Wetsontwerp op openbare byeenkomste teruggetrek

Die wetsontwerp op openbare byeenkomste en optogte is vir eers teruggetrek. Dit kom nadat die minister van binnelandse sake, immigrasie, veiligheid en sekuriteit, Albert Kawana, erken het dat die wetsontwerp hordes kritiek uitgelok het sedert dit op 7 Augustus ter tafel gelê is.Die wetsontwerp was onder meer daarop gemik om enigiemand wat binne 500 meter van onder andere howe, die parlement, Staatshuis, lughawens, ambassades of tronke betoog, tronkstraf van tot en met een jaar op te lê of ’n boete van N$5 000.Dit het verder vereis dat kennisgewing van ’n beplande byeenkoms of betoging minstens vyf dae voor die tyd gegee moet word, en toestemming moet van die polisiehoof of die naaste stasiebevelvoerder verkry word.Ingevolge die voorgestelde wetgewing sal die organiseerders van ’n openbare byeenkoms persoonlik verantwoordelik gehou kan word vir enige gevolge wat uit die geleentheid voortspruit – ’n stap wat gesien word as die staat se poging om diegene wat sulke geleenthede aanbied, te intimideer.Kawana het toegegee daar bestaan kommer dat die wet dalk misbruik kan word. Hy het egter vinnig bygevoeg dat Namibië spog met goeie regering en daarom meen hy dié kommer is misplaas.Hy het opgemerk dat hoewel baie van die aspekte van die wetsontwerp goed bedoel was, daar dele was wat verkeerd geïnterpreteer is en kommer veroorsaak het. “Ons is ’n demokratiese regering en ek het sommige van die bekommernisse gehoor en weens die beperkte tyd om te konsulteer, voel ek dat hierdie wetsontwerp miskien moet wag,” het hy gesê. Die Namibiese Vereniging vir Ekonomiese Beleidsnavorsing (EPRA) het twee weke gelede gewaarsku dat die wetsontwerp die kernwaardes van demokrasie – deursigtigheid, aanspreeklikheid en die beskerming van burgerlike vryhede in Namibië – in gevaar stel. “Die [wetsontwerp op openbare byeenkomste en optogte], in sy huidige vorm, is ’n ernstige agteruitgang van demokratiese waardes en die beskerming van menseregte,” het die EPRA se verslag gelui.Die vereniging het ’n beroep op die regering gedoen om die wetsontwerp te heroorweeg en te hersien ingevolge demokratiese beginsels en internasionale standaarde.Kawana is een van die ministers wat na verwagting sal uittree voordat &#039;n nuwe president in Maart volgende jaar ingesweer word.Hy het bygevoeg dat hy ’n vergadering met al die politieke partye gereël het om met die Namibiese polisiehoof, luitenant-generaal Joseph Shikongo, te vergader om kwessies rakende hul komende politieke veldtogte en openbare byeenkomste uit te stryk.– republikein@republikein.com.na

Wetsontwerp op openbare byeenkomste teruggetrek

Kommentaar

Republikein 2025-03-12

Meld asseblief aan om kommentaar te lewer

Wetsontwerp op openbare byeenkomste teruggetrek

Kommentaar

Republikein 2025-03-12

Meld asseblief aan om kommentaar te lewer

MELD AAN

Advertensie