‘Rooies’ bly agter tralies

Die oudlanddros, Walter (Rooies) Mostert, sal nóg ’n Kersfees agter tralies deurbring nadat sy appèl teen die weiering van sy borgtogaansoek gister van die hand gewys is.

Mostert staan tereg op 12 aanklagte wat verband hou met bedrog, afpersing en diefstal en sy aanvanklike borgtogaansoek in die Windhoekse streekshof is in Mei vanjaar van die hand gewys.

Hy het daarna die hoërhof in Windhoek genader om dié beslissing uit te daag op grond van bewerings dat die betrokke landdros die bewyse verkeerd geïnterpreteer het en ’n regsfout begaan het in sy beslissing dat die staat ’n sterk saak teen hom het.



‘VOORTVLUGTIGE’

Mostert het verder aangevoer dat hy nie ’n vlugrisiko is nie. Dít ten spyte van die feit dat hy voorheen beskou was as ’n voortvlugtige van die gereg en ná sy arrestasie glo weer ontsnap het.

Hy het egter aangevoer dat hy self besluit het om terug te keer na Namibië toe hy uitgevind het dat daar uitleweringsprosedure teen hom onderweg was.

Hy het verder aangevoer dat die hof hom nie teen selfinkriminasie gewaarsku het toe hy tydens sy borgtogaansoek oor sy ontsnapping uit aanhouding getuig het nie.

“Dit is ironies dat die appellant [Mostert] nou die skuld voor die deur van die landdros wil lê omdat hy hom nie daaraan herinner het om homself nie te inkrimineer toe hy gepraat het oor hoe hy uit aanhouding ontsnap het nie.

“Wat die appellant ook nie sê nie, is dat hy deur sy prokureur die getuienis oor daardie aspek vrywillig in sy hoofgetuienis gegee het,” lui die hofuitspraak wat gister gelewer is.

Regter Claudia Claasen het in haar uitspraak verwys na die staat se argument dat Mostert ’n voortvlugtige van die gereg was – iets wat volgens haar nie geïgnoreer kan word nie.

“Dit het nie net sy medebeskuldigdes benadeel nie, maar ook die regspleging. Dieselfde geld vir die bewerings dat een van die getuies gedreig is,” lui die uitspraak.



STERK SAAK

Claasen het verder bevind dat die staat wel ’n sterk, prima facie-saak teen Mostert het.

“Die katalogus van misdrywe wat deur die appellant glo gepleeg het, is ernstig van aard en baie van hulle sal swaar vonnisse tot gevolg hê,” het sy in die uitspaak gesê.

Sy het bevind dat dit nie in die belang van regspleging sal wees om vir Mostert op borgtog vry te laat nie en het gevolglik die appèlaansoek van die hand gewys.

– [email protected]