Ons is lief vir ons diere, sê Goosen
Die siviele hofsaak teen die Grootfontein-boer wat die opgeleide spoorsnyhond, Troy, verlede maand op sy plaas geskiet het, is Dinsdag teruggetrek.
Voor die saak egter teruggetrek is, het Willem Goosen ’n verklaring by die hof ingedien waarin hy sy dade probeer verduidelik, asook volhou dat hy binne die wet opgetree het.
“Hierdie voorval sou nie plaasgevind het as ek ingelig is dat die hanteerders my plaas wou betree met die doel om gesteelde items op te spoor nie. As ek dit geweet het, sou ek gehelp het.”
Goosen stel in sy verklaring dat hy volgens die wet toegelaat word om ’n hond te skiet wat sy plaas sonder toestemming betree en meen dat ander boere dit ook doen.
Die hofaansoek is op 25 April by die hoërhof in Windhoek aanhangig gemaak en is gebring op ’n dringende basis. In die aansoek het Rainy Day Investments – die maatskappy vir wie die hanteerder en Troy gewerk het – die hof versoek om beslag te lê op al Goosen se wapens en die diere op sy plaas.
In hofstukke het hulle aangevoer dat Goosen diere mishandel en ’n aggressiewe persoon is.
Volgens ’n betroubare bron is die saak teruggetrek aangesien die polisie ingestem het om Goosen te ondersoek op grond van die strafregtelike bewerings teen hom.
Goosen is ’n 54-jarige boer en vragmotorbestuurder en is getroud met vier kinders.
“Nie my vrou of ek mishandel diere nie. Ons is gewone boere wat lief is vir ons diere en die plaaslewe.”
Goosen meen dat hy en sy vrou baie hard werk om ’n bestaan vir hulself te maak, ten spyte van die misdaad in hul omgewing.
Hy verduidelik in sy verklaring dat hul plaas sowat 1,2 km van ’n informele nedersetting geleë is en dat baie mense wat daar woon, volgens hom, werkloos en desperaat is om te oorleef.
“Stropery en onwettige jag is ’n ernstige probleem in die Grootfontein-omgewing. Die meeste van die stropers jag met honde,” het Goosen in sy verklaring gesê.
“Ek skiet nie onoordeelkundig op mense nie en mishandel ook nie diere nie. Ek sal nooit ’n vuurwapen in die rigting van ’n mens rig nie. Ek sal by geleentheid ’n waarskuwingskoot afvuur indien nodig om stropers af te skrik.”
Goosen beweer in sy verklaring dat Troy se eienaars en die stigters van die Justice for Animals-organisasie hom geteister het.
“Hulle het voor en tydens hierdie aansoek hulself op ’n wraaksugtige wyse gedra wat uitsluitlik daarop gemik was om my en my gesin te teister, te irriteer en te frustreer.
“Hulle het gepoog om soveel skade as moontlik aan my waardigheid en my reputasie te berokken, nie op grond van enige wetlik herkenbare reg nie, maar eerder om slegs hul onderdanige, irrasionele en onredelike ywer te dien,” lui Goosen se verklaring.
– [email protected]
Voor die saak egter teruggetrek is, het Willem Goosen ’n verklaring by die hof ingedien waarin hy sy dade probeer verduidelik, asook volhou dat hy binne die wet opgetree het.
“Hierdie voorval sou nie plaasgevind het as ek ingelig is dat die hanteerders my plaas wou betree met die doel om gesteelde items op te spoor nie. As ek dit geweet het, sou ek gehelp het.”
Goosen stel in sy verklaring dat hy volgens die wet toegelaat word om ’n hond te skiet wat sy plaas sonder toestemming betree en meen dat ander boere dit ook doen.
Die hofaansoek is op 25 April by die hoërhof in Windhoek aanhangig gemaak en is gebring op ’n dringende basis. In die aansoek het Rainy Day Investments – die maatskappy vir wie die hanteerder en Troy gewerk het – die hof versoek om beslag te lê op al Goosen se wapens en die diere op sy plaas.
In hofstukke het hulle aangevoer dat Goosen diere mishandel en ’n aggressiewe persoon is.
Volgens ’n betroubare bron is die saak teruggetrek aangesien die polisie ingestem het om Goosen te ondersoek op grond van die strafregtelike bewerings teen hom.
Goosen is ’n 54-jarige boer en vragmotorbestuurder en is getroud met vier kinders.
“Nie my vrou of ek mishandel diere nie. Ons is gewone boere wat lief is vir ons diere en die plaaslewe.”
Goosen meen dat hy en sy vrou baie hard werk om ’n bestaan vir hulself te maak, ten spyte van die misdaad in hul omgewing.
Hy verduidelik in sy verklaring dat hul plaas sowat 1,2 km van ’n informele nedersetting geleë is en dat baie mense wat daar woon, volgens hom, werkloos en desperaat is om te oorleef.
“Stropery en onwettige jag is ’n ernstige probleem in die Grootfontein-omgewing. Die meeste van die stropers jag met honde,” het Goosen in sy verklaring gesê.
“Ek skiet nie onoordeelkundig op mense nie en mishandel ook nie diere nie. Ek sal nooit ’n vuurwapen in die rigting van ’n mens rig nie. Ek sal by geleentheid ’n waarskuwingskoot afvuur indien nodig om stropers af te skrik.”
Goosen beweer in sy verklaring dat Troy se eienaars en die stigters van die Justice for Animals-organisasie hom geteister het.
“Hulle het voor en tydens hierdie aansoek hulself op ’n wraaksugtige wyse gedra wat uitsluitlik daarop gemik was om my en my gesin te teister, te irriteer en te frustreer.
“Hulle het gepoog om soveel skade as moontlik aan my waardigheid en my reputasie te berokken, nie op grond van enige wetlik herkenbare reg nie, maar eerder om slegs hul onderdanige, irrasionele en onredelike ywer te dien,” lui Goosen se verklaring.
– [email protected]
Kommentaar
Republikein
Geen kommentaar is op hierdie artikel gelaat nie