Laat jou stem tel vir Walvisbaai

Die Kwêla-aanbieder Johnny Davids, vergesel deur &#039;n produksiespan, het Walvisbaai besoek om inhoud op te neem vir &#039;n episode van die Kwêla Dorp van die Jaar-kompetisie. Davids, wat in Walvisbaai gebore en getoë is, sê daar is &#039;n beduidende verskil in vanjaar se kompetisie. Dit is dat die wenner kan besluit hoe die kontantprys van N$1 miljoen gebruik kan word om die dorp te verbeter. &#039;n Verdere N$1 miljoen is ook op die spel vir advertensie en bemarking wat deur kykNET geborg word om die gekose dorp as toeristebestemming te bemark. &#039;n Reuse partytjie vorm ook deel van die wenpakket, met sommige van Suid-Afrika se topkunstenaars wat die wendorp vir die spesiale geleentheid sal besoek. Davids sê Walvisbaai is vanjaar Namibië en die Erongostreek se keuse. Die kompetisie word reeds die afgelope 15 jaar aangebied."Verskeie dorpe in Namibië is genomineer en vanjaar het Walvisbaai die oog gevang. Al agt provinsies in Suid-Afrika nomineer ook dorpe en kompeteer vir &#039;n fantastiese prys. Die benoemde dorpe moet egter minder as 500 000 inwoners hê en mag nie &#039;n streekwenner in die laaste twee jaar gewees het nie," verduidelik Davids. Uit elke streek het die drie dorpe met die meeste nominasies na die semi-finale rondte in April gevorder. Die publiek het toe die geleentheid gehad om vir hul gunsteling uit die drie semi-finaliste te stem. In dié rondte is net 30 teksboodskappe per nommer toegelaat. Die dorp met die meeste stemme verteenwoordig die kompeterende streek as finalis in die finale rondte.Wanneer al nege dorpe hul verskyning op Kwêla gemaak het, sal die publiek vanaf 18:00 op 16 Julie tot 12:00 op 21 Julie die geleentheid kry om vir hul wendorp te stem. Die wendorp word op 30 Julie op die Kwêla-program op kykNET aangekondig. Die dorp met die meeste stemme word as die Kwêla Dorp van die Jaar gekroon. Davids het Namibiërs aangemoedig om uit te kyk vir die program oor Walvisbaai wat in die komende weke op Kwêla uitgesaai gaan word. "Die oomblik wat die program uitgesaai word, open die stemlyne en kan enige Namibiër stem. Die hele land het agter Hentiesbaai en Swakopmund gestaan en verseker dat hulle die kompetisie wen. Die verskil nou is dat toe hulle die kompetisie gewen het, was die finansiële inspuiting van N$1 miljoen nog nie op die tafel nie."Volgens Davids het die Namibiese hawedorp alles wat nodig is om te wen."Ek het hier grootgeword en het onlangs teruggekeer en plekke in Walvisbaai ervaar wat ek nie geweet het bestaan nie. Een voorbeeld is Donkiebaai. Ek het nooit geweet dit is eintlik &#039;n branderplankryer se paradys nie! Ek het ook dinge ervaar en gehoor oor Walvisbaai se toekoms wat my baie opgewonde maak. As ons almal net saamwerk, gaan ons almal op die ou einde baie gelukkig wees!" Vorige dorpe wat as wenners aangewys is, mag vir ses jaar ná hul oorwinning nie aan die kompetisie deelneem nie. Hentiesbaai is in 2016 as wendorp gekroon en Swakopmund in 2019. - republikein@republikein.com.na

Laat jou stem tel vir Walvisbaai

Kommentaar

Republikein 2025-04-09

Meld asseblief aan om kommentaar te lewer

Laat jou stem tel vir Walvisbaai

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie