Kandidaatregters: Publiek kan nou onderhoude bywoon
Paneellede reeds aangewys
Die onderhoude met drie kandidate vir vakante regtersposte in die hoërhof sal eerskomende Vrydag gevoer word.
Die Regterlike Dienskommissie sal eerskomende Vrydag vir die eerste keer openbare onderhoude voer met kandidate vir vakante regtersposte in die hoërhof.
Dit met die doel om deursigtigheid en aanspreeklikheid te bevorder.
Dit sluit in onderhoude met drie kandidate op die kortlys – die waarnemende regter Philanda Christiaan, adv. Slysken Makando en adv. Beatrix de Jager.
Christiaan, Makando en De Jager se onderhoude sal op Vrydag 8 Desember omstreeks 09:00 in hofsaal B van die hooggeregshof plaasvind.
Die paneellede vir die onderhoude is reeds vasgestel en sal bestaan uit vyf lede van die Regterlike Dienskommissie. Dit sluit in hoofregter Peter Shivute, regterpresident Petrus Damaseb, die prokureur-generaal Festus Mbandeka, en twee lede van die regsgemeenskap, naamlik adv. Sakeus Akweenda en Elias Shikongo.
“Die Regterlike Dienskommissie het by ’n vergadering op 15 September besluit om die regulasies te wysig ingevolge die bepalings van Artikel 85(3) van die Namibiese Grondwet, om opdrag te gee dat onderhoude van genomineerde kandidate vir geregtelike ampte in die openbaar gevoer moet word,” het die kommissie se hoofwoordvoerder, Delila Salatiel, aan Republikein gesê.
CHRISTIAAN
Philanda Christiaan was Namibië se hooflanddros voordat sy in September vanjaar as waarnemende regter van die hoërhof aangestel is. Haar termyn verstryk egter op 9 Desember vanjaar.
Sy het in 2016 ook as waarnemende regter gedien. Christiaan is sedert 2007 ’n landdros en was voorheen in Keetmanshoop en in 2019 is sy as die hooflanddros in die kantoor van die regbank aangestel.
Sy het haar regsgraad in 2004 aan die Universiteit van Namibië (Unam) verwerf.
MAKANDO
Advokaat S.S. Makando is ’n regspraktisyn van die hoërhof en hooggeregshowe van Namibië en praktiseer sedert 1994.
Hy was vanaf Desember 1993 tot Julie 1994 ’n staatsaanklaer en ná sy toelating in Augustus 1994 het hy as ’n advokaat in die kantoor van die aanklaer-generaal gewerk.
Vanaf 1995 tot 1998 het Makando as regsadviseur vir die weermag en die ministerie van verdediging gedien en is later aangestel as die hoof van die raadgewende afdeling van die ministerie van verdediging en al die vleuels van die militêre instelling.
Makando het ook in 2005 deeltyds as dosent by Unam se opleidingsentrum met betrekking tot strafreg en hofpraktyke gewerk. Hy is sedert Maart 2016 die eienaar van Adv. S.S. Makando Chambers.
DE JAGER
Beatrix de Jager is by die Namlex Chambers en is ’n lid van die Vereniging van Advokate van Namibië. Die vereniging het ten doel om die belange van advokate te handhaaf en alle sake te hanteer wat die regsberoep in Namibië raak en om – indien nodig – met die nodige kundigheid op te tree.
De Jager het vanaf Maart 2003 tot Julie 2004 by die kantoor van die staatsprokureur haar klerkskap gedoen en is op 19 Julie 2004 as regspraktisyn toegelaat. Sy het as sodanig by die kantoor van die staatsprokureur gepraktiseer en het later by Kirsten & Co aangesluit tot November 2008.
De Jager spesialiseer in onder meer die administrasie van testamente en boedels, grondwetlike reg, menseregte, die Bankwet en arbitrasie.
‘PUBLIEK KAN NOU WEET’
Die prokureur Florian Beukes meen die verandering kan openbare vertroue in die regbank versterk.
“Dit is ’n groot stap vir die deursigtigheid van die regbank. Voorheen het die publiek nie geweet wie hierdie kandidate is nie, maar nou weet hulle wie die moontlike regters kan wees,” sê hy.
Beukes sê die publiek kan dan vir hulself sien op watter gronde regters aangestel word.
“Mense sal kan sien dat ons regters nie as gevolg van politieke motiewe aangestel word nie,” sê hy.
– [email protected]
Dit met die doel om deursigtigheid en aanspreeklikheid te bevorder.
Dit sluit in onderhoude met drie kandidate op die kortlys – die waarnemende regter Philanda Christiaan, adv. Slysken Makando en adv. Beatrix de Jager.
Christiaan, Makando en De Jager se onderhoude sal op Vrydag 8 Desember omstreeks 09:00 in hofsaal B van die hooggeregshof plaasvind.
Die paneellede vir die onderhoude is reeds vasgestel en sal bestaan uit vyf lede van die Regterlike Dienskommissie. Dit sluit in hoofregter Peter Shivute, regterpresident Petrus Damaseb, die prokureur-generaal Festus Mbandeka, en twee lede van die regsgemeenskap, naamlik adv. Sakeus Akweenda en Elias Shikongo.
“Die Regterlike Dienskommissie het by ’n vergadering op 15 September besluit om die regulasies te wysig ingevolge die bepalings van Artikel 85(3) van die Namibiese Grondwet, om opdrag te gee dat onderhoude van genomineerde kandidate vir geregtelike ampte in die openbaar gevoer moet word,” het die kommissie se hoofwoordvoerder, Delila Salatiel, aan Republikein gesê.
CHRISTIAAN
Philanda Christiaan was Namibië se hooflanddros voordat sy in September vanjaar as waarnemende regter van die hoërhof aangestel is. Haar termyn verstryk egter op 9 Desember vanjaar.
Sy het in 2016 ook as waarnemende regter gedien. Christiaan is sedert 2007 ’n landdros en was voorheen in Keetmanshoop en in 2019 is sy as die hooflanddros in die kantoor van die regbank aangestel.
Sy het haar regsgraad in 2004 aan die Universiteit van Namibië (Unam) verwerf.
MAKANDO
Advokaat S.S. Makando is ’n regspraktisyn van die hoërhof en hooggeregshowe van Namibië en praktiseer sedert 1994.
Hy was vanaf Desember 1993 tot Julie 1994 ’n staatsaanklaer en ná sy toelating in Augustus 1994 het hy as ’n advokaat in die kantoor van die aanklaer-generaal gewerk.
Vanaf 1995 tot 1998 het Makando as regsadviseur vir die weermag en die ministerie van verdediging gedien en is later aangestel as die hoof van die raadgewende afdeling van die ministerie van verdediging en al die vleuels van die militêre instelling.
Makando het ook in 2005 deeltyds as dosent by Unam se opleidingsentrum met betrekking tot strafreg en hofpraktyke gewerk. Hy is sedert Maart 2016 die eienaar van Adv. S.S. Makando Chambers.
DE JAGER
Beatrix de Jager is by die Namlex Chambers en is ’n lid van die Vereniging van Advokate van Namibië. Die vereniging het ten doel om die belange van advokate te handhaaf en alle sake te hanteer wat die regsberoep in Namibië raak en om – indien nodig – met die nodige kundigheid op te tree.
De Jager het vanaf Maart 2003 tot Julie 2004 by die kantoor van die staatsprokureur haar klerkskap gedoen en is op 19 Julie 2004 as regspraktisyn toegelaat. Sy het as sodanig by die kantoor van die staatsprokureur gepraktiseer en het later by Kirsten & Co aangesluit tot November 2008.
De Jager spesialiseer in onder meer die administrasie van testamente en boedels, grondwetlike reg, menseregte, die Bankwet en arbitrasie.
‘PUBLIEK KAN NOU WEET’
Die prokureur Florian Beukes meen die verandering kan openbare vertroue in die regbank versterk.
“Dit is ’n groot stap vir die deursigtigheid van die regbank. Voorheen het die publiek nie geweet wie hierdie kandidate is nie, maar nou weet hulle wie die moontlike regters kan wees,” sê hy.
Beukes sê die publiek kan dan vir hulself sien op watter gronde regters aangestel word.
“Mense sal kan sien dat ons regters nie as gevolg van politieke motiewe aangestel word nie,” sê hy.
– [email protected]
Kommentaar
Republikein
Geen kommentaar is op hierdie artikel gelaat nie