Grootfontein se waterprobleme ‘verby’

Grootfontein se munisipaliteit sê die dorp se gereelde wateronderbrekings oor die afgelope weke behoort nou iets van die verlede te wees nadat die elektriese toerusting herstel is. Die munisipale woordvoerder, mnr. Luke Salamo, sê ’n senior elektrisiën het die afgelope naweek ’n driefaseprobleem herstel. Volgens hom is normale watertoevoer na die dorp se inwoners weer teen gister omstreeks 12:00 herstel. Hy het bygevoeg die elektriese toerusting het uitgesny elke keer as dit op die dorp gereën het. Hy het verduidelik dit het tot die gereelde, onbeplande wateronderbrekings oor die afgelope weke gelei. “Water word gewoonlik in ons watertorings gepomp, wat op hoë plekke geleë is en sover moontlik altyd vol water gehou word. “Die water vloei dan met behulp van swaartekrag na verskeie residensiële gebiede. As die elektriese toerusting faal, is dit net die water in die watertorings wat nog beskikbaar is. Ons kan dan ook nie weer water pomp om die torings vol te maak nie. “Die elektriese toerusting wou elke keer nie werk nadat daar ’n kragonderbreking was nie,” het hy verduidelik. Hy het bygevoeg dat die dorpsraad nie in die stadium oor sy eie elektrisiën beskik nie en eerder op Cenored, die noordelike verspreider van elektrisiteit, staatmaak om probleme uit te stryk. Dit is ingevolge ’n diensooreenkoms wat die munisipaliteit met dié kragverspreider het. “Die dorpsraad is daartoe verbind om ’n ononderbroke watertoevoer na al ons inwoners te verseker, het hy gesê en verskoning gevra vir enige ongerief wat die onderbrekings veroorsaak het. Dit volg nadat Grootfontein oor die afgelope jare gereelde wateronderbrekings ervaar het – tot inwoners se ergenis. Die afgelope weke was daar bykans elke oggend ’n onderbreking in watervoorsiening.Die munisipaliteit het ook onlangs verskeie projekte van stapel gestuur om die dorp skoon te maak, wat insluit om van vrywilligers gebruik te maak wat werk vir kos as ’n betaling. Die werk vir kos-projek is ’n inisiatief van die dorp se burgemeester, me. Thalita Garises. Sy sê die dorp sal voortgaan met verskeie skoonmaakveldtogte “totdat alles skoon is”.Daar is ook met werk begin om die dorp se talle slaggate te herstel, terwyl verskeie bome al langs Dr. Nicky Iyambo-straat geplant word. Die bome is deur die plaaslike onderneming Grootfontein Tractors & Implements geskenk.Verder is ’n kennisgewing uitgereik aan die eienaars van vee, wat hul beeste, skape, bokke en perde, toelaat om in die dorp te wei, om hul vee te verwyder, of die diere sal op die eienaar se onkoste geskut word. – elvira@republikein.com.na

Grootfontein se waterprobleme ‘verby’

Kommentaar

Republikein 2025-04-11

Meld asseblief aan om kommentaar te lewer

Grootfontein se waterprobleme ‘verby’

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie