Nuwe WhatsApp-lyn en webwerf vir Cran

Die regulerende Owerheid vir Kommunikasie in Namibië (Cran) het sy WhatsApp-verbruikershulplyn bekendgestel, terwyl sy webtuiste ook 'n splinternuwe baadjie aangetrek het.

Die webtuiste en die hulplyn het albei ten doel om dienslewering en die betrokkenheid van verbruikers te verbeter asook om deursigtigheid en toegangklike kommunikasie in Namibië te bevorder.

CRAN se uitvoerende hoof, Emilia Nghikembua, het die belangrikheid van reaktiewe en doeltreffende kommunikasiekanale beklemtoon en gesê “dit is ons plig om te verseker dat elke burger maklik toegang het tot inligting oor hul regte, die regulatoriese raamwerk vir inligting- en kommunikasietegnologie, en die dienste wat ons bied.

“Met die bekendstelling van ons verbruikershulplyn en opgeknapte webwerf, bevorder ons 'n meer interaktiewe verhouding met verbruikers. Hierdie instrumente sal die oplossing van klagtes en navrae oor lisensies meer vereenvoudig maak, asook algemene verbruikerskwessies meer doeltreffend aanspreek,” het Nghikembua verduidelik.

Cran se WhatsApp-lyn bied aan verbruikers die volgende:

•Prosedures vir klagtes deur verbruikers: 'n Kanaal wat maklik is om te gebruik vir die indien van klagtes en wat vinniger oplossings moontlik maak en verbruikersfrustrasie tot die minimum beperk.

• Algemene verbruikersnavrae: 'n Eenstop-spilpunt vir antwoorde op vrae oor telekommunikasiedienste, lisensies en regulasies.

“In ons toenemend digitale wêreld kan gapings in kommunikasie ontstaan. Die verbruikersassistent oorbrug hierdie gaping deur proaktiewe betrokkenheid te bevorder en om ons in staat te stel om ons dienste aan te pas by verbruikersbehoeftes,” het Nghikembua bygevoeg.

“Die nuwe platform strook met ons visie om 'n digitaal-bemagtigde Namibië te bou. Dit is nie net 'n webwerf nie, maar 'n poort na meer inklusiewe en doeltreffende kommunikasie,” het Nghikembua gesê. - [email protected]