Opgradering van kliniek ná sewe jaar ‘nog onbetaald’

Die direkteur van gesondheidstegnologie en infrastruktuurbestuur in die ministerie van gesondheid en maatskaplike dienste, Thomas Mbeeli – ’n sleutelgetuie in ’n saak wat in Maart vanjaar teen dié ministerie aanhangig gemaak is – ontken dat enige betalings uitstaande is vir die opgradering van ’n Zambezi-gebaseerde kliniek, wat reeds sewe jaar gelede voltooi is.

Thozo Construction CC, wat besit word deur Sitali Thozo, aan wie die gesondheidsministerie die tender toegeken het om die Muyako-kliniek in die Zambezistreek in Januarie 2010 op te gradeer, beweer dat die ministerie nog nie die volle betaling vereffen het nie.

In ’n getuieverklaring wat vroeg in Augustus gemaak is, het Mbeeli egter beweer dat die gesondheidsdirektoraat in die Zambezistreek die verkrygingsproses eiehandig bestuur het. Hy het gesê die ministerie se hoofkantoor was slegs betrokke by die goedkeuring van die tenderdokumente en die aanbevole tenderaar, soos deur die direktoraat aangedui is.

Daarbenewens het die ministerie na bewering verskeie konsultasiefirmas in ’n raadgewende kapasiteit aangestel vir die ontwikkeling en ontwerp van die kliniek, sowel as om toesig te hou oor die opgradering van die personeel se bestaande verblyf.



UITSTAANDE BETALINGS

Ná die voltooiing van die opgraderings, wat volgens die konstruksiemaatskappy in September 2017 was, het hulle na bewering in ’n later stadium opdrag ontvang om onder meer die konstruksie en opgradering van die kliniekpersoneel se verblyf verder te hanteer, ’n sonkraggeiser te installeer, die kombuis uit te brei, en ander gespesifiseerde take uit te voer.

Die bykomende mondelingse tenderooreenkoms het die ministerie na bewering toegelaat om ’n gedeelte van die betaling te weerhou totdat die werk tot hul bevrediging afgehandel is. Die oorblywende betaling sou aan Thozo gemaak word sodra die projek voltooi is en enige probleme binne ’n redelike tydsraamwerk uitgestryk is.

In wese beweer die konstruksiemaatskappy dat hy sy verpligtinge betyds en volgens die vereiste standaarde nagekom het. Die maatskappy het toe fakture aan die ministerie uitgereik vir betaling.

Mbeeli het gesê die projek om die personeel se verblyf op te knap het van Julie 2016 tot Desember 2017 geduur, met Thozo se maatskappy wat verantwoordelik was vir alle nodige toerusting en kundigheid.

Die totale kontrakbedrag is na bewering meer as N$2 miljoen. Hy het bygevoeg dat die ministerie onbewus was van enige uitstaande fakture toe hy die projek oorgeneem het.

“Alle waardasies en betalingssertifikate wat by die ministerie van gesondheid ingedien is, is verwerk volgens voorleggings van Gachiku Kamau Architects, die maatskappy van wie ons fakture ontvang het [een van die konsultasiefirmas wat deur die ministerie aangestel is].”



KONTRAKBREUK

In sy getuieverklaring beweer Thozo dat die ministerie hom meer as N$500 000 skuld.

Dié bedrag sluit onder meer in N$254 000 vir gespesialiseerde elektriese installasiewerk, N$86 604 wat steeds uitstaande is vir konstruksiewerk, N$48 000 vir die aankoop van toerusting wat nodig was vir elektriese werke, en N$199 000 wat as retensiegeld gehou word.

Thozo beweer hy het herhaaldelik probeer om die ministerie te kontak in verband met die uitstaande betalings, maar het geen hulp ontvang nie.

“Ek het talle wetlike eise vir betaling gemaak, insluitend e-posse in Julie 2018 en versoeke deur my regsadviseur in November 2019 en Maart 2023, maar geen betalings is ontvang nie.” – [email protected]