Net Chinese kontrakteurs op kortlys vir padtender

Ogone Tlhage - Die Paaieowerheid (RA) sê hy het min tenders van Namibiese maatskappye ontvang vir die opgradering van die Usakos-Karibib-pad, waarin sewe Chinese konstruksiefirmas op die kortlys geplaas is.

Net drie Namibiese maatskappye het glo belangstelling getoon in die tenderproses, wat deur Duitsland se hoofontwikkelingsbank, KfW, gefinansier word.

Conrad Lutombi, uitvoerende hoof van die RA, het gesê aangesien KfW die opgradering van die pad finansier, was dit die bank wat die vereistes gestel het vir maatskappye wat by die projek betrokke wil raak.

“Wat gebeur het, is dat ons ’n vooraf-kwalifikasie-tender geadverteer het en dit was ingevolge KfW se reëls. Dit was oop vir internasionale maatskappye en nie net Namibiese maatskappye nie. Altesaam 17 maatskappye het tenders ingedien en hieruit was daar net drie Namibiese maatskappye – in gesamentlike tenderaansoeke,” het Lutombi gesê.

“Wanneer hulle met buitelandse finansies te doen het, het hulle hul eie verkrygingsreëls en dan word tenders internasionaal geadverteer,” het hy bygevoeg.

Volgens Lutombi het een plaaslike maatskappy ’n gesamentlike bod met ’n Suid-Afrikaanse maatskappy ingedien, terwyl die ander twee gesamentlike tenderaansoeke met Chinese ondernemings ingedien het.

“Geen Namibiese maatskappy het alleen getender nie,” het hy gesê.

Die sewe maatskappye op die kortlys sal nou na die volgende stadium van die tenderproses vorder waar hulle sal moet bewys hulle het die kapasiteit om die projek uit te voer, het hy verduidelik.

Namibiese maatskappye sal steeds by die projek baat, aangesien hulle 25% van die waarde van die projek sal ontvang om te voltooi, het Lutombi gesê.

“Vir die sewe maatskappye wat gekwalifiseer het, sal dit ’n verpligte vereiste wees dat vier maatskappye betrokke sal wees saam met wie ook al hierdie bod wen. Uit die totaal is 25% van die projekkoste vir Namibiese kontrakteurs.

“Die suksesvolle tenderaar sal die bod kry op die basis dat vier Namibiese kontrakteurs betrokke is,” het hy bygevoeg.

Die betrokke Namibiese maatskappye sal uitsluitlik verantwoordelik wees vir die bou van brûe, duikslote, plaveisel en die seël van paaie, het die RA-baas verduidelik.

Die sewe maatskappye op die kortlys is China Civil Engineering Construction Corporation, China Jiangxi International, China Railway Seventh, UNIK Construction, Zhongmei Engineering, China Henan International Corporation en Shandong Luqiao Group.

‘SKANDELIK’

Justina Jonas, sekretaris-generaal van die Metaal- en Verwante Werkersunie van Namibië (Manwu), het gesê dit is skandelik dat plaaslike maatskappye nie gekies is nie.

“Ons is nie meer verbaas nie. As ’n vakbond het ons ons beywer vir die kwessie van lokalisering. Ons baklei, maar niemand luister nie. Daar is geen manier dat jy buitelandse maatskappye vooraf laat kwalifiseer terwyl daar Namibiese maatskappye is nie. Namibiese maatskappye het beter paaie gebou voordat die Chinese gekom het,” het sy gesê.

“Hulle verkoop Namibiërs se siele aan buitelanders.”

Volgens Jonas was dit vreemd dat ’n Namibiese maatskappy in die verlede gekies is om ’n langer stuk pad – tussen Okahandja en Karibib – te bou, maar nou was Namibiese maatskappye nie opgewasse vir die taak om die korter Karibib-Usakos-pad op te gradeer nie.

Sy het ook konstruksiefirmas uitgedaag om hul stemme dik te maak en gesê die vakbond het lank oor die kwessie gepraat.

– [email protected]