#PasIn: 'Side by Side'-uitstalling is terug

Die jongste uitgawe van die Side by Side-uitstalling open op 6 Junie by die Sweet Side of Thingz-kafee in die hoofstad.

In hierdie uitstalling word kunswerke van Nicky Marais en Jakobina Gideon ten toon gestel.

Die twee het vir die eerste keer in 2022 by die Bakers Bay-kunstenaarslypskool in die Tsau //Khaeb Nasionale Park (Sperrgebiet) ontmoet. In die aanloop tot hierdie uitstalling het die twee kunstenaars gekies om weer saam te woon en saam te werk, om ateljeeruimte te deel en van mekaar se praktyke te leer.

Marais se artistieke loopbaan strek oor byna drie dekades, terwyl Gideon 'n relatiewe nuweling op die Namibiese kunstoneel is.

Ten spyte van die verskil in hulle ouderdomme en ervaring vind hierdie twee kunstenaars harmonie in mekaar se werk. Albei kunstenaars is skilders en werk dikwels met abstrakte motiewe. Waar Marais inspirasie put uit die voorwerpe en simbole in die wêreld om haar, neem Gideon se werk 'n meer formalistiese benadering deur vorms te gebruik om komposisies te skep wat selfstandig en selfverwysend is.

Hierdie uitstalling is die tweede in die 2023 Side by Side-uitstallingsreeks wat deur die StArt Art-galery saamgestel is.

Almal is welkom om die uitstalling by te woon. Toegang is gratis.