Waterpark-droom loop droog

Die ambisieuse visie van die plaaslike entrepreneur mnr. Roland Donovan Jacobs om ’n twintig hektaar waterspeelpark in Windhoek se Rocky Crest woonbuurt te bou, het ’n dooiepunt bereik. Die stuk grond ter waarde van N$80 miljoen is op die spel vir die sakeman bekend vir sy Streethouse handelsmerk wat klerasiekettingwinkels en kinderpretpersele oor die land heen bedryf.Nadat die Windhoek munisipaliteit in 2016 tien hektaar vir N$10,3 miljoen vir dié projek verkoop het, en die volgende tien hektaar bedoel vir fase 2 van die projek toegeken het, is die ontwikkeling deur die ekonomiese resessie en die verlengde droogte belemmer, sê Jacobs.Volgens hom wil banke sedert die uitbreking van Covid-19 en die inperkings eenvoudig nie vir vermaakbedrywighede geld uitleen nie. Bank Windhoek het reeds laas jaar kennis gegee dat hy die verband op die grond sal herroep as terugbetaling nie op datum gebring word nie. Volgens dokumentasie van die mees onlangse stadsraadvergadering het Jacobs verbande van altesaam N$24 miljoen op die eiendom uitgeneem. Die stadsraad het vroeër die maand geweier om sy streng voorwaardes op die herverkoop van die grond te verslap, wat aandring dat grootmaat diensinfrastruktuur eers geïnstalleer moet word. Volgens die munisipaliteit was die grond binne die bepalings van sy beleid oor spesiale projekte sonder ’n tender toegeken. In 2008 het Streethouse Entertainment aansoek gedoen om grond van 20 hektaar, suidoos van Rocky Crest Uitbreiding 8, vir ’n pret- en ontspanningspark te koop. Finale goedkeuring is in 2013 gegee en die koopakte is in 2015 onderteken. Jacobs sê die titelakte is eers in Mei 2016 oorgedra, maar vanaf die tekendatum moes hy reeds N$638 000 rente betaal. Hy moes toe aan finansierders bewys dat sy konsep kan werk en hy het kleiner pretparke op Okahandja, Swakopmund en by Maerua Mall in Windhoek gevestig. Tot nou het hy reeds meer as N$10 miljoen van sy eie geld ook tot die ontwikkeling van die Streethouse Familiepretpark bestee, sê hy. Samewerking met verskeie vennote vanaf Kanada, Suid-Afrika en plaaslike kundiges het intussen gekom en gegaan. “Toe ek in 2006 begin het, was die kosteberekening US$20 miljoen, wat sowat N$150 miljoen was. Sedertdien met die wisselkoers het die koste die hoogte ingeklim. “Op Okahandja het ons N$12 miljoen belê om die konsep te toets – deur die aanbreek van die resessie – maar met Covid moes ons finaal toemaak,” vertel hy. WYSIGINGS WORD AFGEKEURWeens die intensiewe waterbehoefte is die beplande park in 2017 hersien en verklein weens ’n tekort aan toevoer by die perseel. Verder is in 2019 voorgestel dat 50% van die grond vir behuising ontwikkel word. Op 27 Mei 2021 het die Paaieowerheid vir Jacobs genader met ’n voorstel om die grond te koop om ’n nuwe NaTis-sentrum en ’n nuwe verbindingspad tussen Rocky Crest en Pionierspark daar te bou. Ten spyte dat die aanleg van grootmaatdienste hierby aangepas sou word, staan die munisipaliteit die transaksie teen. “Ons het hulle die betaling van die 20% boete aangebied, omdat geen grootmaatdiensing gedoen is nie, maar hulle weier,” sê hy.Voorwaardes geld vir spesiale projekte om spekulering te voorkom en te verseker dat die grond wel vir sy voorgenome doel as ’n spesiale projek ontwikkel word, sê die munisipaliteit. In verskeie interne vergaderings om die ontwikkeling te bespreek, het die destydse waarnemende uitvoerende hoof me. Jennifer Comalie gesê die munisipaliteit sou verantwoordelik word vir die verbande as die grond teruggevat word. Reeds in 2020 het mnr. Fillemon Hambuda gesê die stadsraad wil foute vermy soos die bekende Hilton-transaksie, toe wat grond teen afslag beskikbaar gestel is vir groot wins deur ontwikkelaars herverkoop is.Jacobs sê egter soortgelyke foute word steeds begaan. “Dit hang seker af van wie jy is. Ek het vir my grond betaal, maar aan baie van my bure is groot stukke grond toegeken, sonder dat hulle al ooit ’n sent betaal het. “Ek dring daarop aan die munisipaliteit al die kontrakte in Rocky Crest ontbloot. Só sal ons sien wat vir die een geld, word nie vir almal toegepas nie,” sê hy.– augetto@republikein.com.na

Waterpark-droom loop droog

Kommentaar

Republikein 2025-04-18

Meld asseblief aan om kommentaar te lewer

Waterpark-droom loop droog

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie