LGBTQIA vier geskiedkundige uitspraak

“Ek hoop dat hierdie geskiedkundigde uitspraak ons sal toelaat om in die openbaar hande vas te hou, ons ander helftes aan ons families voor te stel en ons liefde in die openbaar te kan vier. Ek hoop dat mense kan begin droom van ’n liefde wat nie ’n misdaad is nie.”

Dit het die LGBTQIA -aktivis, Friedel Dausab, Vrydag tydens ’n mediaverklaring gesê nadat sy grondwetlike uitdaging teen sodomiewette geslaag het.

Dausab het aangevoer dat die betrokke wette, konsensuele, selfdegeslag seksuele dade tussen volwasse mans in privaatheid kriminaliseer.

Die hoërhof in Windhoek het die gemeenregtelike misdryf van sodomie en onnatuurlike seksuele misdrywe as ongrondwetlik en ongeldig verklaar.

Toni Hancox, die direktuer van die LAC, het Dausab se dapperheid geprys, maar ook gesê sy hoop dat mense die hof se uitspraak sal respekteer.

Uno Katjipuka van die Nixon Marcus Public Law Office het ook hierdie punt geopper. “Mens kan net hoop ons regering (uitvoerende en wetgewende gesag) respekteer ons grondwetlike waardes van gelykheid en waardigheid vir almal, genoeg om dit so te laat (let it be).”

Linda Baumann, ’n bekende feminis en genderaktivis van die Namibië Diverse Vrouevereniging (NDWA), het ook aan Republikein gesê dat dié uitspraak ’n rede is vir feesviering, maar sy het ook daarop gewys dat daar steeds baie groepe is wat teen die LGBTQIA -gemeenskap is en dat lede hul veiligheid in gedagte moet hou.

GEMEENSKAP VERHEUG

’n Groot groep lede en ondersteuners van die LGBTQIA -gemeenskap het Vrydag buite die hof saamgedrom en was verheug toe die uitspraak gelewer is.

“My hart is bly. Ek is so dankbaar dat ons op die regte kant van geskiedenis is vandag en vorentoe! Die trane in my gay kollegas en vriende se oë, die blydskap en verligting is massief!” het Lize Ehlers, die mede-uitvoerede hoof van Drag Night Namibia, Vrydag aan Republikein gesê.

“Omdat ek al 20 jaar in hierdie gemeenskap is, kan ek nie ophou om hardop te skree en te sê dat ek trots is om 'n lesbiese vrou te wees nie,” het Baumann gesê.

Die hoof van internasionale betrekkinge by OUT&PROUD Namibia, Tony McPherson, het die uithouvermoë en veggees van die Namibiese LGBTQIA -gemeenskap geprys in ’n verklaring wat Vrydag uitgereik is.

MENSWAARDIGHEID EN GELYKHEID

Dausab het in sy aansoek aangevoer dat die wette inbraak maak op persone se grondwetlike regte tot menswaardigheid, gelykheid en privaatheid asook die regte tot vryheid van uitdrukking en vryheid van assosiasie.

“Ek glo dat die uitspraak 'n oorwinning vir almal in Namibië is omdat dit gebaseer is op die idee dat die grondwetlike regte aan alle individue in Namibië behoort. Dit is dus 'n oorwinning, nie net vir die LGBTQ-gemeenskap, maar vir die Namibiese grondwet wat daar is om ons almal te beskerm,” het Dianne Hubbard aan Republikein gesê. Hubbard was vir meer as 30 jaar die koördineerder van die Gender Research & Advocacy Project by die Regshulpsentrum (LAC).

Florence /Khaxas, die uitvoerende direkteur van die Y-Fem Namibia Trust meen dat ‘n nuwe tyd vir Namibië aangebreek het.

“Namibiese burgers word vryheid van diskriminasie gewaarborg en om met waardigheid en gelykheid behandel te word soos verskans in die grondwet.”

UITSPRAAK

Die uitspraak is deur drie regters van die hoërhof gelewer – Nate Ndauendapo, Shafimane Ueitele en Claudia Claasen.

“Die differensiasie wat die wette aan homoseksuele mans verleen, kom neer op onbillike diskriminasie en is dus ongrondwetlik,” lui die uitspraak.

Die regters het verder bevind dat die die kriminalisering van anale seksuele omgang tussen instemmende volwasse mans, in privaatheid, nie regverdigbaar is in 'n demokratiese samelewing nie.

Die hof het ingevolge beveel dat die misdaad van sodomie in die strafproseswet, die immigrasiebeheerwet en die wet op verdediging ongrondwetlik en ongeldig verklaar word.

Die menseregte-prokureur, Norman Tjombe, meen dat dit te verwagte was dat die hof die kriminele verbintenis tot konsensuele seksuele aktiwiteit ongrondwetlik sou verklaar.

“Veral met inagneming van die onlangse uitsprake in beide die hoërhof en hooggeregshof.”

Die regters het verder beslis dat die staat die applikant (Dausab) se regskoste moet betaal.

Baumann meen dat die kostebevel spreek tot die “belangrikheid van hierdie saak en die handhawing van die menseregte van alle burgers, ongeag hul seksuele oriëntasie”.

MEERDERHEIDSMENING

Die saak is teen die ministerie van justisie, verdediging en binnnelandse sake, immigrasie, veiligheid en sekuriteit aanhangig gemaak, asook die aanklaer-generaal en prokureur-generaal. Een van die gronde waarop hulle die aansoek teengestaan het, was dat die meerderheid van die samelewing sodomie as onaanvaarbaar beskou.

“Wat 'n belangrike les van die howe is, is dat menseregte deur die grondwet beskerm word, en nie onderhewig is aan meerderheidsmening van lede van die publiek nie, ongeag hoe kragtig en luidrugtig dit is,” het Tjombe gesê.

/Khaxas meen dat hierdie ’n toonaangewende uitspraak was, veral ten opsigte van ander Afrikalande.

“In Afrika word mense geteister, gearresteer, gevange geneem en selfs vermoor weens hul seksuele oriëntasie en geslagsidentiteit. Hierdie geweld word geregverdig deur beleide en wette wat konsensuele gedrag kriminaliseer, maar vandag wys Namibië, die land van die dapperes, vir Afrika om menseregte vir almal te beskerm,” meen hy.

– [email protected]