Lichtenstrasser sê hy is afgepers

“As ek skuldig was sou die aanbod aanloklik gewees het,” het die dubbele moordbeskuldigde, mnr. Ernst Lichtenstrasser, glo aan adjudant-offisier Lodewyk van Graan gesê toe Van Graan hom na bewering ’n tweede keer aangeraai het om skuld te erken. Lichtenstrasser het Maandag tydens ’n binneverhoor die getuienisbank ingeneem om te beslis of ’n opname waarin hy glo skuld erken, toelaatbaar is.Hy het getuig hy het ná sy inhegtenisneming op 16 April 2019 geweier om polisiebeamptes se vrae te beantwoord. Hy het glo ook verskeie kere vir ’n regsverteenwoordiger gevra.Volgens hom het Van Graan elke keer dié versoek van die hand gewys aangesien hy nog nie amptelik aangekla was nie.Lichtenstrasser se getuienis is in teenstelling met dié van vorige getuies wat aan die hof gesê het Lichtenstrasser het glo aangedui dat hy nie ’n regsverteenwoordiger wou hê nie. Hy sê ook sy hongerstaking tydens sy aanhouding by die Walvisbaai se sentrale polisieselle het glo begin weens die feit dat hy toegang tot ’n dokter en prokureur geweier is.Lichtenstrasser beweer die polisie het gesê as hy skuld erken, sal die landdros ’n regsverteenwoordiger vir hom aanwys.Hy het ook erken dat hy sersant Matheo Mulauli, ’n staatsgetuie wat vroeër getuig het, gevra het om hom te skiet.Volgens hom het Malauli se telefoon gelui en die gesprek is onderbreek.Ná die oproep het Mulauli glo vir Lichtenstrasser gesê hulle moet na die Namibiese polisie se eenheid vir ernstige misdaad gaan.Dit is glo by dié eenheid waar Van Graan aan Lichtenstrasser gesê het dat hy of sy vrou in boeie na die polisiekantoor sou bring, of hy erken skuld op die moord.Lichtenstrasser het getuig hy het daarna skuld erken voor hy na die landdroshof op Swakopmund geneem is. Volgens Lichtenstrasser se getuienis is hy ingelig dat die landdros sy skulderkenning op skrif sou sit, maar hy het ontken dat hy aan dié landdros skuld erken het. Die landdros het hom glo toegelaat om sy prokureur te kontak. SAAK VERTRAAGDie binneverhoor is gister onderbreek nadat Lichtenstrasser se regsverteenwoordiger, mnr. Albert Titus, die hof vir uitstel gevra het.Titus het gesê hulle het ’n verslag van Lichtenstrasser se persoonlike sielkundige aangevra en hulle sou dit na verwagting gister omstreeks 13:00 ontvang het. Titus het regter Christie Liebenberg gevra of die saak uitgestel kan word tot vandag om vir hom en die staat geleentheid te gee om deur die verslag te gaan.“Ek sal ook met my kliënt wil beraadslaag om te besluit of ons tydens die binneverhoor die verslag sal gebruik,” het Titus gesê.Die staatsaanklaer Antonia Verhoef het ook aangedui indien die verdediging van die verslag gebruik gaan maak, sal sy die verslag tydens kruisondervraging benodig.Liebenberg het die versoek toegestaan en die saak sal vandag voortgaan.Die 66-jarige Lichtenstrasser staan tereg op die moord van die Namibië Instituut vir Mynbou en Tegnologie (Nimt) se uitvoerende direkteur, mnr. Eckhart Mueller (72), en sy adjunk, mnr. Heimo Hellwig (60) in 2019 op Arandis. – republikein@republikein.com.na

Lichtenstrasser sê hy is afgepers

Kommentaar

Republikein 2025-04-07

Meld asseblief aan om kommentaar te lewer

Lichtenstrasser sê hy is afgepers

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie