Esau getuig oor 'omkoopgeskenk'

“Wanneer jy in hoë posisies kom, probeer mense jou omkoop. Ek moes die speletjie speel.”

So het die voormalige minister van visserye en mariene hulpbronne, en nou Fishrot-beskuldigde, Bernhard Esau, Dinsdag tydens kruisondervraging in sy borgtogaansoek gesê met betrekking tot vrae oor ’n selfoon wat die staat beweer hy as ’n omkoopgeskenk aanvaar het.

Die staatsaanklaer, Cliff Lutibezi, het vir die eerste uur van Esau se borgtogaansoek gefokus op die betrokke swart selfoon wat glo ook in die Al Jazeera dokumentêre onthulling van die Fihsrot-korrupsieskandaal ter sprake gekom het.

Esau se regsverteenwoordiger, Florian Beukes, het beswaar gemaak hieroor en gesê die selfoon is nie relevant tot hierdie hofverrigtinge nie, gegewe dat Esau nie in terme daarvan aangekla is nie. Regter David Munsu het egter die ondervraging toegelaat.

Esau het getuig dat iemand wat homself as ’n belegger van Hongkong voorgestel het, hierdie selfoon aan hom gegee het as ’n geskenk. Hy het verduidelik dat hy hierdie toestel na Namibië terug gebring het en dit in sy studeerkamer gelos het voor hy dit teruggegee het.

“Ek het dit teruggegee omdat ek reeds ’n werk- en ’n persoonlike selfoon gehad het.”

Volgens Esau het hy die selfoon uit hoflikheid, asook veiligheid en sekuriteit gevat. Hy het erken dat hy navrae by die belegger gedoen oor iPhone-model selfone wat twee sim-kaarte kan vat, maar hy het glo nooit uitdruklik gevra vir een nie.

“Ek het gesê dis ongemaklik om ’n werksfoon en ’n persoonlike selfoon te hê,” het hy getuig.

Hy het verder gesê hy het nie aan die parlement daardie selfoon as ’n bate verklaar nie, omdat dit nie aan hom behoort het nie.

TERUGKEER NA PARLEMENT

Esau het ook tydens kruisondervraging erken dat hy verskeie dokumente wat in die Fishrot-korrupsieskandaal verstrengel is, onderteken het sonder om dit deur te lees – optrede wat Lutibezi aan hom gestel as nalatig beskou kan word.

Esau het nie regstreeks hierop geantwoord nie en eerder verduidelik dat hy die verantwoordelikheid om ondersoek in te stel aan beamptes van sy ministerie gedelegeer het.

Hy het aan Munsu gesê dis teen sy morele en etiese waardes “om aan iets te raak wat nie myne is nie.”

Esau het ook tydens sy getuienis gesê hy hoop om weer ’n lid van die Namibiese parlement te wees. “Ek sal dalk teruggaan parlement toe,” het hy gesê.

MEDEBESKULDIGDES

Esau het getuig hy het verskeie van sy medebeskuldigdes vir die eerste keer in die tronk ontmoet toe hulle vir hul beweerde medepligtigheid in die korrupsiesaak in hegtenis geneem is.

“Ons is nie eweknieë nie. Van hulle is jonk genoeg om my seuns te wees,” het hy getuig.

Hy het aangevoer dat hy tevore geen verhouding met onder andere die medebeskuldigdes Ricardo Gustavo, Sacky Shanghala en Otneel Shuudifonya gehad het nie.