Reeds N$66 miljoen in BVCF-abattoir belê
Tyd min voor beleggingsvenster sluit
Terwyl Cirrus Capital vandeesweek ʼn tweede promosietoer landswyd aanbied sodat produsente in die beplande uitvoerabattoir kan belê, neem die BVCF se ledetal daagliks toe.
Terwyl die Forum vir die Beesvleiswaardeketting (BVCF) gister optimisties was dat dit in sy doelwit gaan slaag om ʼn nuwe bees-uitvoerabattoir op die been te bring, het 147 landbouprodusente reeds N$66 miljoen hierin belê, terwyl die forum se ledetal op 415 gestaan het.
Terselfdertyd bied Cirrus Capital vandeesweek ʼn tweede promosietoer landswyd aan, sowat twee en ʼn halwe weke vóór die sluitingsdatum vir beesprodusente om in die abattoir te belê, op 24 Junie aanbreek.
“Die tyd raak min vir produsente om te belê,” het mnr. Udo Düvel, ʼn lid van die BVCF-taakspan, gister aan Republikein gesê. Hy sê Cirrus Capital dryf hierdie tweede promosietoer, maar daar sal ʼn lid van die BVCF by elk van die geleenthede wees “om vir oulaas nog ordentlike werwing te doen”.
“Ons hoop om met die tweede promosietoer opnuut momentum op te bou. Ons mikpunt is om op die minste N$90 miljoen se beleggings te werf. Ons hoop egter op meer as N$100 miljoen se beleggings, want hoe meer ons nou kan inkry, hoe laer is die finansieringskoste en hoe beter is ons vooruitsigte vir die toekoms,” het Düvel gesê.
“Daarom wil ons boere oorreed om hierby in te koop, ons moet ook aan ons volgende generasie dink en aan ʼn beter ‘vleistoekoms’ vir Namibië werk,” sê hy.
Die BVCF se taakspan, onder leiding van mnr. Mecki Schneider, werk reeds twee jaar lank aan die plan – op hul eie onkoste.
“Ons is geesdriftig en entoesiasties hieroor. Ons het ook ‘slim manne’ betrek om die doelwit van nog ʼn uitvoerabattoir te bereik. Ek dink ons is op die regte pad en ons sal hierin slaag,” het hy gesê.
KRITIEKE PUNT
Düvel sê die Namibiese vleisbedryf is nou in ʼn kritieke stadium.
“Die rooi ligte gaan aan. Veral die uitvoer-slagbedryf is vir ons op die oomblik op ʼn ‘seer punt’. Ons móét ʼn nuwe uitvoerabattoir stig.”
Düvel sê Savanna Beef Processors sal die kapasiteit hê om sowat 50 000 beeste per jaar te slag, met oorsese nismarkte as die teikengroep.
“Die slagpryse moet teruggewerk word na die produsente toe. Ons beplan om die beste pryse vir produsente te betaal en alle aandeelhouers sal voorkeur-slagbeurte kry; die beste prys, asook ’n 3% opbrengs op sy aandeel,” het Düvel gesê.
Hy is van mening, as die beste pryse aan produsente uitbetaal word, dit tot voordeel van die hele land sal strek.
“Die platteland sal ekonomies opgehef word en binne die vleisbedryf word dit selfs deur speenkalfprodusente as risiko-verspreiding en ʼn voordeel beskou,” sê hy.
“Ons het egter beheer oor ons vleisbedryf verloor. Vleisprodusente het geen seggenskap meer oor hul eie produk nie. Ons produk is uniek in die wêreld – vleis wat natuurlik produseer word. Ons soek die nismarkte in Europa of China of elders en wil die winste in die produsente terugploeg, wie dit eintlik toekom,” het hy gesê.
BVCF
Düvel sê die forum ervaar intussen groot belangstelling in mense wat as lede van die BVCF wil aansluit.
“Teen gisteraand het die forum 415 lede gehad. In die laaste tyd styg die aantal lede skerp.
“Dit is ook hoekom ons ʼn tweede promosietoer hou. Lede van ons taakspan woon elkeen van hierdie vergaderings by sodat ons die produsente kan motiveer om aan te sluit en aandele op te neem.”
Düvel sê die taakspan vergader elke drie weke in Windhoek om die saak te dryf.
“Ons werk tans baie hard aan ʼn ondersteuningsbasis, die forum se volgende mikpunt is 500 lede.
“Enige een is welkom om aan te sluit, dit is ʼn niepolitiese, suiwer ekonomiese forum. Ons streef slegs ekonomiese doelwitte na en hoop om die abattoir oor twee jaar van die grond te laat afkom,” het hy gesê.
TOER
Die forum het einde April ook ʼn promosietoer deur die land aangebied. Die tweede toer het Maandag op Otjiwarongo en Outjo afgeskop, terwyl twee sessies gister op Grootfontein en Otavi aangebied is.
Vandag om 10:00 word nog ʼn sessie by Cirrus Capital (35 Schanzenstraat gehou, gevolg deur ʼn tweede sessie om 14:00 op Okahandja by die Reitklub-boereverenigingsaal.
Eerskomende Vrydag word sessies by onderskeidelik Witvlei se boereverenigingsaal (10:00) en op Gobabis by die Windpomp-gastehuis gehou, en op Maandag (13 Junie) word die toer met twee sessies op Hochfeld by die Heiser-gastehuis (10:00) en Summerdown by die boereverenigingsaal afgesluit. – [email protected]
Terselfdertyd bied Cirrus Capital vandeesweek ʼn tweede promosietoer landswyd aan, sowat twee en ʼn halwe weke vóór die sluitingsdatum vir beesprodusente om in die abattoir te belê, op 24 Junie aanbreek.
“Die tyd raak min vir produsente om te belê,” het mnr. Udo Düvel, ʼn lid van die BVCF-taakspan, gister aan Republikein gesê. Hy sê Cirrus Capital dryf hierdie tweede promosietoer, maar daar sal ʼn lid van die BVCF by elk van die geleenthede wees “om vir oulaas nog ordentlike werwing te doen”.
“Ons hoop om met die tweede promosietoer opnuut momentum op te bou. Ons mikpunt is om op die minste N$90 miljoen se beleggings te werf. Ons hoop egter op meer as N$100 miljoen se beleggings, want hoe meer ons nou kan inkry, hoe laer is die finansieringskoste en hoe beter is ons vooruitsigte vir die toekoms,” het Düvel gesê.
“Daarom wil ons boere oorreed om hierby in te koop, ons moet ook aan ons volgende generasie dink en aan ʼn beter ‘vleistoekoms’ vir Namibië werk,” sê hy.
Die BVCF se taakspan, onder leiding van mnr. Mecki Schneider, werk reeds twee jaar lank aan die plan – op hul eie onkoste.
“Ons is geesdriftig en entoesiasties hieroor. Ons het ook ‘slim manne’ betrek om die doelwit van nog ʼn uitvoerabattoir te bereik. Ek dink ons is op die regte pad en ons sal hierin slaag,” het hy gesê.
KRITIEKE PUNT
Düvel sê die Namibiese vleisbedryf is nou in ʼn kritieke stadium.
“Die rooi ligte gaan aan. Veral die uitvoer-slagbedryf is vir ons op die oomblik op ʼn ‘seer punt’. Ons móét ʼn nuwe uitvoerabattoir stig.”
Düvel sê Savanna Beef Processors sal die kapasiteit hê om sowat 50 000 beeste per jaar te slag, met oorsese nismarkte as die teikengroep.
“Die slagpryse moet teruggewerk word na die produsente toe. Ons beplan om die beste pryse vir produsente te betaal en alle aandeelhouers sal voorkeur-slagbeurte kry; die beste prys, asook ’n 3% opbrengs op sy aandeel,” het Düvel gesê.
Hy is van mening, as die beste pryse aan produsente uitbetaal word, dit tot voordeel van die hele land sal strek.
“Die platteland sal ekonomies opgehef word en binne die vleisbedryf word dit selfs deur speenkalfprodusente as risiko-verspreiding en ʼn voordeel beskou,” sê hy.
“Ons het egter beheer oor ons vleisbedryf verloor. Vleisprodusente het geen seggenskap meer oor hul eie produk nie. Ons produk is uniek in die wêreld – vleis wat natuurlik produseer word. Ons soek die nismarkte in Europa of China of elders en wil die winste in die produsente terugploeg, wie dit eintlik toekom,” het hy gesê.
BVCF
Düvel sê die forum ervaar intussen groot belangstelling in mense wat as lede van die BVCF wil aansluit.
“Teen gisteraand het die forum 415 lede gehad. In die laaste tyd styg die aantal lede skerp.
“Dit is ook hoekom ons ʼn tweede promosietoer hou. Lede van ons taakspan woon elkeen van hierdie vergaderings by sodat ons die produsente kan motiveer om aan te sluit en aandele op te neem.”
Düvel sê die taakspan vergader elke drie weke in Windhoek om die saak te dryf.
“Ons werk tans baie hard aan ʼn ondersteuningsbasis, die forum se volgende mikpunt is 500 lede.
“Enige een is welkom om aan te sluit, dit is ʼn niepolitiese, suiwer ekonomiese forum. Ons streef slegs ekonomiese doelwitte na en hoop om die abattoir oor twee jaar van die grond te laat afkom,” het hy gesê.
TOER
Die forum het einde April ook ʼn promosietoer deur die land aangebied. Die tweede toer het Maandag op Otjiwarongo en Outjo afgeskop, terwyl twee sessies gister op Grootfontein en Otavi aangebied is.
Vandag om 10:00 word nog ʼn sessie by Cirrus Capital (35 Schanzenstraat gehou, gevolg deur ʼn tweede sessie om 14:00 op Okahandja by die Reitklub-boereverenigingsaal.
Eerskomende Vrydag word sessies by onderskeidelik Witvlei se boereverenigingsaal (10:00) en op Gobabis by die Windpomp-gastehuis gehou, en op Maandag (13 Junie) word die toer met twee sessies op Hochfeld by die Heiser-gastehuis (10:00) en Summerdown by die boereverenigingsaal afgesluit. – [email protected]
Kommentaar
Republikein
Geen kommentaar is op hierdie artikel gelaat nie