Sakeman kry 15 jaar vir verkragting

Vyftien jaar agter tralies was die straf wat Vrydag in Oshakati se streekhoof aan sakeman Sindano Hango uitgemeet is vir die verkragting van sy niggie in 2014. Hy is aanvanklik in ‘n wyd veroordeelde wending kwytgeskeld, waarna die staat appèl aangeteken het. Landdros Leopold Hangalo het aan die volgepakte hof gesê hy kon nie gronde vind vir ‘n ligter of ‘n opgeskorte vonnis nie. Hango was emosieloos, maar van sy familie en vriende het in trane uitgebars. Hangalo het staatsaanklaer Nelao Ya France geroskam oor haar suggesties dat die hof onbevoeg is en dat hy omgekoop is om Hango kwyt te skeld. Hierdie beweerde korrupsie, het die landdros benadruk, is nooit in die hof bewys nie. Hierdie aantygings is volgens Hangalo irrelevant, irrasioneel en onprofessioneel. “Ek neem nie kommentaar in die sosiale media of koerantberigte in ag nie, want dit is nie altyd akkuraat nie,” het hy opgemerk. “Hierdie sentimente, geopper deur die staat, het ten doel om die hof te intimideer en met die diskresionêre mag van die hof tydens vonnisoplegging in te meng.” Die publiek se verwagtinge kan volgens Hangalo nie aan openbare belang gelykgestel word nie. Hy het sy vonnis as regverdig beskryf en opgemerk dat hy nie deur die media geïntimideer sal word nie. Hango se prokureur, mnr. Kadhila Amoomo, het ‘n opgeskorte vonnis versoek. Hy het die hof verlede week vir versagting versoek omdat die veroordeelde die enigste broodwinner is en drie kinders het. Amoomo het ook teen tronkstraf gepleit omdat Hango werk aan meer as 300 mense verskaf. Hango het enduit gesê hy is onskuldig. Die bekende menseregte-aktivis me. Rosa Namises het Vrydag “trane van verligting” oor die vonnis gehuil. Namises, direkteur van Women Solidarity Namibia, was by die hof om die klaagster by te staan. “Geregtigheid het geskied,” het Namises gesê. “Ek was bang weens die agtergrond van die saak. Ek het gedink omdat hy (Hango) so ‘n hoë profiel het, sal die saak in die drein beland. “Ek is baie bly dat ons vandag opnuut die versekering gesien het dat ons op die regstelsel kan staat maak, maak nie saak wat nie. “Die regbank is onafhanklik en sal die beste belang van klaers dien,” het Namises gesê. Volgens Namises moet die media en gemeenskap betrokke wees en hul stemme luid laat hoor indien onreg vermoed word. “Dit is trane van verligting wat jy vandag gesien het,” het Namises gesê. “Vroue, maak nie saak of jy in ‘n stedelike of landelike gebied of in ‘n welgestelde gemeenskap leef nie; kom ons staan op en meld oortredings aan.” Sy het die klaagster geloof vir die feit dat sy vanaf 2014 nooit onder die druk op haar toegegee het nie.