40 jaar van kulturele erfenis

Die !Ikhoba-tekstielprojek is in 1983 deur die susters Heide, Karin en Ute Lacheiner op hul familieplaas buite Otjiwarongo in die noorde van Namibië begin. “!Ikhoba” is die San-woord vir “gemsbok” of ’n kollektiewe woord vir “wilde diere van Afrika”. Die vrouens van die werkers op die Lacheiner-familieplaas het unieke, kenmerkende Afrika-borduurwerk geskep, dikwels geïnspireer deur die Afrika-natuurlewe, wat in groot aanvraag was en soos soetkoek verkoop het. Die Lacheiner-susters het besluit om 'n volhoubare mark vir die vroue se borduurprodukte te skep deur die !Ikhoba-tekstielprojek, waarvan soveel as 400 vroue se werk deel gevorm het. Elke borduurster het teen haar eie pas gewerk, in die gerief van haar eie huis, en unieke, borduurstukke geskep wat dan gewas en toegewerk is in pragtige dekens, T-hemde, tafeldoeke, muurbehangsels, kussingoortreksels en tafelmatjies, om ’n paar te noem. Die voltooide, geborduurde produkte word aan die publiek bemark deur verskeie afsetpunte in Namibië, insluitend die Namibia Craft Centre. In 2006 het die hoofkantoor van die !Ikhoba-projek na Swakopmund verskuif waar Heide Lacheiner-Kuhn en Mildred Kehrmann voortgaan om die produkte onder die !Ikhoba-handelsmerk te bestuur, te bemark en verder rondom dit te innoveer. Die reeks sluit tans 300 lyn-items in. Vroue in die Otjiwarongo-omgewing stuur nou hul borduurwerk na Swakopmund om afgerond te word. !Ikhoba het in die loop van sy bestaan verskeie toekennings gewen, insluitend internasionale toekennings in Duitsland vir die opheffing van vroue in landelike gebiede van Namibië. Die !Ikhoba-tekstielprojek gaan voort om helder, unieke en hoogs gesogte geborduurde produkte te produseer vir binneversiering, as geskenke, Kersversierings en verskeie handgemaakte kunsvlyt-items - gemaak van herwonne materiaal. UITSTALLING Die projek vier vanjaar 40 jaar van kulturele erfenis, en dié mylpaalgeleentheid word gekenmerk deur ’n spesiale keuse van versamelstukke, met die hand uitgesoek deur een van die stigters, wat vanaf 2 tot 28 Februarie by die Omba-galery in die Namibia Craft Centre uitgestal word. Ervaar die skoonheid en ryk geskiedenis van Namibië deur hierdie gekoesterde stukke van die !Ikhoba-versameling van naby te aanskou.