Hardapskema kan weer 100% besproei
NamWater het in oorleg met die ministerie van landbou, water en grondhervorming die versoek van die Hardap-boerevereniging goedgekeur om besproeiingsvoorsiening by die Hardapskema tot 100% te verhoog.
Ná goeie neerslae sedert 10 Februarie en aansienlike invloei het die vlak van die Hardapdam gistermiddag op sowat 23% gestaan.
“Dit is goeie nuus vir Hardap!” het die voorsitter van die boerevereniging, Dawie de Klerk gister aan Network Media Hub (NMH) gesê.
Hy het bevestig die opheffing het al Dinsdag in werking getree nadat die damvlak vanaf 16% tot 23% gestyg het.
“Die boere skarrel nou rond om vinnig genoeg boontjies in die grond te kry sodat ons nie die gronde laat ooplê nie,” het De Klerk gesê.
“Ons is dankbaar vir die inloop en ons vertrou daar gaan nog heelwat inloop wees om ons in staat te stel om ná die oeste weer wintergewasse soos koring te plant.”
Die besproeiingskrane vir die Hardapskema is einde Oktober verlede jaar toegedraai nadat die dam op sy laagste vlak ooit in die geskiedenis was op 6,3%.
Middel Januarie is die watertoevoer na die Hardapskema op ’n 20%-waterbesparingsbasis herstel met produsente wat 80% van hul normale waterverbruik vir besproeiing kon ontvang.
Voor die reën en invloei gekom het, was die dam volgens die dambulletin van 3 Februarie 14,8% vol (teenoor die 16,3% in die ooreenstemmende tydperk van 2024), wat sedertdien gestyg het tot 23%.
Die woordvoerder van NamWater, Lot Ndamanomhata, het in ’n verklaring beaam die opheffing volg na aanleiding van ’n omvattende droëloop-ontleding en positiewe invloei na die dam, wat besproeiingsaktiwiteite in staat stel om op volle kapasiteit voort te gaan, terwyl volhoubare watervoorsiening vir die streek verseker word.
“Hierdie besluit sal help om lewensbestaan te onderhou en werksgeleenthede in Mariental en omliggende gebiede te bewaar, wat die plaaslike ekonomie en landbouproduktiwiteit versterk,” het hy gesê.
Die Hardapdam word beskryf as die grootste lewensaar van Mariental se ekonomie.
VOORWAARDES
NamWater het besproeiingsvoorsiening by die Hardapskema vasgestel op 100% van besproeibare grond, onderhewig aan die volgende voorwaardes:
• Die totale aanbodvolume is 48 miljoen kubieke meter per jaar of 4 miljoen kubieke meter per maand.
• Wat die beskikbaarheid van besproeiingswater betref, behoort dit voldoende tot einde September 2025 te wees.
• Vir drinkwater sal daar voldoende toevoer vir huishoudelike gebruik tot Februarie 2027 wees.
• NamWater sal deurlopende monitering en gereelde droëloop-ontledings doen om die beskikbaarheid van drinkwater te verseker, selfs in die afwesigheid van verdere invloei vir twee reënseisoene.
NamWater versoek boere om voort te gaan om waterdoeltreffende besproeiingspraktyke toe te pas om langtermyn-watersekerheid te ondersteun.
“Alhoewel hierdie besluit onmiddellike verligting en ekonomiese voordele bied, bly verantwoordelike waterbestuur ’n gesamentlike prioriteit,” sê Ndamanomhata.
– [email protected]
Ná goeie neerslae sedert 10 Februarie en aansienlike invloei het die vlak van die Hardapdam gistermiddag op sowat 23% gestaan.
“Dit is goeie nuus vir Hardap!” het die voorsitter van die boerevereniging, Dawie de Klerk gister aan Network Media Hub (NMH) gesê.
Hy het bevestig die opheffing het al Dinsdag in werking getree nadat die damvlak vanaf 16% tot 23% gestyg het.
“Die boere skarrel nou rond om vinnig genoeg boontjies in die grond te kry sodat ons nie die gronde laat ooplê nie,” het De Klerk gesê.
“Ons is dankbaar vir die inloop en ons vertrou daar gaan nog heelwat inloop wees om ons in staat te stel om ná die oeste weer wintergewasse soos koring te plant.”
Die besproeiingskrane vir die Hardapskema is einde Oktober verlede jaar toegedraai nadat die dam op sy laagste vlak ooit in die geskiedenis was op 6,3%.
Middel Januarie is die watertoevoer na die Hardapskema op ’n 20%-waterbesparingsbasis herstel met produsente wat 80% van hul normale waterverbruik vir besproeiing kon ontvang.
Voor die reën en invloei gekom het, was die dam volgens die dambulletin van 3 Februarie 14,8% vol (teenoor die 16,3% in die ooreenstemmende tydperk van 2024), wat sedertdien gestyg het tot 23%.
Die woordvoerder van NamWater, Lot Ndamanomhata, het in ’n verklaring beaam die opheffing volg na aanleiding van ’n omvattende droëloop-ontleding en positiewe invloei na die dam, wat besproeiingsaktiwiteite in staat stel om op volle kapasiteit voort te gaan, terwyl volhoubare watervoorsiening vir die streek verseker word.
“Hierdie besluit sal help om lewensbestaan te onderhou en werksgeleenthede in Mariental en omliggende gebiede te bewaar, wat die plaaslike ekonomie en landbouproduktiwiteit versterk,” het hy gesê.
Die Hardapdam word beskryf as die grootste lewensaar van Mariental se ekonomie.
VOORWAARDES
NamWater het besproeiingsvoorsiening by die Hardapskema vasgestel op 100% van besproeibare grond, onderhewig aan die volgende voorwaardes:
• Die totale aanbodvolume is 48 miljoen kubieke meter per jaar of 4 miljoen kubieke meter per maand.
• Wat die beskikbaarheid van besproeiingswater betref, behoort dit voldoende tot einde September 2025 te wees.
• Vir drinkwater sal daar voldoende toevoer vir huishoudelike gebruik tot Februarie 2027 wees.
• NamWater sal deurlopende monitering en gereelde droëloop-ontledings doen om die beskikbaarheid van drinkwater te verseker, selfs in die afwesigheid van verdere invloei vir twee reënseisoene.
NamWater versoek boere om voort te gaan om waterdoeltreffende besproeiingspraktyke toe te pas om langtermyn-watersekerheid te ondersteun.
“Alhoewel hierdie besluit onmiddellike verligting en ekonomiese voordele bied, bly verantwoordelike waterbestuur ’n gesamentlike prioriteit,” sê Ndamanomhata.
– [email protected]
Kommentaar
Republikein
Geen kommentaar is op hierdie artikel gelaat nie