Windhoek Woordfees is terug!

Nadat kunstefeeste die afgelope twee jaar deur die Covid-pandemie en gepaardgaande maatreëls lamgelê is, skud die gewilde Windhoek Woordfees nou weer vere reg vir die herfshoofstuk van dié gebeurtenis wat einde vandeesmaand afskop. Die Woordfees is nege jaar gelede vir die eerste keer aangebied en is altyd ’n hoogtepunt vir Afrikaanse kuns- en kultuurliefhebbers. “Ons wil Afrikaans vier en mense laat goed voel oor dít wat hulle vir Afrikaans doen,” sê Chrisna Beuke-Muir, wat reeds sedert 2013 ’n hoofrol in die verwesenliking van die Woordfees speel.Die fees is verlede jaar vir die tweede keer in sy spore gestuit toe streng nasionale inperkingsmaatreëls aangekondig is. Gevolglik is besluit om kleiner, meer gereelde en plaaslike produksies aan te bied, totdat groter vertonings weer toegelaat word. ‘SUS VAN’ Chrisna is welbekend in Windhoek as ’n voorloper vir Afrikaans en by hierdie eerste deel van vanjaar se Windhoek Woordfees sien ons haar weer op haar beste in ’n kragtige eenvrouvertoning met Sus van. Sus van is ’n Lot Vekemans-teks oor die Oedipus-sage soos vertel deur Ismene, sus van die heldin, Antigoné.In 2005 is die oorspronklike Nederlandse drama Zus van bekroon met die Van der Vriesprijs as beste debuuttoneelteks. Dit behels ’n uittreksel uit die mitologie, en die titel Sus van verwys na Ismene, die jongste van die vier kinders in die koningsgesin, die outjie wat in die skaduwee van haar ouer sibbes geleef het. Die drama is ’n monoloogvoorstelling van die antiheld, ’n ikoon vir mense wat nie net in terme van groot ideale dink nie, maar vir wie die kleiner momente en die emosionele motief méér is as die ideologie. Die Ismene-karakter is by uitstek ’n verteller, en haar verhaal is eg menslik met uiters genietbare humoristiese momente.MARINDA SE KOSTEATERDie gewilde Suid-Afrikaanse sjef, kosskrywer en TV-persoonlikheid Marinda Engelbrecht is vir vele Namibiërs ’n geliefde op die kassie, met haar kookprogramme soos Stoofstories op VIA, DStv kanaal 147, Laat die Potte Prut en Maklik met Marinda. Sy hou nie van vaal kos nie en selfs afval moet met ’n bietjie kleur voorgesit word. Vir haar is teater voedsel vir die siel en die kos wat sy maak, voedsel vir die liggaam.Haar produksies by die Windhoek Woordfees begin op 30 Maart met Die bak en brou tussen ma en kind, waar sy as oudonderwyseres met ma’s en kinders gaan gesels oor maklike, veilige resepte vir kinders, asook gesonde eetgewoontes en skoonmaak in die kombuis. Hierdie middag beloof kwaliteittyd met jou kind, terwyl julle albei baie slim daar sal wegstap ná die lesse van “Sjef Sout” en “Professor Pretzel”.My melk kook oor is die ideale wegbreeksessie vir vroue en ’n paar vriendinne om op humoristiese wyse te luister na die prettige pitkos wat Marinda uitdeel oor hoe om moeilike situasies in jou lewe te hanteer. Sanet Prinsloo, uithalerkok van Windhoek, maak ook ’n draai om te wys hoe Marinda se maklike resepte jou na ’n meester kan laat lyk. Ná ’n glasie vonkelwyn en hierdie goeie geselskap, sal jy beslis met ’n glimlag huis toe gaan. Die Windhoek Woordfees reis ook vanjaar na Swakopmund met hierdie program. Op Maandag 4 April word hierdie goedvoelsessie na die kus geneem, met Paula van Aarde van A la Wêreld Bakhuis wat saam met Marinda optree.Op Saterdag 2 April word potjiekoskenners uitgenooi om deel te neem aan die Pret en Prut Potjiekoskompetisie by Die Kraal (agter Bush Bar). Elke deelnemende span bring hul eie bestanddele, pot en gereedskap. Inskrywings kos N$500 per span, met ’n minimum van twee en maksimum van vier lede. Elke span moet minstens agt mense kan kos gee uit sy pot en een bord moet vir die beoordelaars uitgeskep kan word. Marinda sal tydens die kookproses ’n geheime bestanddeel aan elke span uitdeel wat ingesluit moet word in die pot. Beoordeling vind om 18:00 plaas. Gaste kan vanaf 15:00 arriveer – ’n kaartjie van N$150 sluit ’n heerlike ete in, met die dag se heerlike potte. Vermaak word verskaf deur Rias Oberholzer met sy nostalgiese program “Ek onthou nog”.SKRYWERSGESPREKKE EN OOP MIKROFOON Op Saterdagoggend 2 April vind Skrywersgesprekke plaas met ’n In Memoriam-program vir Hèléne de Kok, asook gesprekke met Namibiese en Suid-Afrikaanse skrywers. Vanjaar sal die kollig veral op Namibiese skrywers wees. Die fees eindig op ’n hoogtepunt met die blootstelling van plaaslike talent deur die Oop Mikrofoon-sessies. Op Woensdag, 6 April, hanteer Rias Oberholzer die program van sang, stories en gedigte. Die Vrydagaand is die jongklomp se beurt, waar alle kwalifiserende skoolgaande kinders die gehoor gaan vermaak en Saterdag, 9 April, sien ons die ontluikende volwasse talent in Namibië.Om in te skryf vir oudisies vir die Oop Mikrofoon, stuur asseblief jou naam, van, uuderdom, tipe item, naam van item en tydsduur van die item na admin@netwerk-na.org. Die sperdatum vir inskrywings is 19 Maart. Oudisies vind plaas op 22 en 23 Maart, en deelnemers sal daarna gekontak word met meer inligting.Kaartjies vir alle vertonings is beskikbaar by www.webtickets.com.na, Pick n Pay of by die deure. Die volgende spesiale aanbod is van toepassing as jy meer kaartjies wil koop:&bull; As jy ’n totaal van 10 kaartjies en meer (van dieselfde item óf verskillende items) koop, ontvang jy 40% afslag op die totale prys van die kaartjies.&bull; As jy ’n totaal van 6 tot 9 kaartjies (van dieselfde item óf verskillende items) koop, ontvang jy 30% afslag op die totale prys van die kaartjies&bull; As jy ’n totaal van 3 tot 5 kaartjies (van dieselfde item óf verskillende items) koop, ontvang jy 20% afslag op die totale prys van die kaartjies.&bull; Pensioenarisse, skoliere en studente kry 15% afslag op kaartjies, ongeag of ’n pakket gebruik word.Die tweede deel van die 2022 Windhoek Woordfees word beplan vir 17 tot 27 Augustus, met ’n reeds opwindende program wat wag.Hou die Windhoek Woordfees en Netwerk Namibië se sosiale media-blaaie en die volgende Kollig-uitgawes dop vir meer inligting en die program.

Windhoek Woordfees is terug!

Kommentaar

Republikein 2024-11-15

Meld asseblief aan om kommentaar te lewer

Windhoek Woordfees is terug!

Kommentaar

Republikein 2024-11-15

Meld asseblief aan om kommentaar te lewer

MELD AAN

Advertensie