NWR en Sun Karros in regstryd verstrik

Sun Karros Lifestyle Safaris dagvaar Namibia Wildlife Resorts (NWR) vir meer as N$1 miljoen vir fasiliteite wat eersgenoemde glo gebou het, maar nooit ten volle betaal is nie.

Volgens Sun Karros se verteenwoordiger, mnr. Kobus Struwig, se beëdigde verklaring het hulle op 15 September 2015 ’n ooreenkoms met die NWR se destydse voorsitter, me. Zelna Hengari, aangegaan vir die bou van die ablusiegeriewe, ontvangsarea, kroeg en restaurant van Hobas Lodge.

“Die eiser het sy verpligtinge in terme van die ooreenkoms nagekom en die projek is in April 2017 voltooi.

“Die verweerder het die bepalings van die ooreenkoms oortree deur nie die oorblywende balans van N$1 059 310 te betaal nie,” lui Sun Karros se hofstukke.

Volgens Struwig het Sun Karros die projek, met ’n waarde van sowat N$8.9 miljoen, voltooi en gebruik hulle tans die fasiliteite.

AANSOEK OM VERJARING

NWR het ’n aansoek van verjaring by hoërhof ingedien en beweer dat die beweerde skuld glo gedurende Junie 2016 verskuldig en betaalbaar sou wees.

“Die eiser het op 27 Maart 2020 die aksie ingestel – ongeveer vier jaar nadat die verweerder se beweerde skuld ontstaan het.

“Derhalwe het die eiser se eis teen die verweerder verjaar en het dit verval,” lui NWR se pleitstukke.

Struwig beweer egter dat NWR in April 2017 nog betalings aan Sun Karros gemaak het en dit bewys hul erkenning van skuld op daardie tydstip.

Die NWR ontken ook dat hy aan Sun Karros geld skuld en beweer dat hy die volle bedrag betaal het.

Die partye het op 16 September 2020 vir bemiddeling ontmoet, maar dié was onsuksesvol. Hulle het gister vir voorverhoorverrigtinge voor regter Marlene Tommasi in die hoërhof in Windhoek verskyn.

HENGARI-REGSTRYD: UITSPRAAK IN JULIE

Dit was juis ’n ooreenkoms tussen NWR se Hengari en Sun Karros wat tot Hengari se skorsing as voorsitter in 2019 gelei het en verder aanleiding gegee het tot ’n hofsaak wat Hengari teen die NWR aanhangig vir beweerde naamskending gemaak het. Dié hofsaak is steeds in die hoërhof in Windhoek aan die gang.

Die NWR beweer dat Hengari buite haar magte en sonder die goedkeuring van NWR se direksie en die ministerie van omgewing, toerisme en bosbou opgetree het toe sy ’n openbare-private-vennootskap met Sun Karros gekontrakteer het.

Sun Karros het glo 20 luukse tente, ’n swembad, ’n restaurant en tien kampplekke ter waarde van N$43 miljoen op NWR se Sesriem-kampeerterrein gebou.

Hengari beweer die direksie het die vennootskap goedgekeur en eis N$7,5 miljoen in skadevergoeding vir ’n mediaverklaring wat die NWR op 5 April 2018 uitgereik het, waarin volgens haar wanvoorstellings en onakkurate inligting oorgedra is wat haar naam en reputasie geskend het.

Sy voer aan die mediaverklaring, waaroor verskeie Namibiese koerante berig het, het haar as ’n oneerlike en onprofessionele mens geskets wat in onwettige aktiwiteite betrokke was.

Die NWR ontken dat die verklaring enige onakkurate inligting bevat het en beweer hulle is ’n kommersiële onderneming wat deur die staat besit word en daarom het die publiek die reg tot die inligting in die verklaring.

Uitspraak in hierdie saak sal op 29 Julie gelewer word.

– [email protected]