Hoof van Meatco se kontrak nie hernu

Ellanie Smit - Meatco se raad het besluit om nie sy uitvoerende hoof, Mwilima Mushokabanji, se kontrak te verleng wanneer dit einde Januarie aanstaande jaar verstryk nie.

Die voorsitter van die raad, Sakaria Nghikembua, het die besluit bevestig en gesê die raad het gevolglik op 19 Julie kennis aan Mushokabanji gegee.

“Die pos sal mettertyd geadverteer word en enige gekwalifiseerde kandidaat kan aansoek doen. Dit sluit Mushokabanji in,” het hy gesê.

Mushokabanji het op sy beurt gesê hy kan nie op enige navrae reageer nie en het vrae na die voorsitter van die raad verwys

Hy is sedert 2020 aan die stuur van sake by Meatco, met sy kontrak wat in 2025 tot ’n einde loop.

Dit was ’n reusevuurdoop vir dié hoogs aangeskrewe bestuurder wat vroeër die Covid-19-pandemie, droogte en ou skuld as uitdagings tydens sy ampstermyn beskryf het.

Hy was voorheen die uitvoerende direkteur van die Namibië Nasionale Boere-unie (NNFU).

Teen die einde van verlede jaar was daar “hewige druk om Mushokabanji te skors weens ’n magdom uitdagings by die maatskappy”.

Dit het gekom te midde van bewerings dat sy teenkanting van die privatisering van Meatco en sy beweerde standpunt teen die Rooilyn hom vyande in die konserwatiewe beesbedryf besorg het.

Meatco het onder sy leiding sy skuld drasties verminder, insluitend die skuld van N$437,3 miljoen aan die Ontwikkelingsbank van Namibië wat afbetaal is. Ten spyte hiervan bly die maatskappy onder geweldige finansiële druk.



VERGADERING

Intussen het ’n vergadering op 24 Julie tussen die Lewendehawe-produsenteorganisasie (LPO), Meatco en rolspelers in die voerkraalbedryf plaasgevind om die onlangse prysverlagings en drastiese penalisering op grond van gewig, vetheid en bouvorm van beeste by Meatco te bespreek.

Die LPO se voorsitter, Jako van Wyk, sê in ’n verklaring die doel van die vergadering was om konstruktiewe voorstelle aan Meatco se bestuur te maak, wat die maatskappy in staat stel om ingeligte besluite te neem om voldoende deurset vir die res van die huidige finansiële jaar te verseker.

Van Wyk sê die sleutelbeginsel wat moet geld is dat enige gewysigde pryse wat aan produsente deurgegee word, gebaseer moet wees op werklike markvereistes en -veranderings.

Hy sê dit is van die staanspoor af duidelik gemaak dat deursigtigheid noodsaaklik is om vertroue te bou.

“Meatco se onverwagse prysverlagings het die bedryf onkant gevang en was die verkeerde boodskap wat uitgestuur is,” het hy gesê.

Van Wyk sê produsente moet op hoogte gehou word wanneer daar ’n daling in pryse is en wanneer dit gaan plaasvind.

Meatco moet ’n mededingende prys handhaaf om algehele stabiliteit in die mark te verseker en moet ook buigbaar wees in ’n vinnig veranderende omgewing, volgens hom.

“Die beginsel is beklemtoon dat goeie pryse voldoende slagdiere sal lok om voortgesette deurset te lewer.”

Tydens die vergadering is daar ook indringend gekyk na die situasie van voerkrale en die belangrikheid vir hulle om ’n prys vooruit te ontvang sodat hulle die nodige beplanning kan doen en ten minste gelyk kan breek vir die res van die finansiële jaar.

“Voerkrale is van uiterste belang vir Meatco om voldoende deurset te ontvang wanneer die aanbod van beeste begin daal. Die belangrikheid van een prysstruktuur vir alle produsente is ook benadruk,” sê Van Wyk.

Verskeie voorstelle is volgens hom aan Meatco se bestuur gemaak, insluitend dat pryse vanaf November 2024 tot Januarie 2025 met N$3,15 verhoog word en pryse drie tot vier maande vooruit bekend gemaak moet word.

’n Voorstel is ook gemaak dat ’n glyskaal vir verskillende gewigsklasse, bouvorms en vetheidsgrade ondersoek moet word.

Meatco het onderneem om die voorstelle te oorweeg en om terugvoer te gee.

– [email protected]