Verdere beleggings in Savanna

Brigitte Weidlich - Die maatskappy Savanna Beef Processors Limited (SBPL) het - afgesien van ’n nou verhoogde ekwiteit van N$280 miljoen en ’n verdere N$250 miljoen se lenings - bykomende finansiering ontvang om ’n uitvoerabattoir naby Okahandja te bou. Dit sal na raming N$479 miljoen kos. Twee bykomende bemarkingsmaatskappye het ook as vennote en beleggers aan boord gekom.

Mecki Schneider, die maatskappy se direksievoorsitter, het vandeesweek aangekondig dat ’n verdere leningsooreenkoms vir N$150 miljoen met die Suid-Afrikaanse Nywerheidsontwikkelingskorporasie (NOK) gesluit is. Die NOK-kredietkomitee het die bedrag goedgekeur ná ’n uitgebreide hersieningsproses wat etlike weke geduur het. “Die finale ondertekende goedkeuringsbrief vir die finansiering van N$150 miljoen is op 11 Desember ontvang,” het Schneider aangekondig.

VERKOELINGSTELSELS

Die groot verkoelingstelsels wat benodig word, word as ’n parallelle konstruksieprojek aangepak. Alle onderhandelinge vir buitebalansstaatfinansiering van die verkoelingstelsel is na aanleiding van ’n komplekse onderhandelingsproses onderteken en afgehandel.

Oor die kapitaal wat hiervoor verseker is het Schneider gesê: “Ons het ’n First National Bank (FNB)-rekening vir ’n bedryfskapitaal van N$100 miljoen met ’n toegewyde termyn-ooreenkoms. Dit beteken dat al die finansiële vereistes vir die ondertekening van die EPC (ingenieurs-, verkrygings- en konstruksiekontrak) beveilig sal word. Ons kan die kontrak so vinnig moontlik sluit om met die hele konstruksiefase van die slaghuis en verkoelingstelsels voort te gaan.”

BEMARKING

“Ons het ’n kontrak met ’n buitelandse bemarkingsagentskap met ’n totale waarde van nagenoeg N$40 miljoen gesluit. Hierdie bedrag moet halfpad deur die konstruksiefase voorwaardelik belê word,” sê Schneider. Daar moet egter aan ’n aantal voorwaardes voldoen word om dit te laat gebeur. “Die bemarkingsagentskap belê in Savanna en dit wys dat hy vertroue het in ons benadering as ’n onafhanklike, produsentgedrewe organisasie,” het hy verduidelik.

Nog ’n ooreenkoms is onderteken met Vortex Holdings Namibia (Pty) Ltd, ’n Duitse maatskappy. Aandelekapitaal van N$40 miljoen is met Vortex onderhandel, onderteken en afgehandel. Die maatskappy het reeds verlede week die totale bedrag oorgeplaas.

Met die beleggings van die twee bemarkingsmaatskappye het Savanna se aandelekapitaal van N$200 miljoen (van die slagbeesprodusente) met ’n verdere N$80 miljoen tot N$280 miljoen gegroei.

“Dit wys beide buitelandse beleggers het vertroue in die projek,” het Schneider gesê. Bouwerk moet aan die begin van 2024 begin en grondverskuiwingswerk het reeds begin.

- [email protected]