Toep help met tale

Henriette Lamprecht - Duisende mense oraloor die wêreld kies om ’n ekstra taal of selfs twee aan te leer. Die redes kan wissel van nuwe loopbaan- en sakegeleenthede, om jouself met ’n ander kultuur te verryk of om na nuwe, vreemde plekke te reis. Danksy ’n Namibiese aanlyn platform kan jy nou sessies bespreek vir ’n tutor wat jou op ’n een-tot-een-basis via ’n regstreekse video-uitsending leer. Dieselfde geld as jy wil registreer om op jou beurt as ’n tutor op te tree. Die toepassing fokus op tale in die Suider-Afrikaanse Ontwikkelingsgemeenskap (SADC) en sluit Afrikaans, Oshiwambo, Otjiherero, Silozi, Duits, Rukwangali, Tswana, Engels, Zoeloe en Xhosa in. Om ’n taal aanlyn te onderrig is een van die maklikste dinge om te doen, want dit verg nie ingewikkelde vaardighede nie en kan vanaf enige plek gedoen word, sê alingo se bemarkings- en kommunikasiebestuurder, Mika Lukas. “Die toepassing [alingo] werk deur taalleerders met taaltutors te verbind,” verduidelik Lukas. “Tutors word deur studente bespreek en betaal om hulle ’n taal aanlyn te leer. Dit beteken ’n tutor in Namibië kan ’n student in Brasilië Afrikaans leer.”Die student betaal die tutor per uur, met tutors wat tot N$250 per uur kan verdien. Om as ’n tutor op alingo te registreer, betaal tutors ’n eenmalige registrasiefooi van N$50. Die oomblik wanneer hulle geregistreer is, ontvang hulle 100% van hul onderrigkoste. Lukas sê ’n taalkwalifikasie is nie verpligtend nie en die vereistes is ’n rekenaar of slimfoon en internettoegang. “Tutors hoef nie 24 uur-toegang tot die internet te hê nie, internet word net vereis wanneer jy lesse aanbied.”Volgens Lukas is dit ’n maklike manier om geld te verdien deur lesse op alingo aan te bied. “Met werkloosheid onder jongmense wat al hoe meer toeneem, raak alternatiewe maniere om ’n inkomste te verdien en wat aanlyn onderrig insluit, al hoe gewilder. “Selfs mense wat voltyds werk en ’n ekstra inkomste wil verdien, kan op alingo registreer en ná werk tale onderrig.”Vir meer inligting besoek die webtuiste www.alingo.co.za. – henriette@republikein.com.na

Toep help met tale

Kommentaar

Republikein 2025-04-04

Meld asseblief aan om kommentaar te lewer

Toep help met tale

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie