Lüderitz bars uit sy nate
Gebrek aan doeltreffende planne
Die adjunkminister van visserye het verlede week in die parlement gesê die regering kan nie langer wag om die uitdagings op Lüderitz te takel nie.
Jemima Beukes – In lig van die groenwaterstofprojek en die onlangse olievondse langs die Namibiese kus, het die adjunkminister van visserye en mariene hulpbronne, Sylvia Makgone, haar kommer uitgespreek oor die beweerde gebrek aan beplanning vir behuising en die diens van grond op Lüderitz.
Sy het verlede week in die parlement gesê die regering kan nie langer wag om die kwessies te takel nie, aangesien die dorp reeds oorval word met mense wat potensiële geleenthede wil benut. Skole is glo oorvol met die toestroming van mense.
“Almal wat hier staan, praat oor groenwaterstof, olie en gas en ons weet dit sal op Lüderitz wees en ons beplan nie hoe dit hier gaan kom nie.
“Die diens van grond, die topografie van Lüderitz is iets anders; dit is harde rots. Daar is ’n behuisingstekort en mense het reeds na Lüderitz begin stroom. TotalEnergies is reeds daar en die skole is oorvol, so dit is nie ’n kwessie van môre nie. Dit gebeur reeds. Minister van finansies, iets moet nou gebeur, ons het nie tyd nie,” het sy gesê.
Sy het bygevoeg die ministerie van stedelike en landelike ontwikkeling kan niks doen om dié uitdagings te takel as die geld nie aan dié ministerie bewillig word nie.
Hilaria Mukapuli, ’n Swapo-lid, het met Makgone saamgestem oor die kritieke behuisingstekort en bygevoeg die topografiese ligging van die dorp maak dit ’n meer uitdagende kwessie.
“Ek is nie seker hoe die finansies onder die plaaslike owerhede versprei word en waarna gekyk word nie, want as ek een erf moet diens, sal dit N$120 000 kos teenoor ’n munisipaliteit soos byvoorbeeld Keetmanshoop wat dalk N$30 000 sal benodig. Jy moet ’n hamerboor en petrol gebruik; dit is ’n uitdaging om een erf te diens,” het sy gesê.
Erastus Uutoni, die minister van stedelike en landelike ontwikkeling, het verlede week N$1,8 miljard vir hierdie boekjaar aangevra. Altesaam N$487 miljoen is vir plaaslike owerhede, streekrade en ander rolspelers geoormerk om kapitaalprojekte vir die bou van basiese munisipale infrastruktuur en dienste te implementeer, asook vir die opgradering van die voorsiening van behuising, sekerheid om grond te besit en verbeterde sanitasie.
Die grootste deel van die begroting, N$1,1 miljard, is geoormerk om die operasionele en openbare diensleweringskapasiteit van streekrade en plaaslike owerhede sowel as erkende tradisionele owerhede te subsidieer en te ondersteun.
Met betrekking tot die Lüderitz-krisis het Uutoni gesê hulle word gedwing om die grond in dorpe en nedersettings asook hoe finansiering aangewys sal word om te verseker dat dienste volhoubaar gelewer word, te evalueer.
– [email protected]
Sy het verlede week in die parlement gesê die regering kan nie langer wag om die kwessies te takel nie, aangesien die dorp reeds oorval word met mense wat potensiële geleenthede wil benut. Skole is glo oorvol met die toestroming van mense.
“Almal wat hier staan, praat oor groenwaterstof, olie en gas en ons weet dit sal op Lüderitz wees en ons beplan nie hoe dit hier gaan kom nie.
“Die diens van grond, die topografie van Lüderitz is iets anders; dit is harde rots. Daar is ’n behuisingstekort en mense het reeds na Lüderitz begin stroom. TotalEnergies is reeds daar en die skole is oorvol, so dit is nie ’n kwessie van môre nie. Dit gebeur reeds. Minister van finansies, iets moet nou gebeur, ons het nie tyd nie,” het sy gesê.
Sy het bygevoeg die ministerie van stedelike en landelike ontwikkeling kan niks doen om dié uitdagings te takel as die geld nie aan dié ministerie bewillig word nie.
Hilaria Mukapuli, ’n Swapo-lid, het met Makgone saamgestem oor die kritieke behuisingstekort en bygevoeg die topografiese ligging van die dorp maak dit ’n meer uitdagende kwessie.
“Ek is nie seker hoe die finansies onder die plaaslike owerhede versprei word en waarna gekyk word nie, want as ek een erf moet diens, sal dit N$120 000 kos teenoor ’n munisipaliteit soos byvoorbeeld Keetmanshoop wat dalk N$30 000 sal benodig. Jy moet ’n hamerboor en petrol gebruik; dit is ’n uitdaging om een erf te diens,” het sy gesê.
Erastus Uutoni, die minister van stedelike en landelike ontwikkeling, het verlede week N$1,8 miljard vir hierdie boekjaar aangevra. Altesaam N$487 miljoen is vir plaaslike owerhede, streekrade en ander rolspelers geoormerk om kapitaalprojekte vir die bou van basiese munisipale infrastruktuur en dienste te implementeer, asook vir die opgradering van die voorsiening van behuising, sekerheid om grond te besit en verbeterde sanitasie.
Die grootste deel van die begroting, N$1,1 miljard, is geoormerk om die operasionele en openbare diensleweringskapasiteit van streekrade en plaaslike owerhede sowel as erkende tradisionele owerhede te subsidieer en te ondersteun.
Met betrekking tot die Lüderitz-krisis het Uutoni gesê hulle word gedwing om die grond in dorpe en nedersettings asook hoe finansiering aangewys sal word om te verseker dat dienste volhoubaar gelewer word, te evalueer.
– [email protected]
Kommentaar
Republikein
Geen kommentaar is op hierdie artikel gelaat nie