NCA bemark vee van N$29,3 miljoen

Ellanie SmitAltesaam 3 212 beeste, 296 varke, 70 bokke en vyf skape is vanjaar tussen Januarie en April in die noordelike kommunale gebiede (NCA) by veilings en plaaslike abattoirs bemark, met ’n geraamde waarde van N$29,3 miljoen.Volgens die Vleisraad van Namibië wys dit dat die bemarking van NCA-beeste in die tydperk met 83,4% toegeneem het, in vergelyking met 2021. “Die groot toename is hoofsaaklik toe te skryf aan die uitbreking van bek-en-klouseer in die beskermingsone in Oktober 2020, wat toe bemarking belemmer het.”Gevolglik is net 532 beeste tussen Januarie en April 2021 bemark. Die Vleisraad sê dat die Namibiese lewendehawe- en vleisbedryf en sy verhouding met die NCA, voortdurend vorentoe beweeg.Volgens statistiek is 1 307 beeste op veilings in die NCA tussen Januarie en April verkoop teen ’n totale geraamde waarde van N$9,6 miljoen.Die beeste is deur 351 produsente gelewer. Van die 1 543 beeste wat by veilings geregistreer is, is altesaam 84,7% verkoop, het die Vleisraad gesê. PRODUSENTE IS GEWILLIG“Dit is ’n bewys dat NCA-produsente gewillig is om hul vee te bemark danksy die voortdurende ondersteuning van die Vleisraad, in samewerking met ander rolspelers in die bedryf asook sy streekkantore op Ongwediva, Rundu en Katima Mulilo.”Tydens dieselfde tyd in 2021, is geen veilings gehou nie weens die uitbreking van bek-en-klouseer. Die Vleisraad het verder gesê tussen Januarie en April 2022 is osse die meeste op NCA-veilings verkoop en het dit 36,88% verteenwoordig van al die diere wat verkoop is. Daarnaas was store die tweede grootste groep met 20,35%. Speenkalwers het die swakste verkoop en so ook koeie en kalwers. Dié groepe het ’n verteenwoordiging van onderskeidelik net sowat 0,08% en 0,15% gehad. Tussen Januarie en April 2022 is 1 905 beeste ter waarde van N$19,7 miljoen aan die NCA-abattoirs vir verslagting gelewer. Dit verteenwoordig ’n toename van 72%, in vergelyking met dieselfde tydperk in 2021. STRUIKELBLOKKEVolgens die Vleisraad is een van die struikelblokke vir bemarkingsgeleenthede in die NCA, die feit dat die Wêreldorganisasie vir Dieregesondheid die gebied noord van die veterinêre kordonheining uitgesluit het van gebiede wat dit as vry van bek-en-klouseer erken. Ander faktore is die uitbreking van bek-en-klouseer binne die beskermingsone, swak bemarkingsgeleenthede vir die NCA-abattoirs, wat beteken die produsente geniet swak blootstelling en ’n lae afset. Dit alles maak dit moeilik om kostevoordele te bewerkstellig wanneer produksie meer doeltreffend is. – republikein@republikein.com.na

NCA bemark vee van N$29,3 miljoen

Kommentaar

Republikein 2025-04-11

Meld asseblief aan om kommentaar te lewer

NCA bemark vee van N$29,3 miljoen

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie