Gehalte-onderrig boaan AU-agenda

Tuyeimo Haidula in Addis Abeba – Terwyl Afrikalande steeds worstel met die voorsiening en toegang tot gehalte-onderrig, het die Afrika-Unie (AU) en vennote ’n beroep gedoen op nougesette pogings vir ’n digitale transformasie van onderwysstelsels.

Dit, het hulle gesê, sal billike en inklusiewe onderrig bevorder.

Die gesamentlike beroep is verlede Woensdag by die opening van die 44ste gewone sitting van die AU se uitvoerende raad by die AU se hoofkantoor in Addis Abeba, Ethiopië, gemaak.

Die tema van die vergadering was “Leer ’n Afrikaan wat geskik is vir die 21ste eeu: Bou veerkragtige onderwysstelsels vir verhoogde toegang tot inklusiewe, lewenslange, kwaliteit en relevante leer in Afrika”.

Claver Gatete, die Verenigde Nasies (VN) se ondersekretaris-generaal en uitvoerende sekretaris van die Ekonomiese Kommissie vir Afrika (ECA), het gesê Afrika is getuie van ’n digitale verskuiwing in die wêreldwye arbeidsmag.

Hy het gesê daar is geen twyfel dat dit goeie besigheidsin maak om beleggings in Afrika se onderwysstelsel uit te brei na gebiede wat produktiewe vermoëns verbeter en globale mededingendheid bevorder nie.

Gatete het gesê volhoubare industrialisasie en ekonomiese diversifikasie bly die belowendste kanale vir werk en welvaartskepping.

“Innovasie sal die grondslag wees om dit te bereik. Daarom is die opskerping van onderrig, veral beleggings in wetenskap, tegnologie, ingenieurswese en wiskunde (STEM) en tegniese en beroepsonderrig en opleiding (TVET), onontbeerlik om die vereiste produktiewe vermoëns op te bou. Om die Afrika-vryhandelsooreenkoms (ACFTA) te laat werk, het ons ’n vaardigheidsrewolusie nodig wat deur wetenskap, tegnologie, ingenieurswese en innovasie ondersteun word,” het hy gesê.

Gatete het gesê Afrika kan nie bekostig om “klein te speel” te midde van die vierde nywerheidsrewolusie nie, en dit moet ’n dryfveer wees of die risiko loop om nog ’n geleentheid mis te loop.

Hy het gesê die vasteland kan tegnologiese vermoëns opbou om waardetoevoeging in strategiese sektore, soos landbou, vervaardiging en globale gesondheid, te bevorder.

Gatete het benadruk dat Afrika dringend sy beloftes in tasbare optredes moet omskep.

Bankole Adeoye, die AU se kommissaris vir politieke aangeleenthede, vrede en veiligheid, het Woensdag soortgelyke sienings gedeel en gesê dit is van kritieke belang vir Afrikalande om te prioritiseer en in onderrig te belê.

“Onderrig sal die gesig van die vasteland verander en onbeperkte geleenthede bied, veral vir meisies,” het Adeoye gesê en bygevoeg dat onderrig die sleutel is om die siklus van geweld in Afrika te breek.

Hy het gesê toegang tot gehalte-onderrig rus individue toe om betekenisvol tot hul gemeenskappe by te dra, aan konstruktiewe dialoog deel te neem en nie-gewelddadige oplossings vir konflikte te vind.

AU-BERAAD VEREER GEINGOB SE BYDRAES

’n Oomblik van stilte is vir Namibië se ontslape president, Hage Geingob, tydens die opening van die 37ste gewone beraad van staat- en regeringshoofde van die Afrika-Unie (AU) in Addis Abeba in Ethiopië, gehou.

Die beraad, wat Saterdag geopen en Sondag afgesluit het, het Geingob vereer vir die bydraes wat hy tot die Afrika-vasteland gemaak het. Geingob is as ’n “groot vegter” beskryf.

Moussa Faki Mahamat, die voorsitter van die Afrika-Unie-kommissie, het gesê Geingob se bydraes sal dien as ’n voortdurende herinnering aan die edele werk wat hy vir die vasteland gedoen het.

– [email protected]