Kobus Lombard stel 'Sandskrif' bekend

“Ek voel alles behalwe wroeg oor geloof, ek hoop nie dit kom as ’n gewroeg voor nie. Inteendeel het ek juis sarkasme gebruik omdat ek voel die boodskap kom dan beter na vore,” sê die digter Kobus Lombard oor die eerste gedeelte van sy nuutste digbundel, Sandskrif.

Die eerste deel van Sandskrif is ’n versameling van gedigte oor geloof uit Lombard se pen wat met tye effens krities van sy eie geloof as Christen is.

Die gedigte sit nie eenvoudig die idee van God onder ’n vergrootglas nie, maar handel eerder oor onderwerpe soos dogma in kerke en die digter se hoop op vrede tussen onderskeie gelowe.

“Niemand besit ten volle die waarheid nie, en as jy dink jy doen, is dit hoogstens ’n voorlopige waarheid,” verduidelik Lombard.

“Daar is ’n onverdraagsaamheid tussen gelowe – ons almal glo my god is reg en jou god is verkeerd. Selfs in my eie kerk waar ons sê God is die enigste ware lewende god, is dit ’n ander manier van sê ek is reg en jy is verkeerd. . . Ek dink die Here sal verstaan as ons in geloof verskil,” het hy by die bekendstelling van sy digbundel in die hoofstad gesê.

Hoewel die titel “Sandskrif” nie met opset verwysing maak na die Christen-geloof nie, sê Lombard dat die oorspronklike titel “Ter wille van die ongesnede beeld” wel verwysing maak na hierdie debat.

“Goddank dat daar nie meer brandstapels is nie,” skerts Lombard.

Lombard sê sy hoop wanneer hy gedigte neerpen, is nie om resensente of lesers tevrede te stel nie.

“Lesers en resensente moet nie in jou agterkop wees nie. Natuurlik het jy ’n denkbeeldige leser in jou kop, maar dit moet nie jou prioriteit wees nie. Jy moet toelaat dat die gedig homself skryf,” sê hy.

Lombard meen die verantwoordelikheid wat ’n skrywer teenoor sy lesers het, is om te sorg dat ’n leser hul skryfwerk kan verstaan, eers ná die skryfproses in ag geneem word.

– [email protected]