FAK span weer seile vir ekspo

Dis weer tyd vir die Federasie van Afrikaanse Kultuurvereniginge (FAK) se jaarlikse Internasionale Afrikaans-Ekspo wat vir die negende jaar aangebied word. Die Ekspo is ‘n opwindende skryf- en kunskompetisie wat veral fokus op leerlinge en studente se kreatiewe gebruik van Afrikaans. Vanjaar se tema is skepe. “Skepe word van die vroegste tye af gebruik om goedere en mense van een punt na ’n ander te vervoer. In 1652 het Jan van Riebeeck met vyf skepe in die Kaap aangekom. Vandag, presies 370 jaar later, wil ons hê julle moet jul kreatiwiteit inspan om vrye teuels aan dié tema te gee,” lui ’n verklaring deur die FAK. Die tema sluit alles verwant aan skepe, van die vaartuig self, tot die seile, kraaines en anker, in. Buiten vir dié vaartuig self, is die moontlikhede eindeloos om “lewe” aan hierdie tema te gee. Daar is tien inskrywingskategorieë. Jy kan jou verfkwaste of potlode inspan om jou idee op ’n doek vas te vang, agter jou kamera inskuif en jou beste kiekie neem, of ’n storie oor skepe neerpen. Verwante woorde soos skeepvaart, handelsvloot, skeepvaartbedryf, seehandel, seevervoer en bote kan ook wind in jou kreatiewe seile blaas. Buiten vir die nuwe tema, is daar in 2022 ook twee nuwe windmakerige kategorieë, naamlik lirieke en grafiese ontwerp waarin jy dié tema kan uitleef. Die ander kategorieë is: dagboekinskrywings, resensies, opstelle, kortverhale, poësie, voordrag, fotografie en kuns, wat skilder- en tekenkuns insluit. Enige persoon wêreldwyd van graad R tot en met die ouderdom van 25 wat Afrikaanssprekend is of ’n liefde vir dié taal koester, kan deelneem. Dit sluit alle moedertaal en niemoedertaalsprekers in. Graad R tot 3 kan vir voordrag en kuns inskryf; graad 4 tot 5 kan aan fotografie, poësie, voordrag, lirieke en kuns deelneem; en vanaf graad 6 tot die ope afdeling (tot 25 jaar oud) kan in al tien kategorieë deelneem wat in die handleiding gevind kan word. Jy kan ook twee tot drie inskrywings by een kategorie inskryf en in verskeie kategorieë deelneem. Wat vanjaar ook anders maak, is dat die publiek uiteindelik vir die algehele wenners sal kan stem. Maak dus seker dat jy die tema perfek versinnebeeld of op ’n skilderdoek vasvang. Alle inskrywings, behalwe die kunswerke, moet aanlyn by projekte.co.za ingeskryf word. Alle kunswerke moet persoonlik by die FAK-kantoor by die Voortrekkermonument in Pretoria ingedien word. Die sluitingsdatum vir aanlyn inskrywings is 29 Julie 2022. Die skool met die meeste inskrywings staan die kans om N$10 000 te wen. Algehele wenners van graad R tot 3, asook van graad 4 tot 7 wen N$1 000. Diegene van graad 8 tot 9 en 10 tot 12 sal N$1 500 wen as hulle die tema die beste beskryf, geteken, geskilder, die beste foto geneem of die beste voordrag gelewer het. In die ope afdeling kan deelnemers N$2 000 wen. Me. Esté Cilliers, projekbeamtpe van skoolprojekte by die FAK, sê: “Ons is opgewonde oor dié jaar se Internasionale Afrikaans-Ekspo! Met die tema van skepe lê die wêreld voor jou oop! Laat jou kreatiwiteit op vaart gaan. Dis gratis en jy kan wen! So, hoekom nie deelneem nie?”Kry die handleiding vir inskrywings by projekte.co.za.

FAK span weer seile vir ekspo

Kommentaar

Republikein 2025-04-18

Meld asseblief aan om kommentaar te lewer

FAK span weer seile vir ekspo

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie