Aranos-meisie slaan slag in afslaerskursus

“Al wat ek wil sê, as jou drome jou nie bangmaak en tot slapelose nagte dryf nie, is dit nie groot genoeg nie.”Só gesels die 19-jarige Annette Steyn van Aranos, wat onlangs die eerste Namibiese vrou geword het om ‘n afslaerskursus by die Suid-Afrikaanse Kollege vir Afslaers (Saca) af te lê. Boonop was sy ook die jongste vrou ooit om die kursus suksesvol te voltooi en daarby ŉ goue sertifikaat te ontvang. Sy het pas, as ŉ splinternuwe afslaer, van Johannesburg teruggekeer, waar sy verlede week haar opleiding ontvang het.“Die Sondag voor die kursus begin het, het ek vir my ma gesê: ‘Mamma, ek dink ek het ŉ fout gemaak.’“Toe begin ek in myself twyfel, want ek is glad nie goed daarmee om voor mense te praat nie – my kop slaan toe, my tong knoop. “Toe sê sy dit is nou te laat, ek moet nou maar deurdruk. “Ek het myself verbaas,” vertel sy. Annette sê tydens die kursus moes sy ook ŉ paar seksistiese opmerkings die hoof bied, soos onder meer dat afslaerswerk nie vir vrouens is nie en sy dalk eerder ŉ onderwyser moes word. “Dit is egter lekker om mense verkeerd te kan bewys,” sê sy. VEEVEILINGSDie feit dat sy met diere kan werk, asook ŉ bietjie met mense en nooit in ŉ kantoor hoef te sit nie, was vir haar die grootste trekpleister van die beroep. “Ek is nie ŉ kantoormens nie, ek wil tussen diere wees, ek wil buite en in die natuur wees,” sê Annette.Sy sê haar mikpunt is om eendag by Agra as ŉ afslaer te kan werk. Sy wil graag ŉ afslaer by veeveilings wees. “Jy kry verskillende kategorieë en jy kan in een of in almal spesialiseer,” verduidelik sy. “My passie lê by diere,” sê sy. Annette sê daar bestaan ook afslaer-kategorieë soos onder meer pluimvee, losgoed, vee, huise, plase en karre. Sy sê haar keuse het te doen met die feit dat sy op ŉ plaas grootgeword het. “My liefde lê nog altyd by diere.” Annette sê sy wou aanvanklik ŉ veearts geword het, maar verlede jaar tydens haar rekord-eksamen, het sy saam met haar pa na ŉ veiling op Koës gegaan. “Daar het ek vir oom Deon Klopper gesien. Ek het besef dit is wat ek wil doen,” sê sy.Sy werk op die oomblik op hul familieplaas, Aandster, vir haar pa, Pieter. “Ek het nou my kursus voltooi en ek wil minstens ŉ paar veilings doen sodat ek in oefening bly, want ŉ mens kan dit verleer.”KURSUSAnnette sê die afslaerkursus is ŉ baie praktiese, maar intense kursus.Tydens die opleiding moes hulle ŉ klomp rympies en getalle kon opsê. Hulle het ook bykans 200 items tydens hul kursus opgeveil – wat net sowat vier dae lank was. Sommige daarvan was net oefensessies, maar hulle moes reeds teen die einde van die tweede dag hul eerste werklike losgoedveiling hanteer. Hulle het ook in ŉ kroeg onder meer wyne en kristalglase vir liefdadigheid opgeveil. Sy sê ŉ afslaer begin met opwarming – hulle moet rympies van voor na agter en agter na voor sê. “Jy moet ook jou produk ken en ook weet wat die waarde daarvan is. Jy moet duidelik praat en jou voorkoms is belangrik.” – elvira@republikein.com.na

Aranos-meisie slaan slag in afslaerskursus

Kommentaar

Republikein 2025-04-07

Meld asseblief aan om kommentaar te lewer

Aranos-meisie slaan slag in afslaerskursus

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie