ˊn Unieke kunskuier op Swakopmund

Swakopmund sal eerskomende Saterdagaand weer wemel van kunsliefhebbers met die terugkeer van die gewilde Night of the Galeries.

"Ons verwag besoekers vir die Paasnaweek en al die galerye het uitstallings aan die gang. Ons het probeer om mededinging te vermy en samewerking moontlik te maak met die Night of the Galleries," sê Heide-Marie Lacheiner-Kuhn van die Swakopmundse Kunsvereniging.

Haar dogter, die kunstenaar Anne Lacheiner-Kuhn, vertel dit is bemoedigend om die geesdrif in die kunsbedryf op die kusdorp te sien.

"Swakopmund word steeds gesien as ˊn aftreeoord, so dit is goed om te sien hoe al die galerye en winkels bymekaar kom om ˊn aangename geleentheid vir die gemeenskap aan te bied," sê Anne.

Night of the Galleries skop om 16:30 af by die Swakopmund Aftreeoord in Ocean View voordat dit aanbeweeg na die Art Stop-galery en die Ivanoff Erb- fotogalery.

Om 17:00 kan ˊn groepuitstalling by die Kamma Kuns en Ontwerp-galery besigtig word, gevolg deur 'n besigtiging om 17:30 by die Fine Art Gallery in Sam Nujoma-rylaan. Rogl Souvernirs is die volgende stop voordat Coral van der Plas by Die Muschel sy boek Swakopmund - Those were the days bekendstel.

Volgende is 'n besoek aan Imke Engelhard se juweliersateljee gevolg deur 'n draai by haar galery in Ankerplatz. Volgende op die roete is Primal Art voordat ˊn kunsuitstalling om 19:00 by die Woermannhaus-kunsgalery open. Die kunsroete kronkel dan na The Trading Post in Libertina Amadhila-rylaan, gevolg deur ˊn besoek aan die Swakopmund Museum, waarna die aand afgesluit word by Prinzessin Rupprecht Heim. - [email protected]