Savanna: Bouwerk begin dalk in Mei

Indien alles volgens plan verloop, kan bouwerk aan die Savanna Beef Processing-aanleg (SBP) dalk reeds in Mei vanjaar begin, terwyl die aanleg dan teen November of Desember 2024 operasioneel kan wees. Die konstruksiefase sal 18 maande neem.Dit aldus die jongste kennisgewing wat Dinsdag deur die Forum vir die Beesvleiswaardeketting (BVCF) se taakspan uitgestuur is.“Ons is aktief besig met ’n klomp paralelle aksies, met twee belangrike aspekte wat sedert Januarie getakel word: Die ontwerpfase van die aanleg, asook die finansiering van Savanna Beef Processors (SBP),” het die taakspan se voorsitter, Mecki Schneider, aan Republikein gesê.Hy sê tans moet daar oor dié “twee groot hekkies gespring word”.“Die eerste hekkie is die ontwerp en die werklike koste van die aanleg. Tot dusver kom ons syfers uit haalbaarheidstudies, nou werk ons met werklike koste. Die tweede hekkie is die finansiering van die aanleg,” het hy verduidelik.Schneider sê hulle hoop om teen April ’n formele, volledige plan vir SBP se aandeelhouers te kan voorlê, waarop hulle ’n besluit sal moet neem.“Hulle sal dan besluit óf en hoe ons met die projek moet voortgaan.“Ek wil egter een baie belangrike ding beklemtoon: Ons soek samewerking tussen alle belangegroepe – ook met die owerheid.“Ons het in November verlede jaar ’n baie goeie vergadering met die minister van finansies gehad, waar ons weer eens die moontlikhede van samewerking bespreek het. Ons wil met almal saamwerk om oplossings vir geleenthede in die waardetoevoeging van die beesvleiswaardeketting te vind,” het hy gesê.ONTWERPFASESchneider sê ’n versoek vir voorstelle (RFP) vir die ingenieurswerk, verkrygingsproses en konstruksie (EPC) vir die aanleg, is reeds vroeg in Desember aan drie verskillende internasionale maatskappye uitgestuur.Op 25 Januarie het die taakspan met dié drie maatskappye in Windhoek vergader – ’n voorvereiste van die tenderproses – en ook die beoogde bouperseel besoek. Van die maatskappye het reeds plaaslike verteenwoordigers vir die bou- en konstruksiefase gekies, wat die vergadering bygewoon het, terwyl ander dit persoonlik uit die buiteland kom bywoon het.“Dit is vir ons ’n topprioriteit om die ontwerp van die aanleg reg te kry. Ons wil toonaangewende tegnologie benut en die uitleg moet so optimaal as moontlik funksioneer,” het hy gesê.Schneider sê terwyl hulle internasionale maatskappye vir die aanleg se ontwerpfase genader het, wil hulle plaaslike ondernemings en kapasiteit vir die bou- en konstruksiefase benut.“Tenders vir die ontwerp van die aanleg moet teen die einde van Maart ingedien wees, sodat die ingenieurspan en konsultante dit kan evalueer en aanbevelings aan die BVCF-taakspan kan maak,” sê hy.FINANSIERING“Ons moet ook voor einde Maart sekerheid hê dat ons hierdie projek – in sy totaliteit – kan finansier,” het Schneider aan die koerant gesê.“Ons het N$174 miljoen se aandelekapitaal, ons kyk ook intensief daarna om die laaste N$26 miljoen in te win. Daardie proses is aan die gang.“Belangriker tans, is dat ons finansiële instansies soek wat bereid is om die bedryfskapitaal te dek.“Ons het verlede jaar Oktober ‘n vergadering met alle bankiers in Namibië gehad, waarna ons reeds ’n pad begin stap het met sekere van die instansies,” het Schneider gesê.PERSEEL“Ons het ook nou sekerheid oor die aankoop van die perseel. Die kontrak is geteken – dit sal aanvanklik ’n huurkontrak wees, wat eindelik in ’n koopkontrak omgeskakel sal word, sou alle voorvereistes in plek val.”Hy sê die perseel is tussen Windhoek en Okahandja langs die snelweg geleë - by die Tuefelsbach-afdraai, sowat 25 km vanaf Okahandja, op die oostekant.By die perseel word daar tans gewerk aan elektrisiteits- en watertoevoer, terwyl ’n omgewingsimpakstudie by die ministerie van die omgewing, bosbou en toerisme vir hul insae en goedkeuring ingedien is.“Ons het reeds boorgate geboor. Ons beplan ’n waterherwinningsaanleg op die perseel, want water is ’n baie belangrike faktor. Ons moet goeie gehalte water kry en afloopwater sal ook reg hanteer word,” het hy gesê.Schneider sê die BVCF-taakspan het ook ander aanvoerwerk gedoen op die perseel, wat insluit ‘n geo-hidrologiese studie oor die volhoubaarheid van die ondergrondse water-akwifer asook ’n ontleding van die ’n geologiese struktuur van die grond – wat belangrik is vir die bou van die struktuur en bevind is om aanvaarbaar te wees.“Wat die markte betref – ons bly in verbinding met die instansies, want dit is ‘n veranderende omgewing waar ons op die voorpunt moet bly,” het hy gesê.– elvira@republikein.com.na

Savanna: Bouwerk begin dalk in Mei

Kommentaar

Republikein 2025-03-14

Meld asseblief aan om kommentaar te lewer

Savanna: Bouwerk begin dalk in Mei

Kommentaar

Republikein 2025-03-14

Meld asseblief aan om kommentaar te lewer

MELD AAN

Advertensie