Grondwetlike uitdaging struikel

Brian Jaftha, president van die Ganja Users of Namibia (GUN) en die Rastafari United Front (RUF) se grondwetlike uitdaging tot Namibië se wetgewing wat die besit van dagga ’n kriminele oortreding maak, het Woensdag weer ’n terugslag beleef toe sy regsverteenwoordigers Kadhila Amoomo Legal Practitioners onttrek het. Dit was op dieselfde dag wat terugvoer oor die jongste status van die hoërhofsaak gegee moes word. Geen rede is vir die onttrekking verskaf nie en Kadhila Amoomo het teen druktyd nie op navrae gereageer nie. Die saak is veronderstel om op 30 Januarie voort te gaan.

Borro Ndungula, sekretaris-generaal van GUN, het in 2021 saam met Jaftha die saak teen die aanklaer-generaal, die hoof van die Namibiese polisie, die minister van gesondheid en maatskaplike dienste en die minister van justisie gebring.

Yvonne Dausab, minister van justisie, sê egter die onttrekking van die regsverteenwoordigers is nie noodwendig die einde van die grondwetlike uitdaging nie.

“Nee, dit is nie wat dit beteken nie. Die uitdaging staan steeds. Dit is net dat die regsverteenwoordigers waarskynlik sal verander. Die hof sal die volgende stappe uiteensit gedurende die volgende geskeduleerde verhoor,” het sy by navraag geantwoord.

In ’n verklaring van GUN sê Ndungula hy het in 2021 Amoomo se regsfirma genader en Kadhila Amoomo het glo ingestem om die saak sonder vergoeding te hanteer. Die junior prokureur Samuel Kadhila is aangewys om die saak te behartig. Volgens Ndungula het Kadhila vanjaar die firma verlaat en is die saak aan Irene Mukumba oorhandig. Ndungula sê Mukumba was egter nie bereid om sonder vergoeding met die saak voort te te gaan nie en het gesê sy gaan onttrek as die firma nie betaal word nie.

Pogings om die nodige geld binne ’n kort tydperk te kry, het volgens hom misluk.

“Sodra 'n prokureur aan 'n saak onttrek, het die eisers in terme van die wet tien dae om 'n nuwe prokureur te kry of om alternatiewelik hulself te verteenwoordig. Op die oomblik oorweeg ons albei opsies vir die pad vorentoe. Ons wil graag 'n beroep doen op ander private regsfirmas wat pro bono sake doen om so gou moontlik met ons in aanraking te kom sodat ons met ons hoërhofsaak kan voortgaan,” het hy gesê.

Intussen sit Jaftha in die Windhoek Sentrale Gevangenis nadat hy op 16 Oktober 2023 tot twee jaar tronkstraf gevonnis is. Dit nadat hy vyf jaar gelede met dagga in sy besit betrap is. Jaftha het homself verdedig en het met sy vonnisoplegging gesê die hof het nie sy verweer in ag geneem nie. Laasgenoemde het ingesluit dat die ondersoekbeampte dood is en dus nie gekruisondervra kon word nie en dat die plantmateriaal wat in sy besit gevind is, nooit getoets is nie.

“Die hof was bevooroordeeld teenoor my,” het hy toe gesê. Jaftha se hare is glo ten spyte van sy rastafariese godsdienstige oortuigings in die tronk afgesny. Ook word sy geloof met betrekking tot sy dieet volgens hom nie in die tronk in ag geneem nie. In ’n brief in Desember aan tronkowerhede het Jaftha gesê hy het die afgelope 20 jaar geen diereprodukte geëet nie. Hy het vir toegang tot ’n dieetkundige gevra, aangesien hy nie vleis, melk of botter eet nie. Gevangenes kry daagliks glo pap met melk vir ontbyt en ’n stukkie vleis met of ’n aartappel, botterskorsie, kool, of beet vir middagete. Volgens Jaftha kry hy gevolglik nie genoeg voedingstowwe en vitamiene in nie. Teen verlede week het hy nog geen reaksie op sy skriftelike versoek gehad nie. – [email protected]