Heritage wen weer

Henriette Lamprecht – Die aansoek van die registrateur van mediese fondse in Namibië vir die likwidasie van die Heritage Health mediese fonds, is in die hoërhof met koste van die hand gewys. Die registrateur moet ook pa staan vir Heritage Health se regskoste. Die saak is gevolglik ook van die hofrol geskrap.Die registrateur het in Junie 2021 die aansoek om likwidasie gebring omdat dit van mening was dat Heritage Health nie finansieel stabiel was nie en herhaaldelik geweier en of misluk het om sy wettige riglyne te volg.Heritage Health het ’n teenaansoek gebring dat die registrateur die fonds se voorgestelde 2022-’23-bydraes en voordele op meriete moet oorweeg. Volgens regter Herman Oosthuizen se uitspraak het die registrateur se “onredelike opdragte en besluite” op 26 Februarie en 25 April 2019 en die gevolglike “administratiewe boetes wat daarna opgelê is, sowel as die openbare kennisgewings wat uitgereik is” nadelige gevolge vir die fonds gehad wat probeer het om sake op gesonde sakebeginsels in ’n negatiewe finansiële situasie te bedryf. Die uitspraak lui voorts die registrateur se regulering van die toekomstige bedrywighede van die fonds behoort gedoen te word met die doel om omstandighede te skep waarin die fonds die geleentheid gegun word om sy finansiële omgewing te verbeter.“Deur dit te doen, sal die registrateur die fonds bemark en die openbare belang dien deur te help dat verskeie pensioenarisse steeds onder hul verkose mediesefondsplanne gedek bly en druk op die openbare gesondheidstelsel verlig,” lui die uitspraak.Volgens die uitspraak was die kern van die geskille tussen die registrateur en die fonds die verwydering van die selffinansieringsgaping sonder die goedkeuring van die nodige en redelike verhoging van bydraes wat ’n kettingreaksie op die fonds se daaropvolgende finansiële gesondheid gehad het.“Die hof is nie van mening dat die fonds nie in staat is om sy skuld te vereffen nie, en ook nie dat dit regverdig en billik is dat die fonds gelikwideer moet word nie.”Heritage Health se appèlaansoek teen die registrateur van mediese fondse en die Namibië Toesighoudende Owerheid vir Finansiële Instellings (Namfisa) wat fokus op die jaarlikse verhoging van premies en sy selffinansieringsgaping was einde verlede jaar suksesvol.Dié uitspraak was die einde van ’n hofgeding wat so ver terugstrek as 2018, nadat die registrateur Heritage Health se aansoek vir sy jaarlikse verhoging van premies vir 2019 afgekeur het.Die kern van die hofaansoek was of die verhoging ’n wysiging van die fonds se reëls is en sodoende die goedkeuring van die registrateur vereis.Volgens verlede jaar se uitspraak in die hooggeregshof is die registrateur ook opdrag gegee om sy besluit oor die selffinansieringsgaping te heroorweeg. – henriette@republikein.com.na

Heritage wen weer

Kommentaar

Republikein 2025-04-07

Meld asseblief aan om kommentaar te lewer

Heritage wen weer

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie