Ministerie verloor sy appèl teen wyle Naomab

Die ministerie van binnelandse sake, immigrasie, veiligheid en sekuriteit se appèlaansoek teen wyle Gregorey Naomab is van die hooggeregshof se rol geskrap. Die ministerie het die hooggeregshof genader nadat die hoërhof op 31 Maart 2022 bevind het dat Naomab, wat haweloos was, onregmatig in hegtenis geneem is. Hoofregter Peter Shivute, appèlregter Dave Smuts en waarnemende appèlregter Esi Schimming-Chase het bevind dat die ministerie nie op kondonasie geregtig is nie. Die ministerie se regsverteenwoordiger het ’n aansoek om kondonasie ingedien nadat die hofrekords van verrigtinge in die hoërhof nie binne drie maande van die hoërhof se uitspraak, op rekord geplaas is nie.Naomab is dae ná die hoërhofuitspraak, en selfs voor die redes vir die uitspraak bekend gemaak is, dood. Regter George Coleman het in 2022 die ministerie beveel om ’n onbekende bedrag in skadevergoeding aan Naomab te betaal en om sy regskostes te dek. Naomab het die hof gevra om nie die bedrag openbaar te maak nie aangesien hy kwesbaar was omdat hy op straat gebly het. Coleman het beslis dat Naomab se inhegtenisneming en aanhouding vanaf 27 Februarie 2019 tot 1 Maart 2019 onwettig was. Naomab het destyds in sy verklarings aan die hoërhof beweer sy aanhouding in Swakopmund het hom nie net van sy vryheid ontneem nie, maar dat dit hom ook emosionele stres en sielkundige trauma veroorsaak het.VERTRAGINGSDie voorsittende regters in die appèlaansoek het bevind dat die ministerie se regsverteenwoordiger onnodig gesloer het om die volledige rekords aan die hof te verskaf. Nadat Coleman die hoërhof se uitspraak op 31 Maart 2022 gelewer het, is appèl op 20 April daardie selfde jaar aangeteken. Die hofreëls bepaal dat die appellant die rekord vir appèl binne drie maande aan die hof moet verskaf. Die kworum het bepaal dat die ministerie se regsverteenwoordiger versuim het om die appèlproses binne ’n redelike tydperk te inisieer. Hofreëls stipuleer ook dat die twee partye binne 20 dae vandat ’n appèl aangeteken is, moet vergader om onnodige hofrekords uit te skakel. Die ministerie se regsverteenwoordiger het 21 dae na hierdie periode verstryk het die eerste pogings aangewend om ’n vergadering met Naomab se verteenwoordigers te skeduleer. Naomab se regsverteenwoordiger is ook oor die vingers getik aangesien hy nie pogings aangewend het om dié ontmoeting binne die voorgeskrewe tydperk te fasiliteer nie. Die bedrag wat die ministerie aan Naomab moes betaal sal deel vorm van sy boedel waaruit sy naasbestaandes sal voordeel trek. – irene@republikein.com.na

Ministerie verloor sy appèl teen wyle Naomab

Kommentaar

Republikein 2025-04-04

Meld asseblief aan om kommentaar te lewer

Ministerie verloor sy appèl teen wyle Naomab

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie