Troy-kwessie haal die hoërhof

“Ek is hartseer dat ons in ’n moderne en demokratiese Namibië woon, maar sekere mense vind dit steeds nodig om apartheidswoorde soos k****r te gebruik. Dit laat my minder as ’n mens voel – verneder en verontwaardig, veral omdat ek opdrag gekry het om diewe vas te trek ter voordeel van die gemeenskap.”

So het Troy, die opgeleide spoorsnyhond wat verlede week deur ’n boer in die Grootfontein-omgewing geskiet is, se hanteerder, Willem Sourip, in ’n verklaring gesê.

Daar word beweer nadat die boer, Willem Goosen, vir Troy geskiet het, het hy gesê: “Ek sal julle f****n k*****s ook doodskiet!”

Goosen het Sourip glo met ’n vuurwapen gedreig toe hulle sy plaas betree het op soek na goedere wat by perdestalle in die omgewing gesteel is.

“Ek is steeds vreeslik getraumatiseerd. Ek kan nie slaap nie en wag steeds vir die geweer wat op my gesig gerig was, om die koeël af te vuur,” lui Sourip se verklaring, waarin hy byvoeg dat hy sedert die voorval sielkundige berading ontvang en medikasie drink om sy angstigheid te verminder.

WIL GOOSEN SE GEWERE, DIERE AFVAT

Sourip se verklaring is ingedien as deel van ’n dringende aansoek wat Woensdag by die hoërhof in Windhoek aanhangig gemaak is.

Die hofaansoek is gebring in ’n poging om ’n interdik te kry om Goosen se plaas te betree en beslag te lê op sy vuurwapens. Die aansoek poog ook om met die hulp van die stasiebevelvoerder op Grootfontein, al die diere van die plaas te verwyder.

Dié dringende aansoek is gebring te midde van ’n stryery wat die afgelope twee weke op sosialemediaplatforms, veral Facebook- en WhatsApp-groepe, uitspeel.

Dit spruit uit ’n voorval op 15 April waartydens Goosen glo die hond twee keer geskiet het en dat Troy se regtervoorbeen gevolglik geamputeer moes word.

Hulle soek ’n interdik hangende die uitkoms van die strafregtelike klagte wat teen Goosen aanhangig gemaak is. Hy is egter nog nie in hegtenis geneem nie.

Die saak is gister tot 2 Mei uitgestel om vir Goosen die geleentheid te gee om op die saak te antwoord.

GOOSEN SE PLAAS GLO AFGESTIG

’n Dag ná die voorval op Goosen se plaas het hy glo ’n kennisgewing op sy hek aangebring wat alle oortreders verbied en stel dat die perseel op grond van ’n “aparte jurisdiksie” funksioneer.

“Neem kennis dat die mense wat op hierdie land woon soewerein is met inherente regte en voldoen aan die wet van vrede met geen aanspreeklikheid teenoor enige wettige fiktiewe staat of entiteit nie.

“Neem kennis dat hierdie staat en sy mense soewerein is en diplomatieke immuniteit geniet,” lui die kennisgewing.

Die geldigheid van dié kennisgewing kon nie vasgestel word nie.

‘AGGRESSIE’ EN ‘DIEREMISHANDELING’

In die verklaring deur Stephanus Weydeman, wat die skoonpa is van die eienaar van Rainy Day Investments, Philip van der Merwe – wat die eienaars van Troy is – beweer hy dat Goosen reeds twee ander strafregtelike aanklagte teen hom het.

Dit is na bewering ’n klag van poging tot moord en die rig van ’n vuurwapen.

Hy beweer ook dat Goosen ’n reputasie het dat hy diere mishandel.

“Ek het by verskeie mense gehoor die slagpale in die streek sê hulle kan die beeste wat van Goosen se plaas kom, uitken aan die kneusplekke op die karkasse.

Weydeman voer aan hy het self al gesien hoe Goosen sy diere mishandel.

“Op grond van dit wat ek met Goosen gesien en ervaar het, sal hy nie die diere in sy sorg met waardigheid en respek behandel nie. Inteendeel, dit is meer waarskynlik dat daardie diere deur Goosen mishandel, verwaarloos en wreed behandel word.” – [email protected]