‘Honddiewe’ kry borg

Emosies het gister hoog geloop in die Swakopmund-landdroshof toe drie verdagtes, wat daarvan beskuldig word dat hulle ’n gesin se troeteldier gesteel en dit vir N$200 vir “kapana-vleis” verkoop het, in die hof verskyn het.Landdros Conchita Olivier het borgtog van N$3 000 aan elk toegestaan. Die moontlikheid het egter bestaan dat hulle nie dié bedrag kan betaal nie en in aanhouding sal bly tot hul formele aansoek om borgtog op 18 Maart aangehoor word.Die landdros het die saak teen Seth Skrywer (20), Lourens Nanub (18) en Mariando Bloedstaan (20) aangehoor. ’n Minderjarige (12) wat glo ook by die voorval betrokke was, is uit aanhouding vrygelaat. Die groep staan tereg op aanklagte van diefstal, geldwassery en dieremishandeling.‘GROOT VERLIES’’n Skare het buite die hof saamgedrom en hul verontwaardiging oor die voorval uitgespreek. Catherine Titus, die eienaar van die gesteelde troeteldier, ’n agtjarige rottweiler-reun Ragnir, was ook by die hof en sy was sigbaar ontsteld.“Dit moet net stop. Om troeteldiere, geliefde familie-troeteldiere dood te maak, moet net stop. Hierdie mense moenie borgtog kry nie. Dit moet met niemand gebeur nie. Dit is so ’n groot verlies.”Lenny Hoffmann – Ragnir se vorige eienaar voordat hy hom twee jaar gelede aan Titus verkoop het – het Ragnir as ’n liefdevolle familietroeteldier beskryf.“Hy het saam met die gesin in die bed geslaap. Hy het met kinders grootgeword. Hy was saam met Catherine se baba. Dit is ook ons kinders,” het hy gesê.Hoffmann het sy hartseer oor die hond se lyding uitgespreek en gesê: “Iemand huil as hulle ’n klein snytjie aan hul vinger kry, maar hierdie hond is wreed met ’n byl gekap. Hy is doodgemaak.”Die vrou wat na bewering die hondevleis verwerk en verkoop het, is glo nie ’n verdagte nie, maar kan dalk as ’n getuie geroep word. Volgens die eienaar het dié vrou, bekend as ’n plaaslike kapana-verkoper, beweer dit was die eerste keer dat sy hondevleis verkoop het. Sy het glo gesê sy het die geld nodig gehad om na die Noorde te reis.BETOGINGTroeteldierliefhebbers en -ondersteuners het geëis dat die oortreders swaar gestraf moet word. Sommige het gesê hulle vrees vir hul eie troeteldiere se veiligheid en het belowe om hulle te verdedig.“As iemand met slegte bedoelings naby my diere kom, sal ek hulle doodmaak. Jy vat nie wat aan ander mense behoort nie, veral hul geliefdes,” het iemand gesê. ’n Ander persoon het kommer oor straatkos uitgespreek en gesê sy sal nooit weer kapana-vleis eet nie.“Hoeveel honde is al geslag en as kapana verkoop? Ons het reeds wildsvleis wat onwettig verkoop word en nou dit,” het sy opgemerk.AKTIVISTEDiereregte-aktiviste is woedend oor wat hulle sien as swak toepassing van wette wat diere beskerm. “Die regstelsel misluk wanneer dit by dieremishandeling kom. Daar is nooit enige werklike aanspreeklikheid nie,” het Charne Wasserfall van die Civilian Animal Protection Unit (CAPU) vandeesweek gesê.MENSE VERSKILNie almal het egter dieselfde sentimente oor die saak gedeel nie. Sommige sosialemediagebruikers het aangevoer dat mense ’n dier bo menslike lyding prioritiseer.“Ag, dis net ’n hond. . . Mense is honger daar buite. Ten minste kan die geld wat hierdie maand vir daardie hond kos moes koop aan weeskinders geskenk word,” het Rejoice Nekomba gesê.Net so het Lazarus Twaitavela Neliwa die aandag wat aan die saak gegee word bevraagteken.“Mense word elke maand in Swakop doodgemaak, tog is mense daar buite wat vir ’n hond betoog. . .”Ander het kulturele verskille in houdings teenoor diere uitgewys. Mee Shiveli Sha Tate het opgemerk dat die enigste probleem wat sy sien “is dat hulle ’n hond doodgemaak het wat nie aan hulle behoort het nie”.“Ons is verskillende mense; sommige hou van honde as troeteldiere, terwyl ander slange verkies, ensovoorts. Moenie aan my hond of my slang raak nie, want hulle is my gunstelingdiere. Maar moenie mense vra hoekom hulle honde eet as jy ook hoenders en bokke eet nie. Hulle is ook diere,” het sy verduidelik.Daar was ook ’n debat oor rondloperhonde en hul plek in gemeenskappe: “Mense is honger. . . Is die hond uit haar huis gesteel of het dit net in die strate rondgedwaal? As dit net rondgedwaal het, blameer ek nie die ouens nie. Ons is moeg vir honde in die straat.”Aan die ander kant het talle simpatie met die eienaar gehad en die rol van troeteldiere in gesinne verdedig.VOORVALDie Namibiese polisie se woordvoerder in die Erongostreel, hoofinspekteur Ileni Shapumba, het besonderhede van die voorval verskaf.“Die diefstal het op Saterdag 1 Februarie in Matutura plaasgevind. Twee honde is gesteel terwyl die eienaar in haar huis was. “Toe sy vir hulle wou gaan kos gee, het sy opgemerk dat hulle nie meer daar was nie en sy het ’n gat in die heining ontdek.“Terwyl hulle vir die honde gesoek het, het dit aan die lig gekom dat vier jong mans die honde gesteel het. Een van die honde is later in ’n huis in die informele nedersetting DRK gevind.”– republikein@republikein.com.na

‘Honddiewe’ kry borg

Kommentaar

Republikein 2025-04-03

Meld asseblief aan om kommentaar te lewer

‘Honddiewe’ kry borg

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie