TransNamib: Nuwe voertuie moet ‘inkomste verhoog’

TransNamib se vloot van ses splinternuwe voertuie wat ook in die maatskappy se kentekens en kleure getooi is, is glo aangekoop om die maatskappy se bedryfskapasiteit en sodoende sy inkomste ’n hupstoot te gee. Die maatskappy was onlangs in die nuus nadat werknemers se lidmaatskap van die Renaissance Health Medical Aid Fund (RMA) aanvanklik opgeskort is omdat TransNamib vir etlike maande nie lede se maandelikse premies betaal het nie. Afgetrede werknemers en hul afhanklikes is ook in kennis gestel dat TransNamib se maandelikse subsidie van 75% gestaak gaan word omdat die maatskappy “eenvoudig nie die geld het nie”. Die situasie is egter kort ná die opskorting van voordele deur TransNamib beredder nadat hy sowat N$3 miljoen oorbetaal het. Tans ontvang fondslede en huidige en afgetrede personeellede dekking tot 7 September – wanneer die volgende betaling verwag word.Volgens TransNamib se bestuurder vir kommunikasie, Abigail Raubenheimer, is die bestelling vir die voertuie ter waarde van N$2 miljoen reeds nege maande gelede geplaas. Sy het beklemtoon die maatskappy was “totaal deursigtig” rakende die uitdagings wat hy met toerusting ervaar.“Om ons kontantvloeiprobleme op te los, moet ons die maatskappy se inkomste verhoog. Gegewe ons deursigtigheid is dit duidelik dat die belegging lank reeds uitstaande is,” het Raubenheimer by navraag gesê. Volgens haar is TransNamib se bedrywighede ernstig geraak deur ’n gebrek aan voertuie tot die maatskappy se beskikking.“Die verkryging van hierdie toerusting is slegs vir die doel om ons bedryfskapasiteit te verhoog en gevolglik ons inkomste. Dit sodat ons die lig aan die einde van die tonnel kan sien in terme van die generering van genoeg inkomste om ons uitgawes te dek.” Die voertuie sal gebruik word deur TransNamib se bedryfsdepartement wat volgens Raubenheimer in die verlede weens ’n gebrek aan voertuie ernstig in terme van beweging beperk is. “Dit sal ons help om meer doeltreffend te werk.”Met verwysing na ander struikelblokke wat die maatskappy ervaar het, het sy gesê “dit was baie tydelik en het dadelik aandag geniet”.Een van die pensioenarisse wat geraak sal word, sou TransNamib die subsidie van 75% opskort, sê dit beteken haar maandelikse paaiement gaan styg vanaf N$1 740 tot N$6 900. ’n Goedkoper plan is tans ook nie ’n opsie nie, omdat lede van mediese fondse eers teen jaareinde na ’n ander fondsplan kan oorskuif. Volgens die vrou kos die goedkoopste plan wat sy by ’n mediese fonds kan kry en steeds aan haar vereistes voldoen sowat N$5 300. Chroniese medikasie wat meer as gereeld bejaardes se voorland is, jaag haar maandeliks N$1 000 uit die sak.“Pensioenarisse kan eenvoudig nie duisende vir ’n mediese fonds bekostig nie. Waar moet mense van ’n hoë ouderdom skielik daardie geld kry?”TransNamib het vroeër gesê 387 pensioenarisse sal geraak word indien die 75% nie meer betaal word nie. Dit sal die maatskappy maandeliks meer as N$2 miljoen spaar. Afgetrede werknemers en hul afhanklikes se lidmaatskap word net opgehef as hulle dit so verkies.– henriette@republikein.com.na

TransNamib: Nuwe voertuie moet ‘inkomste verhoog’

Kommentaar

Republikein 2025-04-07

Meld asseblief aan om kommentaar te lewer

TransNamib: Nuwe voertuie moet ‘inkomste verhoog’

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie