging van die twee aparte sake, wat bekend gestaan het as die Namgomar- en Fishcorsaak, ’n uitgerekte verhoor tot gevolg sal hê wat inbraak sal maak op Hatuikulipi se reg tot ’n spoedige verhoor.

STAAT

Albei die partye het in hul betoë verwys na die onlangse uitspraak in die hooggeregshof waarin medebeskuldigde Ricardo Gustavo se borgtog teruggetrek is.

Staatsaanklaer Ezekiel Ipinge het gesê die verskil tussen Gustavo en Hatuikulipi se sake, is dat Gustavo net vir sy beweerde betrokkenheid by Namgomar aangekla is, en Hatuikulipi se klagte het betrekking op beide sake.

Ipinge beweer daarom dat die samevoeging van die twee sake nie ’n langer verhoor vir Hatuikulipi sal beteken nie.

“Die oortredings het sedert 2011 tot 2019 plaasgevind, maar steeds soek die applikant [Hatuikulipi] ’n kort en kragtige verhoor,” het Ipinge gesê.

Metcalfe het Maandag in die hof weer eens erken dat Hatuikulipi ernstige klagte in die gesig staar en Ipinge het aangevoer die staat het voldoende bewyse gelewer om sy betrokkenheid by albei sake te bewys.

“Hy het meer as N$12 miljoen in herleide fondse ontvang. Toe hy in die hof daaroor uitgevra is, het hy geen antwoord gehad nie, behalwe dat dit lenings tussen hom en sy neef en medebeskuldigde James Hatuikulipi was. Hy het egter geen bewyse gelewer om dit te staaf nie.”

Regter Orben Sibeya sal op 27 Desember uitspraak in die borgtogaansoek lewer.

– [email protected]