N$30 m.-bedrogsaga kring dalk wyer uit

Aanklaers verwag nog inhegtenisnemings benewens vyf mense wat na bewering ’n plaaslike vismaatskappy bedrieg het onder die dekmantel dat hulle ’n opleidingsinstituut ter waarde van sowat N$30 miljoen finansier.Vier van die vyf beskuldigdes het gister hul eerste verskyning in die Walvisbaai-landdroshof gemaak. Die vyfde persoon is by Ondangwa in hegtenis geneem, waar sy haar eerste verskyning gemaak het voordat sy na Walvisbaai oorgeplaas is.Victoria George (34), Abisai Ndeunjema (34), Cecilia Nakale (52) en Elizabeth Shikongo (30) het ingevolge die wet op die voorkoming van georganiseerde misdaad (Poca) verskyn op aanklagte van onder meer bedrog, vervalsing en geldwassery.Daar word beweer dat die beskuldigdes lenings van altesaam N$29,9 miljoen verkry het vir ’n verpleegskool wat in 2022 gestig is en nog nie by die Namibiese Kwalifikasieowerheid (NQA) geregistreer is nie. Die lenings is van ’n plaaslike vismaatskappy verseker. Ondersoeke deur die Namibiese polisie het na bewering aan die lig gebring dat die geld vir persoonlike uitgawes gebruik is, insluitend die aankoop van ’n huis in Windhoek ten bedrae van sowat N$1,7 miljoen, asook luukse voertuie.Die vier beskuldigdes is nie borgtog toegestaan nie.ERNS Die staatsaanklaer, Maggy Shiyagaya, het gister borgtog voor landdros Vicky Nicolaidis teengestaan op grond van die feit dat ondersoeke nog nie afgehandel is nie.“Ander verdagtes kan nog aangekla word. Die staat staan ook borgtog teen op grond van die erns van die bewering dat hulle die klaer met ’n bedrag van N$29,9 miljoen bedrieg het,” het sy gesê.Shiyagaya het bygevoeg dat daar ook ’n vrees bestaan dat twee van die beskuldigdes, George en Ndeunjema, kan vlug.“Boonop is dit nie in die belang van die publiek of regspleging dat die beskuldigde borgtog kry nie,” het sy aangevoer.Die beskuldigdes sal weer op 11 en 12 Maart in die hof verskyn wanneer hul formele aansoek om borgtog aangehoor sal word.HOFDATUMSDie beskuldigdes se prokureur Kadhila Amoomo, het gister gesê hy sal dit sterk teenstaan as die staat poog om die hofdatums vir die formele borgtogaansoek te skuif of as hulle versoek dat dit uitgestel word.“Dit is twee weke van nou af, wat die staat genoeg tyd gee om sy huis in orde te kry. Tweedens is beskuldigde Victoria George vyf maande swanger, wat die dringendheid van die borgtogaansoek in belang van die ongebore kind beklemtoon,” het hy gesê en bygevoeg dat een van die ander beskuldigdes, Nakale, aan hoë bloeddruk ly.Die plaaslike polisie het bevestig dat hulle steeds die saak ondersoek. “Ons is nie bereid om nou verdere besonderhede te deel nie,” het hoofinspekteur Illeni Shapumba gesê.MEDIABERIGTEAmoomo het ook aangevoer dat onlangse mediaberigte wat gisTer verskyn het, kommer wek aangesien die berig besonderhede oor die saak bevat het, voordat sy kliënte nog in die hof verskyn het. Hy meen dit kan sy kliënte se reg tot ’n regverdige verhoor beïnvloed het.“Hulle het berig asof ’n getuie getuig het en bewerings gemaak oor hoe die geld bestee is en die beweerde diefstal van N$30 miljoen. Dit is belangrik dat die staat en media waak teen die sensasie van mediaberigte.”Amoomo het met die media gepraat nadat die hof verdaag het en bygevoeg dat die beskuldigdes die reg het om onskuldig geag te word totdat hulle skuldig bevind word al dan nie.“Ons het ’n probleem met mediahuise wat sensasie soek. Dit is onregverdig teenoor die beskuldigdes. Dit is baie belangrik vir die media om ’n professionele afstand te hou sodat ons kan verseker dat beskuldigdes ’n regverdige verhoor het. Laat die howe hul werk doen.“Laat ons nie stories sensasioneel maak selfs voordat beskuldigdes in die hof verskyn het nie. Ons dink nie dat dit eties is nie. Ons dink ook nie dit is grondwetlik in terme van Artikel 12 van die Namibiese Grondwet nie.”– republikein@republikein.com.na

N$30 m.-bedrogsaga kring dalk wyer uit

Kommentaar

Republikein 2025-03-28

Meld asseblief aan om kommentaar te lewer

N$30 m.-bedrogsaga kring dalk wyer uit

Kommentaar

Republikein 2025-03-28

Meld asseblief aan om kommentaar te lewer

MELD AAN

Advertensie