Heckmair-moordsage nader 12de jaar

Die twee Amerikaanse burgers wat teregstaan vir die moord op André Heckmair, mnre. Marcus Thomas en Kevan Townsend, sal eers na die 12-jaar herdenking van die beweerde slypmoord op Heckmair weer in die hoërhof in Windhoek verskyn nadat getuienis in hul verhoor vir 2022 tot ’n einde gekom het. Die verhoor sal in Maart volgende jaar hervat, wanneer die kruisondervraging van hoofinspekteur Felix Ndikoma sal voortduur. Heckmair is op 7 Januarie 2011 vermoor. In die laaste twee dae van die verhoor het Ndikoma sy vorige getuienis van maande gelede tydens die binneverhoor in die saak gewysig. Hy het oorspronklik getuig dat Townsend se selfoonrekords bewys dat hy ten tyde die moord in die omgewing van die moordtoneel was, maar het homself reggestel en verduidelik dit is nie waar nie. “Toe ek dit gesê het, het ek geglo dit is waar, maar dit was nie waar nie,” het hy getuig. PROSEDURES BEVRAAGTEKEN Townsend se regsverteenwoordiger, mnr. Mbanga Siyomuinji, het Ndikoma egter ook ondervra oor die prosedures wat gevolg is toe die twee beskuldigdes aangehou is en oor gesprekke wat hy met hulle gevoer het. Volgens Siyomuinji is die mans onwettig in hegtenis geneem, aangesien die items waarvoor die polisie glo gesoek het, nie in die beskuldigdes se kamer in ’n gastehuis gevind is nie. “Ongeveer tien polisiebeamptes het op die kamer toegesak en geen van die items waarna hulle gesoek het, gevind nie. [Inspekteur Joseph] Ndokosho het getuig die polisie kon in daardie stadium nie die beskuldiges op die toneel plaas nie,” het hy aan Ndikoma gestel. Ndikoma het hierop geantwoord dat die polisie volgens hom egter rede gehad het om die mans te verdink. “Daar was niks op die toneel wat die beskuldigdes met die moord kon verbind nie, maar daar was talle faktore in die saak wat hulle met die moord verbind het,” het hy getuig. Siyomuinji het dit voor die hof gestel dat die beskuldigdes nie binne 48 uur, soos die wet voorskryf, voor ’n hof verskyn het op ’n klag van onwettige dwelmbesit nie. Ndikoma het getuig dat die mans op die klag van dwelmbesit aangehou is tot ’n klag van moord amptelik geopen is en ’n saaknommer waarop die mans aangehou kon word, beskikbaar was. Regter Christie Liebenberg het egter Siyomuinji se argument van die hand gewys op gronde dat dit nie verband hou met die klag van moord waarop die mans verskyn nie, en aangevoer dat hierdie saak eerder as ’n siviele klag hanteer moet word.kristien@republikein.com.na

Heckmair-moordsage nader 12de jaar

Kommentaar

Republikein 2025-04-07

Meld asseblief aan om kommentaar te lewer

Heckmair-moordsage nader 12de jaar

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie