Geluk . . is ’n tuisnywerheid

Vir Frans en Elmarie du Raan, het ’n plan, wat uit nood gebore is toe die Covid-19-inperkings hul toerisme-onderneming sleg gevang het, nou in ’n belowende geleentheid verander – en hulle kan nie voorbly nie.Buiten dat die Happiness is Homemade-deli op Grootfontein ‘n droom van Elmarie bewaarheid, bied dit ook ‘n afsetpunt vir die produksie van boere in die noorde van die land.Die Du Raan-egpaar maak onder meer verskeie ingelegde produkte, konfyte, souse, blatjang en koop verskeie eg-Namibiese produkte van boere in die omgwing aan, naamlik aarbeie uit Okahandja, bloubessies van Mashare asook kwepers, waatlemoene, kumquat, perskes, tamaties, druiwe, appelkose, suurlemoene, heuning en piesangs.“Al wat ons gebruik wat nie eg-Namibies is nie, is glasbottels. Ons koop dit wel plaaslik aan, maar dit word ingevoer,” het Elmarie vertel.“Daar is talle plaaslike produkte uit die omgewing. Ons wil hê die mense moet gemotiveerd wees om te vra wat hulle vir ons kan plant om in te lê en watter produkte ons kan maak uit dít wat hulle beskikbaar het.”Elmarie nooi boere en mense uit die gemeenskap om hul produkte aan haar bekend te stel.“Die winkel is nie net vir ons nie, dis om die gemeenskap te voed en bymekaar te bring.“Ons sit in die Mieliedriehoek en daar is bitter baie daarbuite wat nog bemark en gemaak moet word,” sê sy.WAS DIT NIE VIR COVID “Was dit nie vir Covid nie, sou ons nooit tyd gehad het om hiermee te begin nie,” sê Frans oor Happiness is Homemade.Beide Frans en Elmarie het uitgebreide ervaring in die toerismebedryf, met Elmarie wat ook sjefopleiding ontvang het.Nadat hulle getroud is, het hulle hul eie toerisme-onderneming genaamd Weavers Tourism and Marketing Services gestig, wat besprekings en bemarking vir Namibiese bestemmings doen. Die Covid-pandemie het Weavers egter ‘n gevoelige knou toegedien en hulle moes “uit die boks dink”.Hier het Elmarie se vaardighede in die kombuis hulle handig te pas gekom en hulle het met ’n tuisnywerheid van die huis af begin, terwyl hulle steeds die toerisme-onderneming, wat toe veel stiller was, op die kantlyn bedryf het.“Dit was lang ure en ons het laataande gewerk,” vertel Frans.“Ons het besef daar is ‘n vraag na tuisprodukte, want mense het nie tyd om te kook nie. Ons het ook toe met die bottelbedryf begin – die konfyte en ingelegde produkte. Dit het begin groter raak.”Frans sê mense het ‘n behoefte vir iets nuuts, maar ook tradisioneel.Elmarie sê sy het lank daaroor gedink en op die naam “Happiness is homemade” besluit.“As jy gaan dink oor tuisgemaakte items, laat dit jou terugdink aan jou kinderdae. Jy het al hierdie lekker goed by ouma en ma gekry. Tuisgemaak is net lekkerder as ‘fabriek-gemaak’,” sê sy.DROOM Elmarie sê dit was nog altyd haar droom om ‘n koffiewinkel te hê, maar ‘n anderse een, waar mense ‘n gevoel van nostalgie, familie en dat hulle behoort, kry. Sy meen Grootfontein met sy boeregemeenskap, is die ideale plek om haar droom te verwesenlik.“Ek het geglo in my droom. Ek het geglo ons kan dit doen. Dit gaan nie elke dag maanskyn en rose wees nie, daar is baie trane en sweet daarin.”Sy sê sonder die hulp van mense soos haar suster en werknemers, sou dit nie moontlik gewees het om die droom te verwesenlik nie.Sy sê mense moenie in hul omstandighede vaskyk nie, maar moet glo. Sy meen mense moet bereid wees om hard te werk en nie hande gevou te sit nie. Staan op, baklei vir dit wat jy wil hê en leef daarvoor.“As jy ‘n droom het, leef vir dit. Moet dit nie bêre vir môre nie. Jy alleen is die meester van jou meesterstuk,” sê sy.Elmarie sê nog ’n droom van haar is om ‘n konfytketel te koop.“Ek wil die eerste vrou in die land wees wat ‘n kleinskaalse konfytfabriek begin. Nie om my te bevoordeel nie, maar om ons streek te bevorder.As sy byvoorbeeld bloubessies kook, maak sy tot 200 bottels op ‘n slag op ‘n paar stoofplate.TOERISME Frans meen toerisme gaan vanjaar kop optel, met die Covid-inperkings wat (hopelik) iets van die verlede is. Hy sê vlugte vir Oktober en November en selfs vir Julie, is volbespreek.“Ek glo daar is ‘n herlewing op pad. Die mense oorsee sê hulle wil reis. Namibië is aan die bopunt van almal se lys. Namibië is uniek,” het hy gesê.Die Du Raans meen Covid moes gebeur het.“Ons het té gemaklik begin raak. Dit het my geleer om uit die boks te dink,” vertel Elmarie.Frans meen talle toerisme-ondernemings het seergekry en dat die herstelproses ‘n jaar of meer kan neem.“Dinge het verander, ‘n mens moet nou anders dink as in die verlede. As dinge egter weer aan die gang is en die volume is daar, glo ek dit sal weer gaan soos ons dit geken het in 2019 en voor dit.“Ons moet nou as ‘n gemeenskap saamstaan. Hulle sê mos ‘local is lekker’, so ondersteun ‘local’,” sê Frans. – elvira@republikein.com.na

Geluk . . is ’n tuisnywerheid

Kommentaar

Republikein 2025-03-17

Meld asseblief aan om kommentaar te lewer

Geluk . . is ’n tuisnywerheid

Kommentaar

Republikein 2025-03-17

Meld asseblief aan om kommentaar te lewer

MELD AAN

Advertensie