Regsberoep in ‘krisistoestand’

“Die regsberoep is in ’n krisis. Die dissiplinêre komitee is nie in staat om klagtes en dissiplinêre verrigtinge teen regspraktisyns doeltreffend te hanteer nie.”Só sê die Regsvereniging van Namibië (LSN) se direkteur, Neliswa Tjahikika, in ’n verklaring wat by die hoërhof in Windhoek ingedien is in ’n saak teen ’n regspraktisyn. Sy beweer die LSN kan nie meer staatmaak op die dissiplinêre proses wat tans in plek is nie.“Die dissiplinêre proses wat in die wet uiteengesit is, is so stadig dat dit nie funksioneel is nie. Dit skep ’n geweldige risiko vir die publiek en kliënte van regspraktisyns en het ’n negatiewe impak op die publiek se persepsie van die regsberoep en -stelsel.”STATISTIEKEDie huidige dissiplinêre proses vereis dat ’n klag teen ’n regspraktisyn by die LSN gelê word. Daarna sal die komitee die klag vir etiese kwessies ondersoek en, indien die klag meriete het, word dit na die dissiplinêre komitee verwys vir die betrokke regspraktisyn om op die klagte te antwoord. As die komitee bevind daar is in ’n oneerbare of onprofessionele wyse opgetree, sal hy ’n hofaansoek bring dat die betrokke regspraktisyn se naam van die rol geskrap word.Die LSN het in 2021 38 klagte ontvang waarvan 12 na die dissiplinêre komitee verwys is. In 2022 is 70 klagte ontvang waarvan 32 na die komitee verwys is. “Die LSN het gevra vir ’n meer gedetailleerde uiteensetting van hoeveel sake hangende is. Ons is wel bewus daarvan dat daar ’n aansienlike aantal hangende sake is met geen vooruitsig op afhandeling nie,” het Tjahikika gesê.Tjahikika meen die dissiplinêre komitee se onvermoë kan grootliks toegeskryf word aan sistemiese tekortkominge sowel as die optrede van die regspraktisyns wat dissiplinêre stappe in die gesig staar.“Die dissiplinêre komitee het nog nooit die administratiewe en klerklike ondersteuning ontvang wat nodig is om doeltreffend te funksioneer nie.”REGUIT HOF TOETjahikika voer aan die enigste uitweg is om dissiplinêre kwessies met betrekking tot die wangedrag van regspraktisyns reguit na die hoërhof te neem.“Gegewe die mislukking van die dissiplinêre proses en die inagneming van die verpligting om op te tree ter bevordering van die openbare belang sowel as die beskerming van die publiek, is die enigste sinvolle stap om die hof se inherente toesighoudende jurisdiksie oor regspraktisyns te gebruik.“Die alternatief sou wees om stil te staan en niks te doen nie terwyl die dissiplinêre proses net voortduur.”HAROLDT KAMATUKADie hofsaak waarin Tjahikika dié beroep op die hoërhof doen om in te gryp en die LSN toe te laat om die huidige dissiplinêre proses vry te spring, is ’n saak wat die LSN teen Haroldt Kamatuka aanhangig gemaak het.Die hof word versoek om Kamatuka se naam van die rol te skrap op grond van beweerde oneerbare optrede.Kamatuka is in Junie 2022 deur die hoërhof as regspraktisyn toegelaat. Ná die LSN egter ’n klag teen hom ontvang het en ondersoek begin instel het, het dit aan die lig gekom hy is ’n veroordeelde misdadiger wat in Maart 1999 tot vyf jaar tronkstraf gevonnis is. “Ons [LSN] was ten tyde sy toelatingsaansoek nie bewus van enige skuldigbevinding nie en het daarom ’n brief ten opsigte van sy toelating uitgereik wat aandui daar is geen besware teen sy aansoek nie,” het Tjahikika gesê.Hy is destyds skuldig bevind op 15 klagte van bedrog, twee klagte van diefstal en een klag van omkopery. Hy het glo nie dié inligting met die hof gedeel voor hy toegelaat is nie.“Hierdie weerhouding is voldoende om sy naam van die rol te skrap.”Kamatuka word ook daarvan beskuldig dat hy N$3,9 miljoen van ’n kliënt (die klaer in die huidige saak) ontvang het vir veilige bewaring en om ’n eiendom te koop. Hy het glo nie die volle bedrag aan die klaer terugbetaal nie.Kamatuka se verweer is dat die LSN nie die mag het om ’n aansoek te bring om sy naam van die rol te skrap nie en dat daardie mag slegs die dissiplinêre komitee beskore is.Partye het gister voor regter Claudia Claasen verskyn en in ’n verslag aangedui dat hulle graag die saak voor die einde van die jaar aangehoor wil hê sodat dit speodig afgehandel kan word.–kristien@republikein.com.na

Regsberoep in ‘krisistoestand’

Kommentaar

Republikein 2024-11-15

Meld asseblief aan om kommentaar te lewer

Regsberoep in ‘krisistoestand’

Kommentaar

Republikein 2024-11-15

Meld asseblief aan om kommentaar te lewer

MELD AAN

Advertensie