Vrou wat miljoene eis, ‘weier’ mediese ondersoek

Die vrou wat miljoene van die staat eis nadat ’n naald glo ná ’n operasie in haar baarmoeder agtergelaat is, het onlangs geweier om ’n mediese ondersoek te ondergaan om die omvang van die skade vas te stel.Die ministerie van gesondheid en maatskaplike dienste het versoek dat Else Tsuxus op 10 Oktober na die Katutura-staatshospitaal se ginekologie-afdeling gaan vir ’n ondersoek om die beweerde mediese skade te bepaal.“Die verweerders [ministerie] versoek ’n ondersoek deur dr. Emvula om ’n X-straal van me. Tsuxus se baarmoeder te neem en te bepaal of die punt van die naald wel nog in haar baarmoeder is.“Verder, as sy sulke mediese probleme het, sal die ondersoek ook die oorsprong van sulke probleme bepaal. “Die ondersoek sal ook bepaal of sodanige diagnose van haar probleme aan die punt van die naald toegeskryf kan word en hoe dit haar verskeie lewensdomeine en die behandelingskoste, die prognose wat daarmee verband hou, en of korrektiewe chirurgie gedoen kan word, beïnvloed,” lui die bevel wat regter Eileen Rakow op 2 Oktober uitgereik het.Tsuxus het egter nie aan die ministerie se versoek voldoen nie en het by monde van haar prokureur, Gaenor Michaels, haar besluit geregverdig deur daarop te wys dat die dokter – by wie sy die ondersoek moes doen – se kwalifikasies nie genoem is nie.“Die verweerders [ministerie] het nie die kwalifikasies of curriculum vitae van dr. Emvula aan die eiser [Tsuxus] verskaf nie, wat die eiser in staat sou stel om die gebied van sy of haar kundigheid vas te stel,” lui hofstukke.Volgens Michaels het die ministerie nie genoegsame inligting oor Emvula verskaf sodat die eiser kan bevestig dat die voorgenoemde mediese praktisyn nie ’n belang by die saak het nie. Die ministerie het glo ook nie gesê of Tsuxus ’n afskrif van die volledige mediese ondersoek en verslag van die dokter sal ontvang sodra die mediese ondersoek afgehandel is nie.Nog ’n kwessie wat Michaels geopper het, hou verband met die uitgawes wat Tsuxus sal moet betaal om haarself aan die mediese ondersoek te onderwerp.“Die verweerders se versoek het nie ’n oorbetaling wat daarmee gepaardgaan nie, die eiser kan dus nie bepaal of die bedrag wat deur die verweerders [ministerie] aangebied is, voldoende is om haar redelike uitgawes te dek nie.”SKADEVERGOEDINGTsuxus eis sowat N$13 miljoen in skadevergoeding van gesondheidsministerie nadat sy glo in Februarie 2016 ’n operasie by die Katutura-hospitaal ondergaan het vir buikpyn en oormatige menstruele bloeding wat deur uteriene fibroïede (mioom) veroorsaak is. Volgens haar is sy sedert die operasie nie in staat om swanger te raak sonder om haar lewe en die baba s’n in gevaar te stel nie. Sy kan glo nie meer voorwerpe maklik optel nie en is ongeskik vir werk as gevolg van die beweerde naald wat nog in haar liggaam is. Sy ervaar glo ook daaglikse buikpyn en moet staatmaak op pynmedikasie vir verligting.Tsuxus het in Maart 2023 die hofsaak teen die ministerie by die hoërhof in Windhoek aanhangig gemaak.– republikein@republikein.com.na

Vrou wat miljoene eis, ‘weier’ mediese ondersoek

Kommentaar

Republikein 2025-04-03

Meld asseblief aan om kommentaar te lewer

Vrou wat miljoene eis, ‘weier’ mediese ondersoek

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie