Mans-saak uitgegooi

“Ons het net gehoop op ’n regverdige verhoor, al het hy met ’n boete weggestap, ons wou net hê geregtigheid moet geskied.”

So het Sarie Mans, die weduwee van die oudrugbykaptein en bekende fietsryer, Gerhard Mans sr., gister gesê nadat die verhoor van Jafet Paulus, wat na bewering haar man doodgery het, van die Katutura-landdroshof se rol geskrap is.

Mans is in Mei 2022 dood in ’n ongeluk op die westelike verbypad waar hy en sy seun Gerhard jr. fietsgery het. Volgens die aanvanklike inligting oor die ongelukstoneel het Paulus Mans glo met sy BMW-sedanvoertuig getref.

Die staat het aangevoer Paulus was op sy selfoon terwyl hy bestuur het.

“Dit was nie vir ons ’n ongeluk nie,” sê Sarie, wat verduidelik haar familie voel die staat het hulle in die steek gelaat.

“Daar was net niks van die staat se kant af nie.

“Iemand is van hul lewe ontneem, jy moet dit darem aan jou bas voel,” het sy gesê.

“Hierdie is nie die enigste geval waar die staat mense so in die steek laat nie en dit is seker ook hoekom mense so sloer, want hulle weet hulle kan daarmee wegkom,” het Sarie bygevoeg.

Die Mans-familie se regsverteenwoordiger, Francois Erasmus, verduidelik dat die saak geskrap is weens die feit dat die klerk wat vir die aanklaer ingestaan het nie aan landdros Wilka Amalwa kon bewys dat enige getuies gedagvaar is om te getuig nie.

Dit ondanks die feit dat die verhoor in Oktober verlede jaar met byna ’n jaar uitgestel is.

“Watter regverdige rede kan jy gee dat jy na ’n jaar nie die getuies gesubpoena het nie?

“Hulle het die getuies se adresse, dit is ’n eenvoudige proses – dit is ’n dokument. Een van die getuies wat die ongeluk gesien het se adres en selfoonnommer is daar – jy moet hom net bel,” sê Erasmus.

Hy meen daar is nie genoegsame kapasiteit in die staat om voldoende aandag aan alle strafsake te gee nie.

“Dit is ’n baie onbevredigende en ontoereikende proses,” het hy gesê.

Erasmus het bevestig dat Paulus gisteroggend in die landdroshof siviel gedagvaar is vir die verlies wat Sarie na die ongeluk gely het.

“Hy het blykbaar geweier om dit te teken, maar die balju het glo die dokumente by sy voete neergesit en hom ingelig dat hy gedagvaar is,” sê Erasmus.

Hy glo dat hulle weer ’n strafsaak teen Paulus aanhangig sal maak wanneer die staat sy huis in orde het.

“Dit is nie net Sarie Mans nie. Daar is soveel ander mense wat ook deur die stelsel gefaal word,” het Erasmus gesê.

Mans sr. se dood het ’n leemte in sportkringe gelaat waar hy gedurende sy leeftyd aktief betrokke was by fietsry en rugby.

‘BAIE HARTSEER’

Ingrid van Wyk Scholtz is ook op 15 November 2019 tragies op die westelike verbypad in 'n tref-en-trap-ongeluk dood en voor dit is die Olimpiese fietsryer Michelle Vorster ernstig in ’n ongeluk in April 2019 beseer.

Die verhoor van Paulus Kambata het in September verlede jaar in verband met Van Wyk Scholtz se dood begin.

Mannie Heymans van Mannie's Bike Mecca het die gebeure rondom Mans se verhoor as “baie hartseer” beskryf.

“Vir my is dit nie maklik nie. Ek verstaan nie die wet nie en ek verstaan nie hoe so iets kan gebeur nie,” het hy gesê.

“Dit voel asof ons [fietsryers] nêrens meer toegelaat word nie, wat nie waar is nie. . . Motoriste dink nie daar is plek vir fietsryers op ons paaie nie en as hulle sien dat niks gaan gebeur nie, dan sal hulle hul nie meer bekommer oor die lewens van fietsryers nie,” het Heymans gesê.

Hy waarsku dat fietsryers veiligheid in gedagte moet hou.

“Daar is gevalle waar fietsryers verkeerd is. Ingrid was nie verkeerd nie en Gerhard was nie verkeerd nie, maar fietsryers moet onthou dat hulle kwesbaar is, en dit maak nie saak of jy reg of verkeerd was wanneer iets met jou gebeur nie,” het hy gesê.

– [email protected]