Skêrmoord: Afrikaner skuldig bevind

’n Man wat daarvan beskuldig word dat hy sy lewensmaat ses jaar gelede vermoor het deur haar verskeie kere met ’n skêr te steek, is Vrydag skuldig bevind.

Regter Claudia Claasen het die 44-jarige Rodney Afrikaner in die hoërhof in Windhoek skuldig bevind aan die noodlottige aanval op Patricia Hochobes (39) in die informele nedersetting Hakahana in Februarie 2019.

Afrikaner het aan die begin van sy verhoor onskuldig gepleit en het bewerings ontken dat hy Hochobes ses keer met ’n skêr gesteek het terwyl sy hul sewe maande oue baba geborsvoed het.

Die staatsaanklaer Tangeni Itula het aangevoer dat Afrikaner haar verskeie kere in haar bobeen en been gesteek het. Sy is gevolglik weens bloedverlies dood.

Afrikaner het homself deur die loop van sy verhoor self verteenwoordig en hy het in sy slotbetoë aan die hof gesê as hy van plan was om Hochobes te vermoor, sou hy haar in die nek gesteek het.

“Ek het nie geweet iemand kan sterf as gevolg van steekwonde wat aan die onderste deel van die liggaam toegedien is nie,” het hy aangevoer.



UITSPRAAK

Claasen het in haar uitspraak Afrikaner se verduideliking as ’n “misplaaste persepsie” beskryf.

“Hy het die besluit geneem om doelbewus die skêr vas te hou en haar verskeie kere te steek. Hy het sy voornemens verder verstewig toe hy die huis verlaat het om elders te gaan slaap, en haar gelos het om uit te bloei.”

Volgens die staat het Hochobes en Afrikaner in ’n woordewisseling betrokke geraak wat tot ’n fisieke konfrontasie gelei het. Tydens die argument het Afrikaner glo vir Hochobes geklap en na bewering ’n skêr onder die bed gegryp en haar begin steek.

Volgens die nadoodse ondersoek het hy haar ses keer gesteek en ’n wond wat aan haar bobeen toegedien is, het haar dood veroorsaak.

Die saak is tot 20 Maart uitgestel vir betoë voor vonnisoplegging.

– [email protected]