Plaaswerker sien ‘aanval’ op Brunhild
Riedel-saak hervat vandag
'n Forensiese mediese beampte wat die nadoodse ondersoek op Brunhild Reidel uitgevoer het, het gister die getuiebank ingeneem.
’n Plaaswerker het gister in die hoërhof in Windhoek getuig dat hy gesien het hoe die twee moordbeskuldigdes vir Brunhild Reidel gegryp en in die plaashuis gedwing het. Een was glo gewapen met ’n ysterpyp van 40 cm lank.
Michael Araeb, wat op Armin Siegfried Riedel (68) en sy vrou, Brunhild (66), se plaas gewerk het, het getuig hy het gesien hoe die beskuldigdes, Bernardus Afrikaner (38) en Salaphual Unaeb (47), die oorledene gegryp het terwyl sy skottelgoed voor die huis gewas het.
Brunhild het na bewering met hulle gestoei en haar probeer teësit.
Araeb het glo sowat 20 meter van waar die voorval gebeur het gestaan, maar haar egter nie te hulp gesnel nie.
Die Riedel-egpaar is in Januarie 2018 op die plaas Grünfeld in die Gobabis-omgewing vermoor en hul huis is daarna afgebrand met hulle liggame steeds binne-in. Afrikaner en Unaeb is sewe maande later in hegtenis geneem en hulle verhoor het Maandag begin met beide wat onskuldig gepleit het.
Die polisie het aanvanklik gedink die brand was weens ’n tragiese ongeluk tot die nadoodse ondersoek gewys het Armin is in die kop geskiet. Die dokter wat die nadoodse ondersoek op Armin uitgevoer het, dr. Simasiko Kabanje, het Maandag getuig dat daar geen roet in Armin se longe was nie, wat ’n aanduiding is dat hy reeds dood was voor die huis begin brand het.
Araeb het na die polisie toe gegaan en hulle van die voorval vertel. Volgens hom was Armin nie tuis toe die twee beskuldigdes vir Brunhild oorrompel het nie. Armin het na bewering eers later by die huis aangekom.
Die beskuldigdes het volgens Araeb se getuienis uit die huis gehardloop. Toe Armin egter die huis binnegegaan het, het die twee mans hom gevolg.
Araeb sê hy het net ’n week op die plaas gewerk voor die Riedel-egpaar dood is. Hy het vroeër die dag getuig dit was ’n gewone dag op die plaas voor die Riedels se huis afgebrand het.
OORSAAK VAN DOOD ONBEKEND
’n Forensiese mediese beampte wat die nadoodse ondersoek op Brunhild uitgevoer het, dr. Mamadi Garises, het ook gister getuig.
Volgens Garises se getuienis het die nadoodse ondersoek gewys sy het bloeding op haar brein gehad. Die oorsaak van haar dood kon egter nie met sekerheid bepaal word nie.
Garises het gesê die bloeding kon weens trauma wees wat deur ’n stomp voorwerp veroorsaak is of van die hitte van die vlamme wat die egpaar se huis verswelg het.
Sy het getuig Brunhild se liggaam was so erg verbrand dat sy nie meer organe gehad het nie. Haar skedel was glo in fragmente met net stukkies wat oorgebly het.
Garises het getuig dat twee ringe saam met die oorskot deel van die forensiese ondersoek gevorm het.
Sy kon glo nie bepaal of die ringe aan Brunhild se hand was nie omdat haar liggaam te erg verbrand het.
“Die ringe was saam met die roet gemeng,” het sy getuig.
VERHOOR DUUR VANDAG VOORT
Afrikaner en Unaeb staan tereg op twee klagtes van moord, twee klagtes van verkragting, diefstal met verswarende omstandighede, brandstigting en dwarsboming van die gereg.
Die verhoor sal na verwagting vandag voortduur met die afhandeling van Araeb se hoofgetuienis waarna die verdediging met kruisondervraging sal begin.
– [email protected]
Michael Araeb, wat op Armin Siegfried Riedel (68) en sy vrou, Brunhild (66), se plaas gewerk het, het getuig hy het gesien hoe die beskuldigdes, Bernardus Afrikaner (38) en Salaphual Unaeb (47), die oorledene gegryp het terwyl sy skottelgoed voor die huis gewas het.
Brunhild het na bewering met hulle gestoei en haar probeer teësit.
Araeb het glo sowat 20 meter van waar die voorval gebeur het gestaan, maar haar egter nie te hulp gesnel nie.
Die Riedel-egpaar is in Januarie 2018 op die plaas Grünfeld in die Gobabis-omgewing vermoor en hul huis is daarna afgebrand met hulle liggame steeds binne-in. Afrikaner en Unaeb is sewe maande later in hegtenis geneem en hulle verhoor het Maandag begin met beide wat onskuldig gepleit het.
Die polisie het aanvanklik gedink die brand was weens ’n tragiese ongeluk tot die nadoodse ondersoek gewys het Armin is in die kop geskiet. Die dokter wat die nadoodse ondersoek op Armin uitgevoer het, dr. Simasiko Kabanje, het Maandag getuig dat daar geen roet in Armin se longe was nie, wat ’n aanduiding is dat hy reeds dood was voor die huis begin brand het.
Araeb het na die polisie toe gegaan en hulle van die voorval vertel. Volgens hom was Armin nie tuis toe die twee beskuldigdes vir Brunhild oorrompel het nie. Armin het na bewering eers later by die huis aangekom.
Die beskuldigdes het volgens Araeb se getuienis uit die huis gehardloop. Toe Armin egter die huis binnegegaan het, het die twee mans hom gevolg.
Araeb sê hy het net ’n week op die plaas gewerk voor die Riedel-egpaar dood is. Hy het vroeër die dag getuig dit was ’n gewone dag op die plaas voor die Riedels se huis afgebrand het.
OORSAAK VAN DOOD ONBEKEND
’n Forensiese mediese beampte wat die nadoodse ondersoek op Brunhild uitgevoer het, dr. Mamadi Garises, het ook gister getuig.
Volgens Garises se getuienis het die nadoodse ondersoek gewys sy het bloeding op haar brein gehad. Die oorsaak van haar dood kon egter nie met sekerheid bepaal word nie.
Garises het gesê die bloeding kon weens trauma wees wat deur ’n stomp voorwerp veroorsaak is of van die hitte van die vlamme wat die egpaar se huis verswelg het.
Sy het getuig Brunhild se liggaam was so erg verbrand dat sy nie meer organe gehad het nie. Haar skedel was glo in fragmente met net stukkies wat oorgebly het.
Garises het getuig dat twee ringe saam met die oorskot deel van die forensiese ondersoek gevorm het.
Sy kon glo nie bepaal of die ringe aan Brunhild se hand was nie omdat haar liggaam te erg verbrand het.
“Die ringe was saam met die roet gemeng,” het sy getuig.
VERHOOR DUUR VANDAG VOORT
Afrikaner en Unaeb staan tereg op twee klagtes van moord, twee klagtes van verkragting, diefstal met verswarende omstandighede, brandstigting en dwarsboming van die gereg.
Die verhoor sal na verwagting vandag voortduur met die afhandeling van Araeb se hoofgetuienis waarna die verdediging met kruisondervraging sal begin.
– [email protected]
Kommentaar
Republikein
Geen kommentaar is op hierdie artikel gelaat nie