Likwidateurs: Waar is die diamante?

Jemima Beukes – ’n Regstryd oor diamante van 2 700 karaat ter waarde van N$14 miljoen, sloer voort met geen einde in sig nie.

Die saak – gebring deur die likwidateurs David Bruni en Ian McLaren en waarby die inspekteur-generaal van die Namibiese polisie (Nampol), die minister van binnelandse sake, immigrasie, veiligheid en sekuriteit, die minister van myne en energie en die diamantkommissaris betrokke is – was gister weer voor die hoërhof in Windhoek vir sakebestuur.

In hofdokumente wat verlede jaar ingedien is, sê die verweerders die regstappe teen hulle is “sonder enige voorafgeskrewe waarskuwing” ingestel, terwyl die kennisgewings net op die aanlyn regstelsel geliasseer is en nie aan hulle beteken is nie.

“Sou [Bruni en McLaren] die kennisgewing bedien het, sou hulle dalk geweet het die pakkies diamante – waarvoor hulle ’n hofbevel soek vir die kantoor van die inspekteur-generaal om dit terug te gee – is die onderwerp van misdaadondersoeke vir verskeie oortredings en dat daar hangende strafregtelike verrigtinge is,” lui die dokumente.

Volgens die hofdokumente is die diamante in die sorg van die Namibiese polisie ná ’n likwidasie geplaas. Bruni en Mclaren het die polisie nou hof toe gesleep omdat die diamante, ten spyte van verskeie versoeke, nog nie oorhandig is nie.

In 2008 het die maatskappy Bret Investments (Pty) Ltd ingevolge ’n hoërhofbevel likwidasie in die gesig gestaar. In 2010 is McLaren en Bruni as gesamentlike likwidateurs aangewys met die opdrag om toesig te hou oor die maatskappy se bates en laste.

Volgens die hofdokumente was die betrokke diamante nie deel van die gewone bates nie. Ná ’n regsdispuut het die hof beveel die diamante moet onder die toesig van die polisie se eenheid vir beskermde hulpbronne geplaas word totdat die regskwessie afgehandel is.

As deel van die skikking in Julie 2018 het die minister van myne en energie na bewering die groen lig aan McLaren en Bruni gegee om permitte van die diamantkommissaris te ontvang wat hulle toelaat om weer besit van die diamante te neem.

Hul pogings om die diamante terug te kry, is na bewering met weerstand begroet en ten spyte van die likwidateurs se wetlike aanspraak op die diamante, weier die inspekteur-generaal glo om dit te oorhandig.

“Nieteenstaande die gebrek aan enige verdere grondslag om die diamante te hou, het die kantoor van die inspekteur-generaal onregmatig versuim en/of geweier om die diamante ter sprake te oorhandig toe dit versoek en aangevra is en waarop die eisers geregtig was.

“Die inspekteur-generaal het ons onregmatig gefrustreer in die uitvoer van ons mandaat as gesamentlike likwidateurs. Die obstruksie het beduidende gevolge gehad. Die permitte, met ’n vaste geldigheidstydperk, het in Januarie 2019 verval. Die inspekteur-generaal se kantoor bly in besit van die 2 700,45 karaat diamante met ’n redelike markwaarde van nie minder nie as N$14 miljoen,” lui hul verklaring.

Die regering se regsverteenwoordigers vir die inspekteur-generaal, die ministeries van binnelandse sake asook myne en die diamantkommissaris, sê egter die likwidateurs het die kennisgewings net op die elektroniese regstelsel gelaai en nooit die kennisgewings en eise aan hulle beteken nie.

“Hierdie versuim is gewortel in die feit dat die noodsaaklike skriftelike kennisgewing, soos bepaal in artikel 39(1), nooit beteken of ontvang is deur die inspekteur-generaal se kantoor en/of die ministerie van binnelandse sake, veiligheid en sekuriteit nie. Verder is daar geen aanduiding dat die ministerie van binnelandse sake, veiligheid en sekuriteit afstand gedoen het van die voldoening aan die bepalings van hierdie spesifieke subartikel nie.”

– [email protected]