Agribank gee reddingsboei vir kliënte

Agribank het gister sy droogtehulpsubsidie ten bedrae van N$104,6 miljoen bekend gemaak. Dit sal in die vorm van ’n paaiementverligting en kwytskelding van ’n boeterente vir sy kliënte wees.Volgens die uitvoerende hoof van die bank, dr. Raphael Karuaihe, behels die eerste ingryping paaiementverligting wat beperk is tot Agribank-kliënte met landbougrond- en veeleningsrekeninge. “Die paaiementverligting teiken kliënte wat ’n goeie reputasie het en wie se paaiemente vanaf 1 April 2024 tot 31 Maart 2025 betaalbaar is. Kliënte wat tussen 1 April 2023 en 31 Maart 2024 agterstallig geraak het, sal ook oorweeg word,” het Karuaihe gesê. “Rekeninge van kwalifiserende kliënte sal ten volle gekrediteer word soos en wanneer paaiemente verskuldig is, en agterstallige rekeninge sal met onmiddellike effek gekrediteer word. Die totale verbintenis vir hierdie ingryping is N$104,6 miljoen.”Volgens die uitvoerende hoof behels die tweede ingryping dat Agribank sal afstand doen van boeterente ten bedrae van ongeveer N$83 miljoen vir hierdie finansiële jaar (April 2024 tot Maart 2025) vir al sy agterstallige kliënte.“Uitdagende tye staar ons in die gesig vir beide ons kliënte en die bank. Ons wil hê dat albei moet oorleef, en ons probeer baie oorwegings balanseer om te verseker dat ons kliënte ’n mate van ruimte kry om deur hierdie moeilike tydperk te kom,” het Karuaihe gesê.Die meeste van Agribank se kliënte (80%) op sy leningsboek is veeboere in kommunale landbougebiede. Volgens die bank sal 1 134 uit sy 2 634 kliënte (43%) voordeel uit hierdie subsidie trek, met ’n kumulatiewe bedrag van agterstallige lenings van tussen N$1,1 miljard en N$1,2 miljard.AKUTE VOEDSELONSEKERHEIDIntussen het die kantoor van die eerste minister sy droogtesituasieverslag vir Junie bekend gestel wat aandui dat akute voedselonsekerheid sowat 1,4 miljoen mense (48%) van die bevolking tussen Julie en September in die gesig staar. Altesaam 1 835 gevalle van hongersnood is volgens die verslag aangemeld.Die droogtehulpprogram sal die regering ’n beraamde meer as N$1,3 miljard kos. “Altesaam 341 855 huishoudings sal onder die droogtehulpprogram val van wie 33 105 gemarginaliseerde Namibiërs is,” lui die verslag. – francoise@nmh.com.na

Agribank gee reddingsboei vir kliënte

Kommentaar

Republikein 2025-04-04

Meld asseblief aan om kommentaar te lewer

Agribank gee reddingsboei vir kliënte

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie